Dalawa katao kabilang ang 18-anyos na bebot na tulak umano ng ilegal na droga ang arestado sa buy-bust operation sa Malabon City, kahapon ng madaling-araw.
Kinilala ni Malabon Police Chief P/Col. Jessie Tamayao ang mga naaresto na sina Orlando Ocampo alyas Body, 45, listed/user at Chrizialyn Pingol alyas Desiree, kapwa ng Bgy. Longos.
Sa imbestigasyon ni PSSg. Ramos Timmago, alas-12:30 ng hatinggabi nang ikasa ng mga operatiba ng Station Drug Enforcement Team sa pangunguna ni P/Capt. Johnny Baltan, kasama ang PDEA-CAMANAVA ang buy-bust operation kontra sa mga suspek sa kanilang bahay.
Matapos tanggapin ni Pingol ang P300 marked money mula sa pulis na nagpanggap na poseur-buyer kapalit ng isang sachet ng shabu ay agad itong sinunggaban ng mga operatiba kasama si Ocampo.
Narekober kay Pingol ang tatlong sachets ng shabu at buy-bust money habang nakumpiska naman kay Ocampo ang limang sachets ng shabu na tumitimbang ng 1.86 grams at nasa P12,648 ang halaga.