KAILANGAN ba talagang may mangyari muna bago kumilos ang PNP.?
Dahil sa video ng road rage kung saan ang isa sa mga sasakyan ay may plakang “8”, naging mahigpit naman ang PNP sa mga sasakyang may ganu’ng plaka.
Lumabas na isang entertainer ang may-ari ng sasakyan na nanuntok ng motorista sa Angeles City, Pampanga. Hindi na sana ito malaking isyu pero dahil sa plakang “8”, mas nabigyan ng atensiyon. Hindi naman pala mambabatas. Kaya ano ang karapatan niyang gumamit ng plakang “8”?
Dahil naghigpit ang PNP, dalawang sasakyan ang kinumpiska ng Task Force Limbas na may plakang “8” at may malaking sticker pa ng Office of the President. Tila kulang ang plakang “8” kaya dapat may matinding sticker pa. Ayon sa may-ari ng dalawang sasakyan, nakakabit na raw ang mga plaka at sticker nang ibayad sa kanya ang dalawang sasakyan. Sino ang nagbayad sa kanya? Mambabatas ba? Konektado ba sa opisina ng pangulo? Bakit hindi tinanggal at ikinabit ang regular na plaka? Para bida sa kalsada? Ganito ang kulturang “wang-wang” na nais tanggalin ng nakaraang administrasyon. Mukhang bumalik na naman ngayon.
◘◘◘
May ilang opisina o kumpanya ang hinihikayat ang kanilang mga empleyado na matulog ng ilang minuto o “power nap” kung tawagin. Ito ay para maging mas alerto at presko, para mas maganda rin ang trabaho. Mga empleyado ng kumpanya ito. Maaari bang sabihin na ganito rin para sa pangulo ng bansa? Ito kasi ang dahilan na ibinigay ng Palasyo kung bakit wala si Pangulong Rodrigo Duterte sa ilang miting sa pagpupulong ng mga lider ng ASEAN sa Singapore. Nagpahinga lang daw.
Agad naman dumepensa ang kanyang gabinete at kaalyado sa mga batikos ng ilang mambabatas. Pero, kung ganu’n at mapapagod lang pala at kailangan magpahinga, bakit pa nagpunta sa Singapore? Kung puwede naman na si DFA Sec. Teddy Boy Locsin at iba pang miyembro ng gabinete ang maging kinatawan ng pangulo at makipag-usap sa lahat, kailangan bang pumunta?