ni Reggee Bonoan - @Sheet Matters | July 24, 2020
Kasalukuyang nasa vacation house nila sa Batangas si Aga Muhlach kasama ang mag-iina niyang sina Charlene, Atasha at Andres at walang planong maglalabas, base na rin sa kuwento ng manager ng aktor na si Ms. Ethel Ramos.
Kaya hindi mapapanood si Aga ngayong Metro Manila Film Festival 2020, taliwas sa huling panayam sa kanya na gagawa ulit siya ng pelikula para sa MMFF.
Nalaman namin ito dahil tinanggihan ng aktor ang offer sa kanya ng kilalang movie outfit kasama ang sikat na aktres na nakasama na rin niya sa isang pelikula na produced ng Star Cinema.
Kuwento pa ni Manay Ethel, “Gustung-gusto ni Aga pero next year na raw siya magmu-movie. Ayaw niyang maglalabas ngayon because of this Covid-19, nakakatakot naman talaga.”
Sabagay, kumota naman na si Aga nu’ng 2019 dahil naka-dalawang pelikula siya, ang Nuuk na kinunan sa Greenland kasama si Alice Dixson at ang Miracle in Cell No. 7 nu’ng 2019 Metro Manila Film Festival.