ni Thea Janica Teh | September 18, 2020
Inaprubahan na ng House Energy Committee nitong Huwebes, Setyembre 17 ang
consolidate bill na naglalayong palawigin ang lifeline rate sa ilalim ng Electric Power
Industry Reform Act.
Dalawang bill ang pinagsama sa Section 73 ng EPIRA measure na kapwa matatapos sa
2021. Sa ilalim ng ipinasang panukala, ang lifeline rate ay palalawigin hanggang 20 taon na matatapos sa 2041.
Ang lifeline rate ay isang socialized pricing mechanism o pagpapanatili ng presyo ng
kuryente kahit pa tumaas ito at nakadepende sa gamit ng mga konsyumer na kabilang sa low income market ng Energy Regulatory Commission.
Sa ilalim ng panukalang ito, hindi na papatungan ng charges ang nakonsumong kuryente ng mga kabilang sa low income earners o 'yung may mababang kita at kung magkano lang ang kanilang ginamit ang kanilang babayaran.
Bukod pa rito, pinag-uusapan na rin sa senado ang Senate Bill 1583 ni Energy Committee chair Sherwin Gatchalian o pagpapalawig ng lifeline subsidy sa electric rates ng mga kabilang sa low-income market.
Layon ni Sen. Gatchalian na palawigin din ito ng 20 taon.