ni Lolet Abania | October 30, 2022
Walang overseas Filipino workers (OFWs) na naiulat na nasaktan matapos ang nakamamatay na Halloween stampede sa Seoul, South Korea nitong Sabado ng gabi, ayon sa Department of Migrant Workers (DMW) ngayong Linggo.
“[P]er our labor attaché, no reports of OFWs hurt as of this time but they are still monitoring the situation,” saad ni Migrant Workers Secretary Susan Ople sa GMA News.
Kaugnay nito, ayon sa Department of Foreign Affairs (DFA), wala pa silang natatanggap na reports kung mayroong Pilipino na naging biktima sa stampede.
“The Embassy is closely monitoring the situation and is in coordination with local authorities in case any Filipino national has been affected,” pahayag ng DFA sa isang statement.
“The Embassy continues to remind all Filipinos in Korea to observe precautions during large events,” dagdag ng DFA.
Base sa Philippine Embassy in Seoul, sinabi ng DFA na mula sa mga nasawi, 2 foreign nationals ang na-ireport na namatay, habang 15 iba pang foreigners ang nasugatan.
Ayon naman sa emergency officials ng Seoul, nag-iwan ang nangyaring stampede ng tinatayang 153 kataong namatay, habang 150 pa ang nasaktan nang ang dagsa ng mga tao na nagdiriwang ng Halloween festival ay biglang nagsiksikan at maunahang makapasok sa isang alley sa Itaewon district ng Seoul.
Ayon sa Reuters report, “social media footage showed hundreds of people packed in the narrow, sloped alley crushed and immobile as emergency officials and police tried to pull them free.”
Gayundin, marami sa mga nasaktan ang kritikal ang kondisyon subalit nabigyan na rin ng emergency treatment. Ang mga foreigners na nakasama sa stampede ay nai-transfer naman sa pinakamalapit na mga ospital.
Samantala, sa report pa ng Reuters, nagdeklara na si South Korea President Yoon Suk-yeol ng period of national mourning ngayong Linggo, at nagpahayag ng kanyang pakikiramay sa mga biktima ng stampede, kung saan karamihan aniya sa mga ito ay teenagers at mga nasa edad 20s, habang mabilis na recovery naman ang dasal nito sa mga nasaktan.
“This is truly tragic,” pahayag ni Yoon sa isang statement. “A tragedy and disaster that should not have happened took place in the heart of Seoul last night.”