ni Thea Janica Teh | September 29, 2020
Apat na bulkan sa Pilipinas ang binabantayan ng Philippine Institute of Volcanology and Seismology (Phivolcs) dahil sa “abnormal” condition na ipinapakita ng mga ito ngayong Martes.
Ang mga bulkan na ito ay ang Taal sa Batangas, Mayon sa Albay, Bulusan sa Sorsogon at Kanlaon sa Negros Island.
Ayon kay Phivolcs Director Renato Solidum, nasa Alert Level 1 ang apat na bulkan at nagsasagawa ng steam-driven explosion. Kaya naman pinag-iingat ang mga residenteng malapit dito na huwag nang pumasok sa danger zone.
Samantala, sa senate hearing ng Department of Science and Technology (DOST) para sa inilaang budget ng Phivolcs, sinabi ni Solidum na hindi makaaapekto sa pagbaba ng proposed budget ang pagmo-monitor nito sa mga bulkan.
Mula sa P462 milyong budget ng Phivolcs, bumaba ito sa P133 milyon. Ngunit, dagdag ni Solidum, maaaring maapektuhan ang kanilang mga proyekto tulad ng “strengthening the tsunami awareness and resilience of communities.”