29 patay dahil sa masamang panahon – NDRRMC

ni Lolet Abania | January 17, 2023

Umabot na sa 29 ang nasawi na nai-report ngayong Martes dahil sa low pressure areas, shear line, at Northeast Monsoon o Amihan simula Enero 2, ayon sa National Disaster Risk Reduction and Management Council (NDRRMC).

Base sa latest situational report ng NDRRMC, 8 sa naiulat na namatay ay mula sa Zamboanga Peninsula, tig-7 sa Eastern Visayas at Northern Mindanao, 5 mula sa Bicol, at tig-1 sa Davao Region at Soccsksargen.

Labinlima sa mga nasawi ay nakumpirma na habang 14 ay bineberipika pa.

May 4 katao pa ang nai-report na nawawala habang 12 ang nasugatan.

Ayon sa ahensiya, may kabuuang 1,398,103 indibidwal o 347,382 pamilya ang apektado ng masamang panahon mula sa 1,956 barangay sa buong bansa.

Hanggang ngayong Martes, nasa 155,203 katao o 37,984 pamilya na ang lumikas, kung saan nananatili ang mga ito sa 484 evacuation centers, habang may 48,193 displaced people o 12,841 pamilya ang nanunuluyan naman sa labas ng mga evacuation centers.

Nagpatupad na rin sa 14,150 indibidwal o 3,092 pamilya ng preemptively evacuation mula sa Central Visayas, Eastern Visayas, Zamboanga Peninsula, Davao Region, at Caraga dahil sa patuloy na mga pag-uulan.