@Balitang Probinsiya | September 26, 2020
MAGUINDANAO—Dalawang kuta ng teroristang Bangsamoro Islamic Freedom Fighters (BIFF) ang nakubkob ng tropa ng pamahalaan kamakalawa sa bayan ng Ampatuan.
Ang sinalakay ng mga awtoridad ay ang dalawang kuta ng mga terorista sa Bgy. Datu Hoffer sa nabanggit na bayan.
Ayon sa ulat, may nag-tip sa dalawang kuta ng mga BIFF kaya agad itong sinalakay ng tropa ng pamahalaan, pero nakatakas na ang mga terorista.
Napag-alamang nakarekober ang mga awtoridad ng iba’t ibang uri ng pampasabog sa dalawang kuta ng BIFF.
Patuloy pa ang isinasagawang pagtugis ng tropa ng pamahalaan sa mga tumakas na terorista.