11 katao, sugatan sa pag-araro ng bus

ni Ronalyn Seminiano Reonico | September 5, 2020

Inararo ng isang pampasaherong bus ang ilang motorsiklo sa Osmeña Highway, Makati City ngayong Biyernes ng umaga at ayon sa pulisya, 11 ang sugatan sa insidente.

Ang bus na may plakang TYF 328 ay bumangga sa isang kotse at ilang motorsiklo nang huminto ang mga sasakyan sa traffic light sa northbound lane ng Osmeña Highway sa Barangay Pio Del Pilar.

Ayon sa driver ng naturang bus na si Marlon Nacaytona, 29 years old, hindi umano gumana ang brake nang tapakan niya ang pedal nito. Ang mga sugatan sa naturang insidente ay isinugod sa Ospital ng Makati, Makati Med at St. Luke’s Global.

Ayon kay Makati Police chief Colonel Oscar “Jack” Jacildo, mayroon ding opisyal ng Philippine Coast Guard na isa sa mga motorcycle rider na sugatan sa insidente.

Patuloy pa ring iniimbestigahan ng awtoridad ang pangyayari at nasa kustodiya na ng Makati Police si Nacaytona at nahaharap sa kasong reckless imprudence resulting in multiple injuries and damage to property.