Pinas bronze sa Kings Cup Football sa Thailand

ni Anthony E. Servinio @Sports | Oct. 15, 2024

Photo: PH vs Tajikistan - Kings Cup 2024 - Philippine Men's National Football Team

Nauwi ng Philippine Men’s Football National Team ang medalyang tanso sa ika-50 King’s Cup! Ibinaon ng mga Pinoy Booters ang Tajikistan, 3-0, sa punong Tinsunalon Stadium sa Songkhla, Thailand. Nagtapos ang unang 45 minuto na walang goal.

Ibang klaseng koponan ang bumalik para sa pangalawang half at bumuhos na ang mga goal nina Gerrit Holtmann (47’), Jefferson Tabinas (58’) at Zico Bailey (62’). Ito ang unang tagumpay ng Pilipinas mula noong tinalo ang Afghanistan, 2-1, sa FIFA Friendly sa Rizal Memorial Stadium noong Setyembre 12, 2023.

Sinundan ito ng 10 laro na talo o tabla. Nakabawi ang mga Pinoy sa mga Tajik na naging kalaro nila para sa ikatlong puwesto sa Merdeka Tournament sa Malaysia noong Setyembre 8. Nagtapos ang 90 minuto sa 0-0 kaya kinailangan ng penalty shootout na nagtapos sa 4-3 at mapunta ang medalya sa Tajikistan.

Nakatala rin ng kanyang unang panalo ang bagong head coach Albert Capellas. Una niyang inihayag na babaguhin niya ang estilo ng paglalaro ng mga Pinoy na mas tututok sa paglikha ng maraming goal at napatunayan niya ito.

Nagkampeon ang host Thailand at dinaig ang Syria, 2-1. Winasak ni Chanathip Songkrasin ang 1-1 tabla sa ika-91 minuto. Tinalo ng mga Thai ang Pilipinas sa semifinals noong Biyernes, 3-1, kung saan inihatid ni Bjorn Kristensen ang nag-iisang goal.

Nanaig ang mga Syrian sa Tajikistan, 1-0. Sunod para sa pambansang koponan ang FIFA Friendly kontra Hong Kong sa Nobyembre. Ang ultimong pinaghahandaan nila ay ang AFF Mitsubishi Electric Cup sa Disyembre.

ROS E-Painters mahaharap sa Tropang Giga sa semis

ni Clyde Mariano @Sports News | Oct. 6, 2024

Natapos na ang epic five quarterfinals at ang Rain or Shine ang pinalad na makaharap ang Talk ‘N Text sa best-of-five semis na tinalo ang Magnolia Hotshots sa 113-103, sa “you or me” Game 5 sa PBA 49th Season Governors Cup sa Ynares Center sa Antipolo City.

Wala sa kanila ang nais na matalo, subalit isa lang sa kanila ang mananalo at sinibak ng ROS ang Hotshots sa wala nang bukas na Game 5 para tuluyang palakasin ang ambisyon ni coach Yeng Guiao na kunin ang pagwalong PBA title na dalawa mula sa RoS.

Sa panalo nakaganti ang RoS sa Magnolia na tinalo sila sa Game 4, 100-129, at napanatili ang magandang record sa Ynares Center nang talunin ang Hotshots, 111-106 sa overtime sa Game 3. “Ang objective namin is to stay close and not allow Magnolia to stay away from us. We will play it all the way down the line and that’s where we are able to win,” sabi ni Guiao. Namayani si Andrei Caracut sa panalo ng RoS at dinala ang E-Painters sa semis laban sa TNT na unang sinibak naman ang NLEX Road Warriors.

Malaki ang naging ambag ni Aaron Fuller sa RoS nang talunin si import Jabari Carl Bird sa kanilang match up. Umiskor ang 34-anyos na NBA veteran huling 44 segundo para sa 109-101 patungo sa semis.

“Now, the quarterfinal is over, our next move is to prepare the semis. Panibagong pakikipaglaban naman ang amin harapin against another strong team Talk ‘N Text. Beating TNT is a tough task. It needs a lot of sacrifice and hardwork to beat TNT,” ani Guiao nang pabalik sa dugout kasama ang kanyang mga players. “We fought hard and exerted our efforts to win. Breaks however, seem not in our side,” malungkot sinabi ni Victolero.

Japan pinarangalan si Yulo bilang 2X Olympic gold medalist

ni MC @Sports News | Oct. 3, 2024

Sa laki ng naging papel ng Japan upang masungkit ni Carlos Yulo ang tagumpay lalo na ang naitulong ni Japanese coach Munehiro Kugimiya para siya maging isang world-class athlete at taguriang Pinoy champion, binigyang-pugay ng Japan Embassy sa Pilipinas ang naging tagumpay na iyon ng Pinoy gymnast nang makakuha ng 2 gold medals sa 2024 Paris Olympics.

Kasabay nito kinilala ng Japan ang panalo ni Yulo sa isang programa sa Japanese Embassy sa Ambassador’s Residence sa North Forbes Park sa Makati City.

“It was fitting the Japanese Embassy to cele¬brate Caloy’s [Yulo] double victory in Paris. It was in Japan where Caloy honed to become a two-time world and double Olympic champion,” ayon kay Philippine Olympic President Abraham 'Bambol' Tolentino. Nagsimulang mag-training sa Japan si Yulo kasama si Kugimiya noong 2016 at naging scholar siya sa Teiko University.

“For most of his late teens, Caloy has done so well in his sport and those two gold medals in Paris are testament to what he learned while in Japan,” ani Tolentino.

Host sina Japanese Ambassador to the Philippines Endo Kazuya at asawang si Akiko Endo sa seremonya kasama si International Gymnastics Federation president Morinari Watanabe ng Japan at sumaksi rin sina PSC chairman Richard Bachmann at gymnastics head Cynthia Carrion-Norton sa parangal. Pinasalamatan ni Yulo ang Japan lalo na si coach Kugimiya sa naitulong sa kanya.