Ginto para sa Phl paddlers sa ICF Dragon Boat meet

ni Clyde Mariano @Sports | Nov. 3, 2024

Ang Philippine masters mixed gold medal sa 20-seater 200 meters sa idinaraos na ICF Dragonboat World Championships kahapon na idinaraos sa Puerto Princesa, Palawan. (icfpix)

Naka-gold muli ang Philippine paddlers sa ikalawang araw ng ICF Dragon Boat World Championships nitong Okt. 29, na binubuo na ng apat na ginto, dagdag pa ang 1 silver at bronze sa naturang world-class course na idinaraos sa Puerto Princesa Baywalk, Palawan.

Sa gitna ng kalmadong karagatan ng umaga, nasungkit ng hosts Philippines ang golden breakthrough sa wire-to-wire finish sa standard boat mixed 200-meter finals sa oras na 47.07 segundo.

Nagwagi sila sa karera sa agwat na 2 metro kasunod ang Canada (48.69) at Individual Neutral Athlete squad na binubuo ng Russian athletes (49.03) na sumegunda rin sa kompetisyon na itinaguyod din ng Philippine Sports Commission at Tingog party-list.

Mabilis ang paggaod ng PH women’s masters squad at nakuha ang ginto sa 40+ 200-meter event na umoras sa bilis na 49.41 seconds, nanaig sa Czechoslovakia (50.84) at Hungary (52.12).

Nanguna naman ang PHL men’s masters team sa standard board 200-meter event (49.01) habang ang mga Pinay ay dumagdag ng apat pang ginto (55.22) sa meet na inorganisa ng Philippine Canoe Kayak Federation at Puerto Princesa City government.

Nakipagsabayan din ang hosts PHL para masungkit ang silver medal sa men’s 20-seater standard boat open event (47.59) at bronze sa women’s 20-seater 200-meter event (55.22) na hindi inaasahan ang lakas ng performance sa meet kasabay ng centennial jubilee ng International Canoe Federation.

“Ginawa lang namin yung ginawa namin sa training with some slight changes. Huminga kami ng malalim then tuloy-tuloy na. Kumbaga full throttle,” ayon kay national team skipper OJ Fuentes ang unang nakagintong medalya sa opening event kamakalawa.

“Sa last 10 meters gitgitan na yan,” dagdag ni Fuentes. “Masaya kaming makakuha ng first gold pero hindi pa tapos yung misyon namin. Umpisa pa lang yan at hopefully sunod-sunod na.”

Prayoridad, layong iangat ng Ilokano ang estado ng sports

ni MC @Sports News | Oct. 25, 2024

Sina Chavit Singson at anak na si Richelle Singson

Buung-buo ang magiging suporta sa sports upang lalo pang mapaangat ang antas ng palakasan sa Pilipinas dahil na rin sa hindi na bago sa kanya ang pagsuong sa mundong ito. Bilang nagsilbing lider sa Philippine sports si Ilokano man, businessman at sports patron Luis “Chavit” Singson, dating gobernador, congressman at alkalde sa Ilo¬cos Sur, nagsilbi rin siyang lider ng Philippine National Shooting Association (PNSA).

Ang pangakong tulong na ito ni LCS sa sports ay para iangat pa ang antas ng estado ng ahensiya maging ng mga atleta. Una niyang patututukan ang Pinoy athletes na nangangailangan ng sapat na suporta para mas lalo pang umangat ang kalidad ng paglalaro sa international competitions. Inihalimbawa niya sina gymnast Carlos Yulo at weightlifter Hidilyn Diaz-Naranjo na talaga namang umangat sa international scene.

“World class,” ani LCS na kasama ang anak na si Ako Ilokano Ako Partylist Richelle Singson sa isang simpleng press conference sa Solaire Resort and Casino sa Parañaque.

Pinapurihan ni LCS si Diaz-Naranjo na unang nagbigay ng gintong medalya para sa Pilipinas sa Olympic Games noong 2021 sa Tokyo, Japan.

Sinaluduhan din ni Singson si Yulo na naka- dalawang ginto sa Paris Olympics noong Hulyo. Bumalikat din si LCS sa mundo ng boxing dahil hinawakan niya sina boxing icon Manny Pacquiao at Charly Suarez.

Alam ni Singson na kinakapos sa pondo ang mga atleta. “The government should always support our athletes. Given the chance, I will help,” ani LCS. Kinatigan naman ito ni Richelle.

“On sports development, he will be for increase of budget for the athletes. Due to lack of funding, we struggle to produce top-notch athletes who can represent our country well,” aniya.

“We will be in full support of increase of budget for our athletes especially in sports that we’re good at like boxing, now weightlifting. We can see some rising talents, and we need to support them to have more Olympic medalist for the Philippines.”aniya pa.

Earth Run series ng Takbo Para sa Kalikasan malapit na

ni Anthony E. Servinio @Sports | Oct. 23, 2024

Pagtulong para sa pagpapasigla muli ng mga kagubatan sa mga karatig lalawigan ng Metro Manila ang ikinasa ni Ms. Jenny Lumba (gitna) ng Green Media Events bago idaos ang Earth Run sa huling yugto ng Takbo Para Sa Kalikasan sa Nobyembre 17 sa CCP kung saan una na silang nakapagtanim ng 1,000 puno sa Tanay, Rizal ng Haribon Foundation at nasundan ng P50,000 na donasyon sa Million Trees Foundation sa La Mesa Watershed sa Lagro, Quezon City. Official media partner ang BULGAR sa TPSK. (TPSKfbpix)

Kasado na ang Earth Run, ang huling yugto ng seryeng Takbo Para Sa Kalikasan ngayong Nobyembre 17 sa Cultural Center of the Philippines. Matapos ang unang tatlong yugto, ito na rin ang selebrasyon ng isang buong taong pagpapakita ng malasakit para sa Inang Kalikasan.

Tampok ngayon ang karera sa 25 kilometro. Ang mga nakatapos ng 16 sa Fire Run, 18 sa Water Run at 21 sa Air Run ay tiyak na mag-uunahan para mabuo ang malaking medalya gamit ang apat na medalya.

Pangunahing layunin ng Earth Run ang makapagtanim ng 1,000 puno sa Tanay, Rizal. Napili muling tulungan ang Haribon Foundation na isa sa kanilang proyekto ang pagbuhay muli ng mga kagubatan.

Maliban sa 25 ay may mga karera din sa 10, 5 at 1 kilometro. Ginaganap na ang pagpapalista sa mga piling sangay ng Chris Sports at maaaring dumalaw sa opisyal na Facebook ng Takbo Para Sa Kalikasan para magpalista online. Magkakaroon pa rin ng Virtual Run para sa mga hindi makakapunta sa CCP sa araw mismo ng fun run.

Ang mga magtatapos sa Virtual Run ay makakatanggap ng parehong medalya at t-shirt sa mga tumakbo sa karera mismo. Ang BULGAR ay opisyal na media partner ng Earth Run at ng buong serye. Abangan muli ang makulit pero cute na si Bulgarito na magbibigay ng regalo sa mga masuwerteng mga ka-BULGAR.

Samantala, ipinakilala ng Green Media Events na pinangangasiwaan ang Takbo Para Sa Kalikasan ang kanilang unang patakbo sa bagong taon na pagbabalik ng APO Half Marathon sa Pebrero 23, 2025 sa Mall of Asia.

May pamagat ngayon na “Race To Reforest”, ang pangunahing tutulungan ay ang Million Trees Foundation. Ang mga kategorya ay 21, 10 at limang kilometro. Maaaring bumisita sa Facebook ng Green Media Events o APO Half Marathon para sa karagdagang detalye, katanungan at pagpapalista.