'Feel at home' sa Phl hosting ng FIVB Men's Worlds 2025

ni MC @Sports News | Nov. 19, 2024

Photo: Si AVC at PNVF president Ramon “Tats” Suzara nang magsalita sa harap ng 39th FIVB World Congress sa Porto, Portugal. (pnvfpix)

Bawat isang atleta, coach, delegado at fan ay waring madarama ang "feel at home" sa sandaling masolo hosting ng Pilipinas sa unang pagkakataon ang FIVB Men’s World Championship (MWCH) 2025 sa Setyembre sa susunod na taon.

At ipakikita rin sa world of volleyball na ang sport ay minamahal at kinagigiliwan ng mga Pinoy. “We can’t get enough of volleyball,” saad ni Ramon “Tats” Suzara sa 39th FIVB World Congress sa kanilang main session sa Porto, Portugal nitong weekend. “The Philippines is a country that loves volleyball.”

Nahalal si Suzara nitong Setyembre bilang pangulo ng Asian Volleyball Confederation na tatlong taon sa kanyang termino bilang pinuno ng Philippine National Volleyball Federation (PNVF). Sa harap ng higit 200 miyembro ng sport’s world body akbilang na ang newly-elected FIVB president Fabio Azevedo at dating pangulong Ary Graça, pareho ng Brazil, at secretary-general Hugh McCutcheon ng New Zealand, ipinakita ni Suzara kung ano ang aasahan ng MWCH sa bansa sa pag-host nito sa Set. 12 hanggang 28 sa SM Mall of Asia Arena at Smart Araneta Coliseum.

“The rest of the world do not know that yet … that we love volleyball and that Filipino volleyball fans set the standard,” aniya nang tukuyin ang matinding responde ng mga Filipino sa Volleyball Nations League, o VNL, na nai-host ng bansa sa loob ng tatlong taon na magkakasunod.

“We scream and cheer louder than anyone else,” dagdag ni Suzara na ang fan attendance ay maaring umabot ng 8,000 kasunod ng unang 19,000 na itinala noong Hunyo.

Ipinagmalaki rin ni Suzara sa anunsiyo niya sa harap ng congress delegates na mula sa mababang 117th ranked sa mundo, tumalon ang Philippine men’s team sa No. 64 sa loob lamang ng 3 taon matapos ang pandemic. (MC)

Masaya ang Pasko ni Yulo sa P500K mula kay Chavit

ni MC @Sports News | Nov. 11, 2024

Photo: Ipinagmalaki ni Karl Eldrew Yulo ang kanyang 4 na gold medals bilang pagpapahayag ng kanyang pasasalamat sa kabutihang loob ni Luis “Chavit” Singson. Tumanggap siya ng ₱500,000 cash reward mula kay Singson gaya ng pangako nito sa atleta habang saksi ang anak niyang si Ilocano Ako party list Rep. Richelle Singson-Michael. (yulofacebookpix)

Dumaan muna sa napakaraming pagsubok ang batang si Karl Eldrew Yulo bago nakamit ang 4 na gold medals mula sa 3rd JRD Artistic Gymnastics Championships sa Thailand noong nakaraang Linggo bago nakatanggap ng isang insentibo mula sa ginintuang puso ni Senatorial aspirant Luis “Chavit” Singson nang personal niyang ibigay sa atleta ang P500,000.

Sinabi ni Singson na deserve ni Yulo ang insentibo dahil sa kanyang sipag at determinasyon at maging susunod na gymnastics sensation katulad ng nakatatandang kapatid na si Carlos na naka-2 golds sa Paris Olympics noong Agosto.

Nakamit ng 16-year-old Yulo ang gold medals sa junior individual all-around event, floor exercise, still rings, at vault at silver medals sa parallel bars at team all-around event upang maging pinakamatagumpay na atleta sa prestihiyosong torneo.

Kasama ni Yulo sa simpleng turnover ang ina na si Angelica, ama na si Andrew at kapatid na si Elaiza at anak ni Singson na si Ako Ilocano Ako party list Rep. Richelle Singson-Michael. Matagal nang sumusuporta sa Philippine sports si Singson.

Siya ang manager sa professional career ni boxer Charly Suarez na hindi humihingi ng anumang kapalit habang nagsisilbing chairman emeritus ng Philippine National Shooting Association. Personal siyang nanonood bilang panatiko ng Philippine Basketball Association. Malapit din sa puso niya ang Yulo family.

Sa nakaraang 2 linggo, una siyang nagbigay ng P1 million bilang maagang Pamasko sa pamilya at hangad na magkaayos na kay Carlos.

“Love and respect are essential values of a Filipino family,” ani Singson, na kilala bilang mapagmahal na ama sa kabila ng pagiging abala sa trabaho at determinasyon na pag-ibayuhin ang buhay ng Pinoy.

“I am offering myself to be the catalyst of love and forgiveness within the Yulo family. My only wish is for them to finally settle their differences and be united as we celebrate the Christmas season.”

Phl Curling team champ sa Div. B C'ships Canada

ni Anthony E. Servinio @Sports | Nov. 11, 2024

Saludo kami sa malakas na performance ng Philippine Women’s Curling Team sa Division B ng Pan-Continental Curling Championships sa Lacombe, Canada, nang masungkit ang fourth overall. (pscpix)

Lumikha ng kasaysayan ang Philippine Curling National Team at nag-kampeon sa 2024 Pan-Continental Curling Division B Championship sa Lacombe, Canada. Dahil dito, aakyat na ang mga Pinoy sa Division A sa 2025 at lalapit sa kanilang ultimong layunin na mapabilang sa 2026 Winter Olympics sa Milan at Cortina d’Ampezzo sa Italya.

Kinailangang lampasan ng #1 Pilipinas ang makapigil-hiningang finals kontra #3 Kazakhstan, 9-3. Tinalo ng mga Pinoy ang #4 Hong Kong sa semifinals, 6-1, habang ginulat ng Kazakhs ang paboritong #2 Jamaica, 10-3.

Walang bahid ang Pilipinas sa 10 laro sa elimination na tumakbo mula Oktubre 26 hanggang 31 kung saan ang unang apat ang tutuloy sa knockout crossover semifinals. Isa-isa nilang pinabagsak ang Saudi Arabia (15-0), India (10-2), Nigeria (18-2), Qatar (12-1), Puerto Rico (11-2), Brazil (8-1), Jamaica (7-5), Kenya (16-0), Hong Kong (9-4) at Kazakhstan (6-5).

Binubuo ang koponan nina Alan Frei, Christian Haller at magkapatid na Marc Pfister at Enrico Pfister at reserba Benjo Delarmente. Sunod nilang paghahandaan ang Ninth Asian Winter Games sa Harbin, Tsina sa Pebrero.

Pagkatapos ng Harbin ay tututok na sila sa Pre-Qualifier sa Oktubre bago ang pagbabalik sa 2025 Pan-Continental sa Nobyembre na qualifier din para sa World Championship. Ang Qualifier sa Olympics ay nakatakda para sa Disyembre at ang Olympics ay sa Pebrero.

Ang Curling ay nilalaro sa pamamagitan ng pagpapadulas ng isang malaking bato sa yelo. Ginagabayan ito habang winawalis ng mga kakampi ang dinadaanan hanggang makapasok at tumigil sa loob ng nakaguhit na bilog.

Nais ng koponan na subukan ng mga kababayan ang Curling lalo na at may mga palaruan sa mga mall. Ang apat na manlalaro ay nakatira sa Switzerland at may naipon na malawak na karanasan sa Europa bago magpasya na magbuo ng pambansang koponan.