‘Pag sa closed-door hearing ng ICI inabsuwelto si Romualdez, ‘Pinas baka mag-ala-Nepal at Indonesia

ni Pablo Hernandez @Prangkahan | October 2, 2025

MALAMANG MAG-ALA NEPAL AT INDONESIA ANG PILIPINAS KAPAG SA ICI CLOSED-DOOR HEARING INABSUWELTO SI EX-HOUSE SPEAKER ROMUALDEZ -- Halimbawa na sa closed-door investigation ng Independent Commission for Infrastructure (ICI) ay lumabas na hindi sangkot sa flood control projects scam si Leyte Rep. Martin Romualdez kaya hindi siya isinama sa mga kinasuhan, eh sa tingin ba ng independent commission na ito na dahil secret hearing ang kanilang ginawa ay mapapaniwala nila ang publiko na hindi sangkot sa anomalya ang dating House Speaker?

Ang nais nating ipunto rito ay dapat nang isapubliko ng ICI ang kanilang ginagawang imbestigasyon para makita ng mamamayan kung sino ang mga totoong sangkot at hindi sangkot sa flood control project scam dahil kapag si Romualdez sa pamamagitan ng kanilang closed-door investigation ay inabsuwelto nila ito at hindi isinama sa mga kinasuhan, kahit pa sabihing totoong hindi ito sangkot sa flood control projects scam, siguradong magagalit ang taumbayan at iyong ayaw nating mangyari na mag-ala-Nepal at Indonesia ang Pilipinas, ay baka mangyari na, boom!

XXX

MAHIRAP PANIWALAAN NA HINDI SANGKOT SA FLOOD CONTROL PROJECTS SCAM SI ROMUALDEZ -- Si Rep. Martin Romualdez ay pinsang buo ni Pres. Bongbong Marcos (PBBM), at ang pinsan na ito (Romualdez) ng Pangulo ang siyang nagtalaga sa noo’y Ako Bicol Partylist Rep. Zaldy Co bilang chairman ng House Committee on Appropriations noong 19th Congress, at ang noo’y House Speaker Romualdez ang siyang nag-aprub sa Kamara ng year 2023, 2024 at 2025 national budgets na may mga nakapaloob na sangkatutak na flood control projects kaya’t napakahirap talagang paniwalaan na hindi sangkot sa pang-i-scam sa kaban ng bayan si Romualdez.

Gustong makita ng mga Pilipino sa pamamagitan ng live telecast ang mga magiging katanungan ng ICI members at mga kasagutan ni Romualdez kaya’t dapat isapubliko na ang ICI investigation para kung sakaling iaabsuwelto nila ang pinsan ng presidente, ay kapani-paniwala ito sa mata ng publiko, period!

XXX

DAPAT ATASAN NA NI PBBM ANG NBI AT PNP-CIDG NA MAGSANIB-PUWERSA SA PAGTULONG SA ICI SA IMBESTIGASYON SA FLOOD CONTROL PROJECTS SCAM -- Masyadong malawak, halos lahat ng mga lugar sa bansa ay may mga flood control projects at sa rami ng mga nasasangkot sa anomalya, mga pulitiko, mga kontraktor at Dept. of Public Works and Highways (DPWH) officials ay baka tapos na ang termino ni PBBM hindi pa tapos ang imbestigasyon, marami pa ang hindi nakakasuhan.

Kung nais ni PBBM na madaling matapos ang imbestigasyon ay atasan na niya ang National Bureau of Investigation (NBI) at PNP-Criminal Investigation and Detection Group (CIDG) na magsanib-puwersa sa pagsisiyasat at pagtuklas sa mga pulitiko, mga kontraktor at DPWH officials na sangkot sa mga flood control project scam sa kanilang mga nasasakupan, at ang lahat ng makakalap na ebidensya ay i-turnover sa ICI.

Kapag ginawa iyan ni PBBM ay tiyak madaling matatapos ang imbestigasyon, at "forthwith" o agad-agad maipapakulong ang lahat ng sangkot sa anomalya, kasi nga ang bawat region sa bansa ay may mga tanggapan ang NBI at PNP-CIDG, period!

XXX

KAILAN KAYA IPAPAHULI NINA MAYOR MALAPITAN, GEN. PROTACIO AT COL. GOFORTH ANG MGA MANGRARAKET SA CALOOCAN CITY? -- Hanggang ngayon ay tuloy pa rin ang raket na jueteng, STL-bookies at lotteng nina alyas "Carlo,"  "Oye" at "Edmond" sa Caloocan City.

Kailan kaya ipapahuli nina Mayor Along Malapitan, Northern Police District (NPD) Director, Brig. Gen. Jerry Protacio at Caloocan City chief of police, Col. Joey Goforth ang tatlong mangraraket na ito sa Caloocan City, abangan!

Ang petition for cancellation of entries sa marriage certificate

ni Atty. Persida Rueda-Acosta @Magtanong Kay Attorney | October 2, 2025

Dear Chief Acosta,

May katanungan ako tungkol sa plano kong paghahain ng petisyon para kanselahin ang pangalan ko na nakatala sa bahagi ng “wife” sa marriage certificate. Napag-alaman ko kasi na may nakarehistro akong kasal sa Philippine Statistics Authority (PSA) noong sinubukan kong kumuha ng Certificate of No Marriage (CENOMAR) para sa pagpapakasal naming magkasintahan. Laking gulat ko na lamang nang biglang may lumabas na record na kasal ako sa isang Hapon. Wala akong ideya kung paano ito nangyari at ang pirma sa pangalan ko ay hindi sa akin. Ngayon, gusto kong ipatanggal ang pangalan ko sa lumabas na marriage certificate. Tama ba ang petisyon na plano kong ihain? -- Cheska

---

Dear Cheska,

Sa ilalim ng Rule 108 ng Rules of Court, nakalagay ang mga tuntunin patungkol sa pagkansela at pagtatama ng mga nakatala sa Civil Registry. Nakasaad dito kung sino ang maaaring maghain ng petisyon, kung anu-ano ang mga puwedeng kanselahin at baguhin, at iba pa. 

Para sa kasong nakasasaklaw sa iyong katanungan, ipinaliwanag sa kasong Republic of the Philippines vs. Olaybar (G.R. No. 189538, 10 Pebrero 2014, isinulat ni Kagalang-galang na Punong Mahistrado Diosdado M. Peralta) na ang Rule 108 ng Rules of Court ay:

“Rule 108 of the Rules of Court provides the procedure for cancellation or correction of entries in the civil registry. The proceedings may either be summary or adversary. If the correction is clerical, then the procedure to be adopted is summary. If the rectification affects the civil status, citizenship or nationality of a party, it is deemed substantial, and the procedure to be adopted is adversary. Since the promulgation of Republic v. Valencia in 1986, the Court has repeatedly ruled that ‘even substantial errors in a civil registry may be corrected through a petition filed under Rule 108, with the true facts established and the parties aggrieved by the error availing themselves of the appropriate adversarial proceeding.’ An appropriate adversary suit or proceeding is one where the trial court has conducted proceedings where all relevant facts have been fully and properly developed, where opposing counsel have been given opportunity to demolish the opposite party’s case, and where the evidence has been thoroughly weighed and considered.”

Dagdag pa rito, base sa kasong nabanggit sa itaas, ang Rule 108 ng Rules of Court ay hindi maaaring gamitin para mapawalang-bisa ang kasal. Ngunit sa kasong ito, walang nangyaring kasal at walang kahit anong ebidensya na may naganap na kasal. Kaya naman, pinayagan ng Korte Suprema na kanselahin ang pangalan ng naghain ng petisyon sa ilalim ng Rule 108 ng Rules of Court. Partikular na binanggit dito na:

“While we maintain that Rule 108 cannot be availed of to determine the validity of marriage, we cannot nullify the proceedings before the trial court where all the parties had been given the opportunity to contest the allegations of respondent; the procedures were followed, and all the evidence of the parties had already been admitted and examined. Respondent indeed sought, not the nullification of marriage as there was no marriage to speak of, but the correction of the record of such marriage to reflect the truth as set forth by the evidence. Otherwise stated, in allowing the correction of the subject certificate of marriage by cancelling the wife portion thereof, the trial court did not, in any way, declare the marriage void as there was no marriage to speak of.”

Sa iyong sitwasyon, maaari kang maghain ng petition for cancellation of entries sa ilalim ng Rule 108 ng Rules of Court dahil ayon sa iyo ay wala naman talagang naganap na kasal sa pagitan niyo ng isang Hapon. Alinsunod sa nabanggit na desisyon ng ating Korte Suprema, maaaring gamitin ang Rule 108 ng Rules of Court upang gawing wasto o itama ang nakatala sa marriage certificate kung mapatutunayan na walang naganap na kasal. 

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Mga taga-Cebu na tinamaan ng lindol, agad na saklolohan

ni Leonida Sison @Boses | October 2, 2025

Hindi natin maiiwasan ang pagtama ng anumang kalamidad, sakuna at trahedya, gaya ng nangyari sa Cebu na sa lakas ng lindol ay sumira ng mga imprastruktura at hanapbuhay ng mga taga-roon, nagtala rin ng mga nasawi at marami ang nasugatan, kaya mahalaga ang pagbibigay ng tulong, kailangan ng mabilis at aktuwal na pagsaklolo para sa mga kababayan. 

Ang magnitude 6.9 na yumanig sa Bogo City, Cebu noong Martes ng gabi ay isang paalala na ang agarang aksyon at konkretong suporta ang kinakailangan ng mga mamamayan sa oras ng sakuna. 

Matinding pinsala ang naitala sa mga bayan ng Daanbantayan, Medellin, San Remigio, at Bogo City. Sa Daanbantayan, napuruhan ang mahigit 100-taong gulang na Archdiocesan Shrine of Santa Rosa de Lima, isang makasaysayang simbahan. Sa San Remigio, nagdeklara na ng state of calamity matapos ang malawakang pagkasira ng mga kabahayan at imprastruktura. Sa Medellin, iniulat ang nasawi at marami ang nasugatan, bukod pa sa pagkawasak ng daungan, tulay, at mga gusali. Maging ang kulungan doon ay naapektuhan, pero nailigtas ang 404 na preso. Inilikas din ang mga pasyente ng Cebu City Medical Center upang maiwasan ang panganib ng aftershocks.

Sa Bogo City na sentro ng lindol, bumigay ang bahagi ng isang fast food resto habang sa Cebu Business Park, nagtakbuhan palabas ang mga empleyado mula sa mga gusali. 

Kahit ang Miss Asia Pacific International gala night ay nahinto at nagtalunan ang mga kandidata para magtago sa ilalim ng lamesa, pati ang mga bisita. 

Agad namang kumilos ang lokal at pambansang pamahalaan. Sa kautusan ni Gov. Pamela Baricuatro ay mabilis na nagpadala ng relief goods, medisina at iba pa sa mga apektadong lugar, habang tiniyak ng Office of the President ang agarang tulong sa kanila. 

Ang Department of Health (DOH) ay nagpadala na rin ng trauma team, at inihanda ang dagdag na ayuda sa mga sugatan. Tiniyak naman ng Department of Budget and Management (DBM) na may sapat na pondo sa ilalim ng National Disaster Risk Reduction and Management Fund (NDRRMF), kung saan may natitira pang P8 bilyon. 

Kasabay nito, ipinag-utos ni Pangulong Ferdinand Marcos, Jr. na agad gamitin ang Quick Response Funds (QRF) ng mga ahensya gaya ng DSWD, DPWH, DOH, at OCD. 

Sa ganitong panahon, kailangan na lahat ng tulong ay agad makarating para sa mga nilindol. Ang bawat oras ng pagkaantala ay dagdag-pasanin sa mga sugatan, nagugutom, at nawalan ng tirahan. 

Totoong hindi maiiwasan ang kalamidad tulad nito, pero mababawasan ang malaking pinsala kung ang lahat ng ahensya ay mabilis na kikilos. 

Kung tutuusin, ang pagkakaroon ng pondo, plano, at tulong ay nawawalan ng saysay kung hindi agad na makakarating sa mga nabiktima ng sakuna.

Sana ang pamahalaan ay hindi puro press release, dapat diretso ang pag-aksyon at pag-abot nila ng tulong. 

Gayunman, isipin na lamang na sa oras ng trahedya, tayo-tayo lang din ang magkakasama, kaya naman dapat kapit-bisig lang at samahan ng dasal dahil batid nating lahat na walang maiiwan kahit dalihin man tayo ng anumang kalamidad.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com