Mga mambabatas, sila-sila naglalaglagan na!

ni Judith Sto. Domingo @Asintado | October 3, 2025

Tumataginting na P100 bilyon ang kabuuang insertion sa pambansang budget ng 2025 ng 24 na senador! Que horror! At legal raw iyang ganyang kalaking ginawang pagsingit o pagsuksok ng proyekto sa budget! Hindi na ba nahiya sa pagtatanggol na iyan ang Senado? Sa halip na tumiklop at mapayuko sa kahihiyan at magpakita ng pagsisisi ay pagdepensa pa ang piniling gawin! 

Matagal nang idineklara ng Korte Suprema na unconstitutional ang pork barrel ngunit lalo lamang naging garapal at kagimbal-gimbal ang pagmamaniobra sa pondo ng gobyerno na kinuha mula sa ating dugo at pawis!

Ang masakit pa, ‘di bale sana kung sa simula pa lamang ng budget deliberations ay tinatalakay na ang kahalagahan ng isusuksok na insertions at dadaan ito sa pagbusisi, ngunit hindi. Hindi kasama sa talakayan ang taumbayan at ang public hearing ay para lamang sa mga pondong gustong ipaalam ngunit ang mga detalye ng insertion ay nalulukuban ng pagkukubli!

Hindi lahat ng legal ay moral at marapat! Ganyan na ba ang pagkamanhid ng Kongreso ng kasalukuyang panahon? Iyong marinig ng walang makain at isang kahig isang tukang Juan at Juana ang salitang "bilyon" na ganoon na lamang ang ginawang paraan ng pagpopondo na kani-kanya at walang pakialam ang mga barangay o siyudad o mga residente na tunay na nakakaalam ng mga pangangailangan ng mga nasa laylayan ay nakakapagpasilakbo ng sukdulang galit!

Ayun at nagbitiw na ang napabuyangyang na kinatawan sa Mababang Kapulungan na si Zaldy Co, ngunit kailangan nating marinig ang buong katotohanan sa kanya.

Makonsensya naman ang taong ito, na ayon sa mga akusasyon ay grabe raw ang nakulimbat. Aminin na sana ni Co kung sinu-sino pa ang binigyan niya at nanghingi sa kanya, kaysa magtago siya para lamang protektahan ang mga personalidad na kanyang tila kinatatakutan. Ano pa ba naman ang ikakatakot niya sa inabot niyang mga pag-akusa? Piliin mo ang taumbayan habang may pagkakataon ka pang gumawa ng tama, Ginoong Zaldy Co. Marami ka pang kailangang ihayag.

At nagkakaturuan na rin! Si Rep. Martin Romualdez ang itinuturo ni Sen. Chiz Escudero na nadawit na rin sa diumano’y script ng mga pangyayari. Siya nga ba o ilan silang arkitekto ng 2025 budget na itong walang kasing garapal! Magsalita ka na, Ginoong Romualdez. Bigyan mo ng kaliwanagan ang mga tanong ng taumbayan. Hindi nila kailangan ng iyong simpleng pagtatanggi. Piliin mo ang taumbayan hanggang may panahon ka pa. 

Samantala, nito ring Lunes ay namalas natin ang ginawang paglabas ng mga estudyante sa Maynila, kabilang na ang mula sa University of Santo Tomas at Far Eastern University para ipakita ang kanilang pagkapoot sa sistematikong bilyun-bilyong korupsiyong patuloy na nailalantad sa kasalukuyan. 

Inaasahan nating walang humpay ang mga demonstrasyon at pagsasama-sama para manawagan ng pananagutan at pagpuksa sa korupsiyon. 

Ano pa kaya ang mga kasabay na hakbang na ginagawa ang administrasyong Marcos Jr. para mabigyan ng hustisya at pagbabago ang taumbayan? Hindi sapat ang maghintay na lamang sapagkat marami pang maaaring magawa. Huwag nang hintayin pang gumulo lalo ang sitwasyon at mawindang lahat dahil sa pagkaantila ng mga karampatang aksyong makapagpapagaan ng kalagayan ng taumbayan.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Pagsusulong sa karapatan ng indigent senior citizens

ni Bong Go @Bisyo Magserbisyo | October 3, 2025

Napakasikip sa dibdib ng inyong Senator Kuya Bong Go nang makasalubong ko kamakailan ang isang lola na 68 years old, nagtitinda pa ng turon sa gilid ng daan para lang may pantustos sa pamilya. Sa edad niya, dapat may tulong na siyang natatanggap mula sa gobyerno — pambili man lang ng gamot, ng pagkain o pamasahe. Ang sakit sa damdamin na makitang ganito pa rin ang kalagayan ng marami nating senior citizens. 

Kaya sa hearing ng Senate Committee on Social Justice, Welfare, and Rural Development noong September 29, muli tayong nakiusap sa national government at sa mga kapwa ko mambabatas na sana ay unahin ang kapakanan ng ating mga nakatatanda. Ayon sa DSWD, meron pang halos isang milyong seniors na hanggang ngayon, hindi pa rin nakakatanggap ng social pension na itinatakda ng batas.

Para maibigay ang pensyon ng mga nasa waitlist, iminungkahi natin na kung maaari ay i-reallocate para sa ating mga lolo at lola ang pondong nakalaan sa flood control at ghost projects -- na ginagawa namang gatasan ng iilan! 

Bilang inyong senador, ipinaglaban natin bilang co-author ang Republic Act No. 11916 na nagtaas sa buwanang pensyon ng ating indigent senior citizens. Patuloy din nating isinusulong ang Senate Bill No. 411 na layong magtatag ng national senior citizens hospital. Bukod sa lubos na pangangalaga sa ating seniors, hangad din natin na magkaroon ng malawak na research at training na nakatutok sa kanilang kapakanan.

Magtulungan tayo para mabigyan ng sapat na serbisyo at malasakit ang ating mga lolo at lola. Huwag natin sila pabayaan dahil kung wala sila ay wala rin tayo sa mundong ito.

Samantala, nitong nakaraang Lunes, September 29, sa pagdinig ng panukalang 2026 budget ng kanyang opisina, inihayag natin ang buong suporta sa opisina ni Vice President Sara Duterte. Naniniwala tayo sa ating “working VP” at sa serbisyong naihahatid niya, lalo na sa mga mahihirap nating kababayan. Mahalagang maisulong ang sapat na pondo ng Office of the Vice President dahil tiyak na taumbayan ang makikinabang dito.

Personal din tayong tumulong sa 286 nasunugan sa Sampaloc, Manila nitong October 1. Bukod sa ating tulong, may inihatid ding suporta ang national government para makatulong sa pagpapagawa ng kanilang mga bahay at makabangon muli.

Nitong nakaraang linggo, tuluy-tuloy na nagsagawa ng ilang relief operations sa iba’t ibang lugar ang ating Malasakit Team upang tumulong sa mga kababayan nating nasunugan at nabahaan, kabilang na ang 99 na biktima sa Cebu City at 447 sa Zamboanga City.

Dagdag pa rito, sa koordinasyon kasama ang pambansang pamahalaan, nagbigay din ang ating Malasakit Team ng tulong sa 65 biktima ng sunog sa Pasig City; 218 sa Mandaue City, 168 sa Cebu City, at 25 sa Talisay City, lahat nasa Cebu; at 18 sa Tagbilaran City, Calape, at Guindulman, Bohol.

Ang mga benepisyaryong ito ay nabigyan ng tulong upang makabangon sa kanilang hinaharap na pagsubok.

Patuloy kaming magseserbisyo sa inyo dahil bisyo ko ang magserbisyo at ako ay naniniwala na ang serbisyo sa tao ay serbisyo ‘yan sa Diyos. 

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mahal nating mga guro… Pero sahod nila, napakamura!

ni Imee Marcos @Imeesolusyon | October 3, 2025

Hello mga nakshie!

Sabay-sabay nating batiin ng Happy Teacher’s Day ang mga makabagong bayani — ang ating mga guro!

Malapit talaga sa puso ko ang mga guro dahil ang aking nanay, ang ating orig na First Lady na si Imelda Marcos, ay naging isang guro rin!

Hindi matatawaran ang dugo’t pawis na ibinubuhos nila sa kanilang sinumpaang propesyon. Pero alam niyo ba? Literal na LAHAT NA ginagawa nila! Teacher na, coach pa, tindera, cook sa feeding program, social worker, tagapamahala ng eleksyon, EMCEE pa sa school events — grabe, lahat kinakaya!

Kaya naman, higit pa sa cake at flowers, dasurv ng ating mga guro ang totoong regalo: dagdag na suporta para sa kanilang kabuhayan at trabaho. Hindi lang ngayong Teachers’ Day, hindi lang pang isang buwan, kundi pangmatagalang benepisyo na makatutulong sa kanilang pang-araw-araw.

Panahon na para itaas ang sahod ng mga guro! Sa kabila ng implementasyon ng 2nd Tranche ng SSL VI, bitin pa rin! 

Kasi sa totoo lang, marami na sa kanila ang “taga-London” — LOAN dito, LOANDON! Dahil hindi talaga sapat ang kanilang suweldo! Sumasabay pa ang mga bonggang kaltas sa kanilang sahod!

May chalk allowance nga ang ating mga guro pero kakarampot na P10K, sa buong taon na! Kaya ang ending, sa sariling bulsa ng titser manggagaling ang pambili ng chalk at iba pang kailangan sa silid-aralan. 

Kung gaano kaaga pumasok ang ating mga guro, ganoon naman kahuli ibinibigay ang kanilang mga benepisyo. Ang kanilang performance-based bonus, 3 years nang nakatengga! 

Bukod pa riyan, dapat bawasan ang sangkatutak na admin works at dagdag na trabaho na isinisiksik sa kanila. Hindi sila “work all you can” na parang eat all you can lang ha! May mga naririnig pa akong teachers na pati pagbebenta sa canteen, sila pa ang inuutusan.

Kung gaano karami ang memo na nilalabas para protektahan ang mga estudyante, dapat ganoon din katindi ang effort para alagaan ang ating mga guro na siyang humuhubog sa bawat mag-aaral.

Kung may happy wife, happy life… may happy teacher, happy learner! Kung masaya si titser, masaya ring natututo ang ating mga anak!

Ang IMEE-lesson: MATUTO tayong pahalagahan ang mga nagtuturo sa atin, hindi lang tuwing Teacher’s Day, kundi sa araw-araw.

‘Yan lang muna mga nakshie, babush! 

Muli, maligayang araw ng mga guro! Mabuhay kayo mga mamser!