Konektado na ang Pinoy, kahit sa huling hantungan!

ni Imee Marcos @Imeesolusyon | October 5, 2025

Sa kabila ng ingay at intriga sa pulitika, tuloy lang tayo sa trabaho. Hindi tayo natitinag, hindi tayo puwedeng matali sa away at bangayan — work as usual lang katulad ng karamihan.

Kailan lang ay tatlo sa ating mga panukalang batas ang naging ganap na BATAS. Yes beshie, batas na!

Una, term extension para sa ating barangay at SK officials. Apat na taon na ngayon ang kanilang termino. Ibig sabihin, suspendido muna ang barangay elections ngayong taon at sa 2026 na ulit ang laban. Mas mahaba ang panahon para magtrabaho, hindi puro kampanya at pamumulitika -- less gastos pa. Winner tayo du’n, ‘di ba?

Pangalawa, libreng libing para sa pinakamahihirap na pamilya. Harapin natin ang totoo: mahal mabuhay, luho ang magkasakit, at mas mahal ‘pag namatayan. Sa batas na ito, hindi na poproblemahin ng mga kababayan natin kung saan kukuha ng pera para ilibing ang kanilang mahal sa buhay. Kahit sa huling hantungan, may dignidad.

Pangatlo, Konektadong Pinoy Act. Batas na rin ang ating panukalang gawing mas mabilis at mas mura ang internet sa bansa. Malaking ginhawa ito para sa ating mga estudyante, sa mga OFW na araw-araw gustong makausap ang pamilya, at sa mga online worker. Walang disconnected sa Konektadong Pinoy -- lahat kabilang!

Pasado na rin ang ating Senate Resolution No. 127 o High Seas Treaty. Dininig na nila ang sigaw ng ating mga dukhang mangingisdang araw-araw naglalayag, kahit wala kasiguruhan kung may mauuwing huli. 

Napagtibay na rin natin ang Letter of Agreement (LOA) on Narcotics Control and Law Enforcement sa pagitan ng Pilipinas at Estados Unidos. Simpleng layunin: tapusin ang kalbaryo ng bansa sa ilegal na droga. 

At dahil Coop Month ngayong Oktubre, may ihihirit pa tayo, itotodo ko na ang panawagan ko: Bekenemen, paki-aprubahan na rin ang panukalang amyenda sa Cooperative Code! 

Ilan lang ‘yan sa mga nagawa natin sa Senado, at hindi diyan magtatapos. Marami pang nakapila, marami pang aasikasuhin. 

Kaya uulit-ulitin ko: trabaho muna bago eksena. Kayod lang nang kayod, dahil ang pera ng taumbayan dapat bumabalik sa kanila sa anyo ng proyektong tunay na mapakikinabangan.

Gobyerno, kung seryoso sa emergency response, dapat may ‘emergency warehouse’

ni Ka Ambo @Bistado | October 4, 2025

Nagkakaisa ang mga eksperto: Wala nang “cold war” ang US, Russia at China.

Pero, nag-level-up ito -- umuusok at nagliliyab na ang “hot war”— buwelo sa Ikatlong Digmaang Pandaigdig.

----$$$--

NAG-USAP nang personal sina US President Donald Trump at Russian strongman Vladimir Putin sa Alaska kamakailan, pero hindi nabuhusan ng malamig na tubig ang mitsa ng digmaan.

Ngayon, sinisikap ni Trump na maareglo ang China — pero sino o aling bansa ang

kanyang isasakripisyo?

Taiwan o Pilipinas?

-----$$$--

KAPAG binantaan ni Trump ang China, malaking siklab ‘yan ng panibagong digmaan.

Pero, ang giyera — ay siyang modelo ng larong ahedres sa sinaunang panahon.

Aling piyesa ang gagamitin at isa-sacrifice ng “GRANDMASTER” — upang makanakaw ng “advantage”?

-----$$$---

NAMULAT ang bansa sa kahalagahan ng preparasyon sa malakas na lindol nang yumanig ang Cebu.

Walang ulat, kung naging epektibo ba ang earthquake drill sa naturang lugar?

----$$$--

DAPAT ay nilinaw ng NDRRMC kung naging epektibo ang kanilang “national earthquake drill”.

Ano ang resulta ng earthquake drill sa mga lokalidad na tinamaan ng lindol?

-----$$$--

NAPAKAHALAGA ng assessment na ito, dahil iyan ay aktuwal na “validation” o kumpirmasyon — kung tama o angkop ang ginagawang earthquake drill sa mga lokalidad.

Halimbawa, ipinakita sa isang social media post — ang mga paslit na naglalaro sa isang computer shop nang biglang lumindol.

Nakakatuwa na “nagamit” nila ang “duck, cover and hold” — sa ilalim ng mesa.

----$$$--

ANG “duck-cover-hold” technique ay simpleng payo na epektibo naman.

Pero, nasaan ang instant reaction na “relief goods, blanket, tubig, tent”?

Ipinakita ang “improvised plastic” na ginamit ng mga survivor na mistulang insekto na nakasiksik sa “cocoon” ang mga biktima.

----$$$--

KUNG seryoso ang gobyerno sa emergency response partikular sa panahon ng malakas na lindol — dapat ay may “emergency warehouse” sa bawat barangay — na may sapat na kagamitan — tent, blanket, canned goods, medicine at iba.

Monthly o buwan-buwan ay iniimbentaryo ang “emergency supply” — na nakatoka ang DSWD, DND at LGU.

Malinaw na ang pondo o budget sa “emergency response” ay hindi nalalayo sa flood control project scam.

----$$$--

NABISTO ang corruption sa flood control — nang makaranas ng malalaking baha sa lahat ng lugar, bakit walang nagbubunyag ng katiwalian---sa “emergency response” sa panahon ng lindol?

Ibig sabihin, dapat iulat ng DSWD, LGU at iba pang ahensya — kung saan dinala ang “budget”—at suriin kung sangkot din ito sa “raket ng insertion at unprogrammed fund”.

----$$$--

WALA bang pagdinig sa Kongreso — upang suriin kung bakit—walang “emergency supply” sa mga lugar na tinamaan ng lindol?Hindi dapat nagmumula sa malalayong lugar ang “emergency supply” — bagkus ito ay dapat awtomatiko — na nasa barangay hall o munisipyo — na agad makakaabot sa mga biktima — ilang oras lang, matapos maranasan ang lindol o kalamidad.

----$$$--

HINDI lang infrastructure projects ang talamak ang corruption, bagkus ay maging ang proseso ng procurement na posibleng “short delivery, substandard or ghost purchase” — sa lahat ng antas at sulok ng burukrasya.

Nasaan ang DILG, bakit hindi nila dinisiplina at binabantayan ang “gugulin” o “cash flow” ng mga LGUs?

Kaawa-awang Pinoy — matagal na kayong pinagsasamantalahan ng mga talipandas!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Pananagutan ng mga opisyal ng kumpanya sa kaso ng illegal dismissal

ni Atty. Persida Rueda-Acosta @Magtanong Kay Attorney | October 4, 2025

Dear Chief Acosta,

Nagpaplano kaming magsampa ng kasong illegal dismissal laban sa dati naming kumpanya. Maaari ba naming isama sa kaso ang Human Resource (HR) manager at ang immediate supervisor namin? – Dylan

---

Dear Dylan,

Sang-ayon sa batas, ang isang korporasyon bilang isang juridical person ay may tinatawag na “separate and distinct identity.” Ibig sabihin nito ay natatangi at hiwalay ito sa mga tao, empleyado, at mga opisyal na bumubuo rito. Kaugnay nito ang mga karapatan, responsibilidad, at mga pananagutan nito ay hiwalay sa mga taong nabanggit. Sa usapin ng paggawa, tulad ng pamamalakad, pagpasuweldo at pagtanggal ng empleyado, bagaman ang mga aksyon ng isang korporasyon ay ginagawa sa pamamagitan at sa katauhan ng mga opisyal at empleyado nito, nananatili na ito ay aksyon ng nasabing korporasyon at ano mang kahihinatnan nito ay ang korporasyon lang mismo ang magkakaroon ng karapatan at pananagutan. 

Sa kasong Rico B. Escuaragia, et. al vs Fitness First, Phil., Inc., and Liberty Cruz (G.R. No. 266552, January 22, 2024, sa panulat ni Honorable Associate Justice Amy C. Lazaro-Javier), ipinaliwanag ng Kataas-taasang Hukuman na sa kabila ng mga nabanggit sa itaas na legal na prinsipyo, may pagkakataon pa rin na maaaring magkaroon ng pananagutan ang mga empleyado o opisyal ng isang korporasyon:

“While directors, officers and human resource managers like respondent Cruz may be solidarily held liable with the corporation in cases of illegal termination of employees, this is the exception rather than the general rule. To be held solidarily liable with the corporation in labor cases, the manager or officer must have acted with malice or bad faith.”

Sang-ayon sa nabanggit, ang mga empleyado at opisyal ng isang korporasyon ay maaari pa ring maging solidarily liable sa kaso ng illegal dismissal kung mapatutunayan na sila ay kumilos ng may masamang hangarin o bad faith. 

Kaya’t sa iyong katanungan kung maaari bang isama ang immediate supervisor at HR manager sa pinaplano mong kaso, marapat munang pag-aralan kung ang kanila bang naging mga gawain o pagkilos, na may kinalaman sa pagkatanggal mo sa trabaho, ay may masamang hangarin o bad faith. Nagkaroon ba ng pang-aabuso sa kanilang katungkulan na nagdulot o nagbunsod sa pagkatangal mo? O, ‘di kaya ay gumawa o kumilos ba sila ng may masamang hangarin na nagdulot ng pagkatanggal mo sa trabaho? Bukod dito ay dapat din na may mga ebidensya na magpapatibay sa alegasyon na sila ay kumilos na may masamang hangarin o bad faith upang maitaguyod ang kasong isasampa mo laban sa kanila.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.