- BULGAR
- Oct 9
ni Atty. Persida Rueda-Acosta @Magtanong Kay Attorney | October 9, 2025
Dear Chief Acosta,
Gusto ko lamang malaman kung may bisa ba ang kunwaring kontrata? Salamat.
– Esther
Dear Esther,
Ang isang kontrata na hindi sumasalamin sa tunay na kasunduan sa pagitan ng mga partido ay tinatawag na simulated contract. Ang konseptong ito ay ipinaliwanag ng Korte Suprema sa kasong Ciacho vs. Spouses De Guia, et al. (G.R. No. 259051, 26 February 2025) sa panulat ni Honorable Associate Justice Maria Filomena D. Singh, na nagbigay ng diskurso tungkol sa kahalagahan ng pagkakaroon ng tatlong elemento upang ang kasunduan ay maging wastong kontrata. Nakasaad sa nasabing kaso na:
“To be a valid contract, three essential elements must be present: (1) consent of the contracting parties; (2) object certain which is the subject matter of the contract; and (3) cause of the obligation which is established. The absence of any of the foregoing elements renders the contract void.
Article 1345 of the Civil Code provides that a ‘[s]imulation of a contract may be absolute or relative. The former takes place when the parties do not intend to be bound at all; the latter when the parties conceal their true agreement.’ Thus, in an absolute simulation, the contract is void and the parties may recover from each other what they may have given under the contract.”
Ayon sa nasabing kaso, upang maging wastong kontrata, ang isang kasunduan ay kailangang may consent o pahintulot ng mga partidong nakikipagkontrata, object certain o tiyak na bagay bilang paksa ng kontrata, at cause o dahilan ng obligasyon na itinatag. Ang kawalan ng alinman sa mga nabanggit na elemento ay nagpapawalang-bisa sa kontrata.
Gayundin, nakasaad sa Artikulo 1345 ng Kodigo Sibil ng Pilipinas na may dalawang klase ng simulasyon ng kontrata. Ang unang klase ay nagaganap kapag ang partido ay walang layuning matali sa nakasaad sa kontrata at ang ikalawang klase naman ay kapag itinatago lamang ng mga partido sa kontrata ang kanilang totoong kasunduan.
Ang unang klase ng simulasyon ng kontrata o absolute simulation ay walang bisa at ang mga partido sa kontrata ay maaaring mabawi mula sa isa’t isa kung ano man ang kanilang naibigay ayon sa kontrata.
Sa kabilang banda, ang ikalawang klase naman ng simulasyon ng kontrata ay tinatawag na relatively simulated contract, kung saan nakasaad sa Artikulo 1346 ng Kodigo Sibil ng Pilipinas na:
“Article 1346. An absolutely simulated or fictitious contract is void. A relative simulation, when it does not prejudice a third person and is not intended for any purpose contrary to law, morals, good customs, public order or public policy binds the parties to their real agreement.”
Ayon sa nasabing probisyon ng batas, ang mga relatively simulated contracts ay balido lamang kung ito ay hindi nakapipinsala sa ibang tao at hindi nilayon para sa anumang layunin na labag sa batas, moralidad, mabuting kaugalian, pampublikong kaayusan, o pampublikong patakaran. Gayundin, ang mga partido sa ganitong klaseng kontrata ay nabubuklod sa kanilang tunay na kasunduan at hindi sa termino na nakasulat sa nasabing kontrata.
Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.
Maraming salamat sa iyong patuloy na pagtitiwala.
