ICI, gusto pang kalampagin ng mga Pinoy bago ibukas ang imbestigasyon ng flood control projects scam

ni Pablo Hernandez @Prangkahan | October 10, 2025

PARANG GUSTONG MANGYARI NI SEN. CAYETANO FLOOD CONTROL PROJECTS LANG MULA YEAR 2024-2025 ANG IMBESTIGAHAN AT HUWAG NA ANG YEAR 2019-2020 SA PANAHONG SIYA ANG SPEAKER OF THE HOUSE -- Pinutakti na naman ng pamba-bash sa social media si Sen. Alan Cayetano sa statement niya na dapat daw tumbukin na agad sa imbestigasyon ang mastermind sa flood control projects scam na naganap sa year 2024 hanggang 2025.

Maba-bash talaga siya dahil mismong si Sarah Discaya na ang nagsabi sa Senate Blue Ribbon Committee na year 2016 onwards daw sila nag-umpisang makakuha ng bilyun-bilyong pisong flood control projects sa Dept. of Public Works and Highways (DPWH), tapos ang gusto lang ni Sen. Cayetano ay year 2024 hanggang year 2025 ang imbestigahan.

Masyado siyang halatain na iniiwas niya sa isyu ng flood control projects scam ang mula year 2016 hanggang year 2022, kung saan sa panahon ng Duterte administration ay naging Speaker of the House din siya mula July 22, 2019 hanggang October 12, 2020 na namuno sa pagbalangkas sa year 2020 na P4.1 trillion national budget na ang P580.886 billion dito napunta sa DPWH at pagbalangkas sa year 2021 na P4.5T national budget, na ang P694.8B dito ay napunta sa DPWH.

Kumbaga, parang gusto niyang mangyari ay huwag nang isama sa imbestigasyon ang mga flood control project ng DPWH sa panahon ng Duterte admin, kung saan minsan siyang naging Speaker of the House, boom!

XXX

GUSTO YATA NG ICI KALAMPAGIN SILA NG MILYUN-MILYONG PINOY BAGO MAGDESISYONG I-OPEN SA PUBLIC ANG IMBESTIGASYON SA FLOOD CONTROL PROJECTS SCAM -- Magkakasunod na nanawagan ang Catholic Bishops Conference of the Philippines (CBCP), Iglesia ni Cristo (INC) at mga civil society groups sa Independent Commission for Infrastructure (ICI) na isapubliko ang isinagawa nilang imbestigasyon sa mga sangkot sa flood control projects scam dahil nga kaduda-duda ang ginagawa nilang secret o closed-door investigation sa mga nasasangkot na mga politician, DPWH officials at mga kontraktor sa anomalya.

Huwag nang hintayin ng ICI na mag-rally sa kanilang tanggapan ang milyun-milyong Katoliko, kapatiran ng INC at iba’t ibang sektor para sila ay kalampagin na isapubliko ang imbestigasyon nila sa mga sangkot sa flood control projects scam, period!

XXX

ANG GULO NG STATEMENT NI USEC. CASTRO, SUPORTADO RAW NG MALACAÑANG I-OPEN SA PUBLIKO ANG IMBESTIGASYON NG ICI, PERO AYAW DAW NG PRESIDENTE MAKIALAM SA DESISYON NG ICI NA CLOSED-DOOR HEARING -- Sabi ni Presidential Communications Office (PCO) spokesperson, Usec. Claire Castro ay suportado raw ng Malacañang ang panawagan ng CBCP, INC at civil society groups na isapubliko ng ICI ang imbestigasyon sa flood control projects scam, kaya lang daw ay ayaw pakialaman ni Pres. Bongbong Marcos (PBBM) ang naging desisyon ng ICI na gawing closed-door ang imbestigasyon nito sa anomalya.

Ang gulo ng statement ni Usec. Castro, suportado raw ng Malacañang na i-open sa public ang imbestigasyon, pero ayaw daw ni PBBM na makialam, aba’y lintik, eh sino ba ang nasa Palasyo, ‘di ba ang Presidente? Buset!

XXX

MAG-ASAWANG DISCAYA, FEELING MAKAPANGYARIHANG TAO SA MUNDO, MGA PRESIDENTE NG MGA BANSA NAGBABAYAD NG TAX, SILA AYAW MAGBAYAD - -Sinampahan ng Bureau of Internal Revenue (BIR) ng P7.1B tax evasion case ang mag-asawang Curlee at Sarah Discaya dahil sa hindi pagbabayad ng buwis galing sa mga "kinita" ng kanilang mga construction firms mula year 2018 hanggang 2021.

Aba’y sa panahon pala na iyan (year 2018-2021) ay nag-feeling makapangyarihang tao sa buong mundo itong mag-asawang Discaya, dahil ang mga presidente sa mga bansa sa mundo ay nagkukusang magbayad ng tax, tapos sila (mag-asawang Discaya) ayaw magbayad ng tax, mga pwe!

Nanganganib ang mental health ng mga Pinoy

ni Imee Marcos @Imeesolusyon | October 10, 2025

Alam mo ‘yung pakiramdam na parang nauubos ka na? ‘Yung araw-araw kang binubugbog ng mahal na bilihin, baha, trapik, utang, at kung anu-anong iskandalo sa gobyerno — na parang teleserye na walang katapusan? Eh paano ka pa nga naman hindi mababaliw sa ganitong sistema?

World Mental Health Day ngayong Oktubre 10, kaya’t gusto kong isigaw ito nang malakas: “TAKE CARE OF OUR MENTAL HEALTH NOW!” 

‘Wag nating hayaang sirain ng corruption at iba pang mga problema ang ating pag-iisip. 

Ito ang realidad: marami tayong kababayan na tahimik na naghihirap — mga estudyanteng hindi makatulog, mga nanay na nilalamon ng pagod, at mga kabataang nawawalan ng gana sa buhay dahil wala man lang nakikinig sa kanila.

Kaya isinusulong ko ang Senate Bill No. 1171, para maamyendahan ang Mental Health Act. Simple lang ang punto: magpatayo tayo ng community-based mental health centers sa bawat probinsya, lungsod, at grupo ng bayan. Libre, abot-kamay, at may sapat na tao, gamot, at pasilidad. 

‘Wag natin kalimutan, mental health is a basic right. Hindi ito pribilehiyo ng iilan.

Panawagan ko rin sa mga mental health experts, nurses, at teachers: tulungan nating palawakin ang serbisyo. Bigyan natin ng training ang mga kabataan para sa peer counseling, tulungan natin ang mga guro na magkaroon ng counseling certification, at hikayatin din ang mga kababayan abroad na ibahagi ang kanilang kaalaman.

Sa totoo lang, ang kalaban ng mental health ang malawakang korapsyon at kawalan ng malasakit.

Kung kaya nating magsayang ng bilyun-bilyong budget para sa kampanya at paninira sa iba, kaya rin nating maglaan para sa mental health at iba pang proyekto na para sa tao.

Kasi kung hindi na natin kayang alagaan ang ating sarili, paano pa natin maaayos ang bansa at ang bulok na sistema?

May pekeng green plates, tiyaking walang makakalusot

ni Leonida Sison @Boses | October 10, 2025

Hindi lahat ng green ay eco-friendly. Sa lansangan, may ilan ding berde pero nababalutan ng pandaraya. 

Kung ang mga drayber ay marunong mandaya sa simpleng coding, paano pa sa mas seryosong usapan ng disiplina sa kalsada at malasakit sa kapwa? 

Kaya tama lang ang hakbang ng Philippine National Police-Highway Patrol Group (PNP-HPG) na higpitan ang mga gumagamit ng pekeng green plates para lang makaiwas sa number coding. Sa panahon ngayon, disiplina sa lansangan ay kasing halaga ng disiplina sa kalikasan. 

Ayon kay HPG Acting Director Police Colonel Hansel Marantan na ang kanilang panawagan ay hindi laban sa mga lehitimong may-ari ng electric at hybrid vehicles (EV/HEV), kundi sa mga mapanlinlang na nagkukunwaring eco-friendly para makalusot sa coding scheme. 

Batay sa Electric Vehicle Industry Development Act (EVIDA), ang mga rehistradong EV at HEV na nasa listahan ng Department of Energy (DOE) ay exempted sa number coding hanggang 2030. Subalit lumalabas na may ilang motorista ang nagpapanggap na EV owners, kahit hindi naman kuwalipikado. 

Ang DOE ay may opisyal na listahan ng mga lehitimong EV models sa kanilang EV Industry Portal, na siyang batayan ng mga otoridad sa pag-verify. Kaya kahit may green plate, kung hindi rehistrado sa DOE, hindi ito exempted. 

Sa bagong crackdown ng HPG, sinumang mahuling gumagamit ng pekeng green plate ay tatanggalan ng plaka, bibigyan ng ticket, at ipepresinta sa Land Transportation Office (LTO) para sa kaukulang parusa. 

Kaya naman habang maaga pa, pinapayuhan ng opisyal ang mga violator na ibalik na ang orihinal na plaka bago pa sila masita sa kalsada. 

Ang kampanyang ito ay hindi lang simpleng pagpapatupad ng batas, ito ay paalala ng integridad at disiplina sa lansangan. Ang green ay hindi lang basta kulay ng plaka, ito ay sumasalamin sa malinis na konsensya, tapat na pamumuhay, at responsableng pagmamaneho. Dahil kung gusto nating maging tunay na progresibo at eco-friendly ang ating bansa, dapat magsimula tayo sa pagiging totoo.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com