Earthquake drills sa mga opisina, iskul, gawing regular

ni Leonida Sison @Boses | October 15, 2025

Tayong mga Pinoy na pinatatatag na ng mga unos at kalamidad, tila nagiging normal na rin sa atin ang maranasan ang mga trahedyang ito, subalit hindi dapat ito maging dahilan na manatili sa takot o mawalan ng pag-asa. Sa halip, ito ay paalala sa atin na ang pagiging handa ay hindi lang tungkulin ng gobyerno, kundi responsibilidad nating lahat. 

Kaya’t ang panawagan ng Department of Labor and Employment (DOLE) at ng Trade Union Congress of the Philippines (TUCP) na magkaroon ng palagiang earthquake drills sa mga opisina at mga katulad nito ay isang hakbang tungo sa disiplina at kaligtasan ng bawat naghahanapbuhay. 

Ayon kay DOLE Secretary Bienvenido Laguesma, ang seguridad at safety sa trabaho ay hindi basta compliance o pagsunod lang sa batas, ito ay dapat na maging kultura na natin. Kaya naman buong suporta ang ibinigay ng ahensya sa panukala ng TUCP na magsagawa ng earthquake drills nang hindi bababa sa dalawang beses kada buwan sa mga kumpanya sa buong bansa.

Para sa kanila, ang paghahanda laban sa sakuna ay hindi ginawa para sa walang rason, bagkus kasanayang kailangang paulit-ulit hanggang maging natural na reflexes ng mga manggagawa sa oras ng peligro. 

Binigyang-diin naman ni TUCP President Raymond Mendoza na ang mga earthquake drills ay hindi lamang para sa pagtakbo at palabas ng gusali, ito rin ay pagkakataon upang ipaalam sa mga manggagawa ang kanilang karapatang tumangging magtrabaho sa delikadong lugar. 

Hindi sapat ang minsan sa isang taon lang na pagsasanay nito, kailangan itong gawing regular o bahagi ng ating pang-araw-araw na kamalayan. Habang ang mga manggagawa ay dapat na palagiang lumahok sa mga earthquake drills. Isagawa rin natin ito sa mga iskul upang maging habit o makagawian ng mga mag-aaral at guro. 

Kailangan din nating palakasin ang disaster preparedness sa Metro Manila lalo na’t naiuulat na posibleng tamaan ng “The Big One.” At dapat na tiyaking handa ang mga lokal na pamahalaan sa mabilisang pagtugon ukol dito. 

Bawat isa ay may ambag sa pagliligtas ng sarili gayundin sa iba. Isipin natin na ang lindol ay hindi lang pagsubok kung gaano katibay ang ating mga gusali at istruktura, ito rin ay hamon sa katatagan ng ating pagkatao. Sa bawat pagyanig, dapat kasabay din nating pairalin ang ating disiplina, malasakit, at pagkakaisa. Alalahanin din sana natin na mas mainam na laging maging handa upang hindi tayo nagbibigla.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Cong. Barzaga, oks lang yata na matanggal sa pagka-kongresista, mas enjoy na umeepal sa socmed

ni Pablo Hernandez @Prangkahan | October 14, 2025

MAS IN-ENJOY YATA NI CONG. BARZAGA ANG UMEPAL SA SOCIAL MEDIA KAYA OKS LANG SA KANYANG MATANGGAL SA PAGIGING KONGRESISTA -- Sa kabila na may kinakaharap na siyang ethics complaint sa House of Representatives patungkol sa mga post niya sa social media na may kaugnayan sa panawagan sa mamamayan na mag-aklas laban sa gobyerno at lusubin ang Forbes Park, ay hindi pa rin tumigil si Cavite 4th District Rep. Kiko Barzaga sa pagpu-post na panawagang mag-alsa ang taumbayan laban sa pamahalaan.

Alam ni Cong. Barzaga ang kahihinatnan ng kanyang mga ginagawa na maaaring matanggal siya sa pagka-kongresista at tila tanggap niya ito dahil sa ipinakikita niya sa publiko ay masasabing mas nag-e-enjoy siyang umepal sa social media kaysa paglingkuran ang mga kababayan niya na nagluklok sa kanya para maging kinatawan ng 4th district ng Cavite sa Kamara, tsk!

XXX

MAY MGA TAGA-COA NA ‘BANTAY-SALAKAY’ SA PERA NG BAYAN -- Sa mga nagdaang hearing ng Senate Blue Ribbon Committee at House Infrastructure Committee ay lumalabas na may mga taga-Commission on Audit (COA) na sangkot din sa flood control projects scam, kasi nga mandato nila ay bantayan ang kaban ng bayan, na ‘ika nga kapag idineklara ng Dept. of Public Works and Highways (DPWH) at kontraktor na completed na ang mga proyekto ay dapat sinusuri at in-audit ito ng COA kung nagamit sa tama ang pera ng bayan, pero ang masaklap, naging bulag, pipi at bingi ang mga taga-COA sa mga ghost, substandard at unfinished flood control projects.

Ibig sabihin, sa COA ay mayroon ding mga bantay-salakay sa pera ng bayan, boom!

XXX

PABIDA LANG YATA NI SEN. CAYETANO NA MAUUNANG MAG-RESIGN, HANGGANG NGAYON HINDI PA RIN SIYA NAGBIBITIW -- Dahil ang paniwala ni Sen. Alan Cayetano na nawala na ang tiwala ng mamamayan sa gobyerno ay nanawagan siya sa lahat ng elected officials mula presidente, bise presidente, mga senador at kongresista na sabay-sabay silang mag-resign at saka magdaos ng snap election, at nang walang pumatol sa kanyang hamon ay muli siyang nanawagan na mag-resign lahat at handa raw siya na unang mag-resign basta may assurance na kapag nag-resign na siya ay susunod ng magre-resign ang lahat ng high ranking elected officials.

Pagkaraan ng sinabing iyan ni Sen. Cayetano ay inaabangan ng publiko ang pagre-resign niya, pero hanggang ngayon hindi pa rin siya nagbibitiw, at dahil diyan ay lumalabas ngayon na pabida lang pala niya ang panawagan niyang resign all, tsk!

XXX

MGA NAGING SPEAKERS SA PANAHON NG DUTERTE ADMIN NA SINA ALVAREZ, ARROYO, CAYETANO AT VELASCO, TILA IIMBESTIGAHAN DIN NG ICI -- Matapos sabihin ni Senate Pres. Tito Sotto na sa panahon ng Duterte administration naganap ang malalaking anomalya sa flood control projects, ay sinundan ito ng statement ni Independent Commission for Infrastructure (ICI) Executive Director Brian Hosaka na mula year 2016 hanggang 2025 ang mga ghost project na natuklasan ni DPWH Sec. Vince Dizon.

Hindi naman natin sinasabing sangkot sa katiwalian ang apat na naging speaker ng House mula 2016 hanggang 2022 na sina former Speakers Pantaleon Alvarez, Gloria Arroyo, Peter Alan Cayetano at Lord Alan Velasco, pero malamang imbestigahan din sila ng ICI dahil sila ang mga namuno sa pagbalangkas ng yearly national budgets sa panahon ng Duterte administration, boom!

BOC, ‘pinaka-corrupt’ na gov’t agency, direktang tukoy ng grupo ng US traders

ni Ka Ambo @Bistado | October 14, 2025

Itinalaga nang Ombudsman si ex-DOJ Secretary Crispin Remulla.

He-he-he.

----$$$--

NAGBAGONG bigla ang impresyon sa Ombudsman.

Isang constitutional body ang Office of the Ombudsman.

Huwag muna natin siyang husgahan.

----$$$--

ISANG malaking hamon kay Remulla ang posisyong ito upang maisalba ang Republika ng Pilipinas.

Magiging barometro ang Ombudsman — kung makakarekober ang gobyerno, dili kaya’y tuluyang guguho ang Marcos II administration.

----$$$--

KAPAG kinasuhan, naaresto at naipakulong ni Remulla ang mga bigfish, aba’y makakaiskor si PBBM.

Kahit papaano, makaaamot ng tiwala mula sa publiko.

----$$$--

PERO kapag kinunsinte o obvious na pinagtatakpan o inililihis ang imbestigasyon — imbes na makatulong, mapapabilis ang pagguho ng liderato ni PBBM.

Malinaw na hindi lang mga ordinaryong sibilyan ang nagmamanman, bagkus ay maging ang puwersa ng military at pulisya.

----$$$--

SA aktuwal, hindi maiaalis, ay nangengelam na rin ang mga dayuhan — partikular ang United States, China at Europe.

May mga “financial at political interest” din kasi o investment sa Pilipinas ang malalaking bansa kaya’t iiwas ang mga ito na madamay sa kaguluhan.

----$$$--

ISANG grupo ng American businessmen ang nagpahiwatig ng pagkabahala sa isyu ng talamak na corruption sa bansa — lalo na ang kumbersiyon ng “foreign loan” proceeds tungo sa “unprogrammed fund” na kasama sa sources ng mga kaduda-dudang proyekto.

Binawi na rin ng isang Korean entity ang investment sa Pilipinas.

----$$$--

DIREKTANG tinukoy ng isang grupo ng American traders ang Bureau of Customs bilang ‘pinaka-corrupt’ na ahensya ng gobyerno.

Kakambal na ng Republika ng Pilipinas ang garapalang operasyon ng mga pusakal na ismagler sa Aduana.

----$$$--

SORPRESA, biglang pinalitan ang ambassador ng US sa Pilipinas.

Ang bagong ambassador ay hindi isang “career officer”, bagkus ay isang beteranong negosyante at mas posible — isang “political officer”.

-----$$$---

MALINAW na higit na malaking bulto ng salapi ang nananakaw ng mga ismagler kaysa sa gabundok ng bulto ng cash na kinukulimbat sa DPWH.

Matagal nang pinag-aagawan ang poder sa Aduana, DPWH at maging sa mga congressional committee ng public works and infrastructure.

Iyan ay dahil sa SOP at kaugnay nitong modus sa pangungurakot!

----$$$--

HINDI naman makakaila ang “SOP” — sa lahat ng transaction sa gobyerno — hindi naman kailangan ang ebidensya r’yan.

Hindi nagkakasya sa 5-8-10 percent SOP ang mga signatories sa kontrata at transactions — ginagawa pang substandard, overpriced, at ghost delivery at ghost projects ang diskarte.

-----$$$--

SA totoo lang, imbes na solohin ng Ombudsman ang halos ‘suntok sa buwan’ na imbestigasyon, dapat ay pangunahan nito ang “composite team” na lalahukan din ng COA at Civil Service Commission.

Tututok ang Ombudsman sa teknikalidad ng batas, itotoka ang COA sa proseso at modus operandi sa accounting system at didisiplinahin ng CSC ang mga tiwaling opisyal at rank-and-file na sangkot sa katiwalian.

----$$$--

MALAYA ang Ombudsman, COA at CSC mula sa pagdidikta at impluwensya ng Malacañang at Kongreso dahil sila ang mga constitutional body.

Sa totoo lang, ang composite team ay dapat iorganisa at iistruktura — across all department -- at antas ng pamahalaan: national, regional, provincial, city at municipality.

----$$$--

HINDI kailangan ang bagong buwis tulad ng sin tax at VAT, bagkus ay ang pagbabantay sa pondo ng bayan — gamit ang composite team mula sa mga constitutional body.

Ang probisyon sa Konstitusyon — ay sapat nang bantay sa corruption, pero paralisado ito dahil sa “super-executive” at “super-legislative” functions sa ating burukrasya.

----$$$--

ANG talamak na kutsabahan — ng super-executive at super-legislative ang sumasapaw kaya’t napaparalisado ang hudikatura — lalo na ang mga constitutional body.

Perfect ang Konstitusyon pero hindi perpekto ang kanyang implementasyon.

----$$$--

HINDI dapat na labanan nang basta-basta ang corruption, bagkus ay dapat idepensa ang Konstitusyon — at ipatupad ito gamit ang “kamay na bakal”.

Kung paano ito gagawin at sino ang magpapatupad laban sa mga abusadong ehekutibo at lehislatura -- ay isang malaking tanong — na nag-antay ng kasagutan.

Tama o mali?

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.