Anti-Online Sexual Abuse or Exploitation of Children (OSAEC)

ni Atty. Persida Rueda-Acosta @Magtanong Kay Attorney | October 16, 2025

Dear Chief Acosta,

Ang mga magulang ni AAA, hindi niya tunay na pangalan, na isang menor-de-edad, ay nagsampa ng kaso laban kay BBB dahil sa online na pang-aabuso o pananamantala, o paglabag sa tinatawag na Anti-Online Sexual Abuse or Exploitation of Children (OSAEC). 

Kalaunan, ang mga magulang ni AAA ay gumawa ng affidavit of desistance kapalit ng halagang Php100,000.00 na ibinayad umano ni BBB. May bisa ba ang affidavit of desistance na ito at magdudulot ba ito ng agarang pagbasura ng kaso? -- R. Kafka

---

Dear R. Kafka, 

Ang iyong katanungan ay binigyang kasagutan ng Republic Act (R.A.) No. 11930, o mas kilala sa tawag na “The Anti-Online Sexual Abuse or Exploitation of Children (OSAEC) and Anti-Child Sexual Abuse or Exploitation Materials (CSAEM) Act.” Espesipiko, ang ika-25 ng Seksyon ng nasabing batas ay naglalahad:

 “Section 25. Affidavit of Desistance. — Cases involving OSAEC and CSAEM shall not be dismissed based on the affidavit of desistance executed by the victims or their parents or legal guardians. Public and private prosecutors are directed to vigorously oppose and manifest objections to motions for dismissal. Any act that unduly pressures the complainant to execute an affidavit of desistance shall be punishable under this Act.” 

Kaugnay sa nabanggit na probisyon ng batas, ang mga kasong patungkol sa online na pang-aabuso o pananamantala, o may kaugnayan sa online sexual abuse or exploitation of children (OSAEC) at child sexual abuse or exploitation materials (CSAEM) ay hindi maaaring ibasura batay lamang sa affidavit of desistance na isinagawa ng biktima o ng kanyang mga magulang o legal na tagapangalaga.

Ang mga pampubliko at pribadong tagausig ay inatasang tutulan at ipahayag ang kanilang pagtutol sa anumang mosyon na humihiling ng pagbasura ng kaso batay sa affidavit of desistance.

Anumang gawaing pananakot, pamimilit, o paghihikayat sa biktima upang gumawa ng affidavit of desistance ay mapaparusahan alinsunod sa nabanggit na batas.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Ayuda, ibigay sa mga kuwalipikadong benepisyaryong magsasaka

ni Kuya Win Gatchalian @Win Tayong Lahat | October 16, 2025

Sa isinagawang pagdinig ng Department of Agriculture (DA) at mga kalakip nitong ahensya, pinuna ng inyong lingkod na hindi kuwalipikado ang 58,000 na mga naitalang benepisyaryo ng Rice Farmers Financial Assistance (RFFA).Batay ito sa ulat ng Commission on Audit (COA) para sa taong 2024. Ayon sa komisyon, hindi mga magsasaka ang mga benepisyaryong ito mula sa pitong rehiyon. Dagdag pa ng komisyon, hindi rin sila rehistrado sa Registry System for Basic Sectors in Agriculture (RSBSA). Laman ng RSBSA ang impormasyon mula sa mga magsasaka, farm laborers, mga mangingisda, at agri-youth. Nagsisilbi itong mekanismo para sa pagtatarget ng mga programa at serbisyo ng mga programa kagaya ng RFFA.

Nakakabahala ito lalo na’t layon ng RFFA na bigyan ng tulong pinansyal ang ating mga maliliit na magsasaka. Batay sa ating pagsusuri, katumbas ng P293 milyon ang halagang ipinamahagi sa 58,000 na mga benepisyaryong hindi naman kuwalipikadong maging bahagi ng programa. Kung naipamahagi lamang sana ng tama ang naturang halaga, humigit-kumulang 58,000 na mga magsasaka sana ang natulungan natin. Sa halip, P293 milyon ang nasayang.

Marami tayong tulong na ipinapaabot sa ating mga magsasaka para sa krudo, fertilizer, seedlings, conditional cash transfer, crop insurance, at iba pa. Ngunit ang hamon sa atin ngayon ay kung paano natin matitiyak na nakakarating ang mga tulong na ito sa mga magsasakang higit na nangangailangan sa kanila.

Kaya naman sa ating naging talakayan kasama ang DA, binigyang-diin natin kung gaano kahalaga ang RSBSA. Iminungkahi natin ang pakikipagtulungan sa Philippine Statistics Authority (PSA) upang matiyak na wasto ang ating datos. 

Sa ginawa nating pagdinig, pinuna rin ng inyong lingkod na hindi tugma ang datos ng RSBSA at ng PSA. Kung merong 13.5 milyon na mga magsasaka sa RSBSA, meron namang 7.4 milyon sa 2022 Census of Agriculture and Fisheries. Para sa inyong lingkod, hindi lang dapat irehistro ang mga magsasakang benepisyaryo sa RSBSA. Kailangang tiyakin din natin na ang datos sa RSBSA ay nakaugnay din sa ating National ID.

Kaya sa gagawing talakayan ng panukalang pondo ng DA sa plenaryo, aasahan natin na may mga tiyak na hakbang silang gagawin upang tugunan ang isyung ito.

Sa ating mga kababayan, patuloy nating tutukan ang mga talakayan sa panukalang 2026 national budget. Maaari ninyong isumite sa Budget Transparency Portal ng Senado ang inyong mga pagsusuri at mga panukala. Pakikinggan namin ang mga ito upang matiyak natin na magagamit sa tama ang buwis na ating binabayaran.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Pangarap na libre at dekalidad na WIFI connection, matutupad na

ni Leonida Sison @Boses | October 16, 2025

Good news para sa lahat ng mag-aaral at mga guro sa buong bansa. 

Ngayong nagiging moderno na ang bagong lengguwahe ng ating edukasyon, hindi na lang chalk at pisara ang kailangan sa pag-aaral, sinasabayan na ito ng mabilis at epektibong paraan para makapaghatid ng kaalaman sa bawat mag-aaral. 

Kaya naman ang paglalaan ng pamahalaan ng P3 bilyon para sa pagpapabilis ng digital connectivity sa mga pampublikong paaralan ay hindi lang simpleng proyekto, ito ay hakbang patungo sa magandang na kinabukasan para sa bawat batang Pinoy. 

Sa panahong ang kaalaman ay laganap na sa internet, ang bawat signal tower ay tila tulay para sa mabilis at epektibong pagkatuto. 

Ayon kay Budget Secretary Amenah Pangandaman, kalahati ng pondo na P1.5 bilyon ay inilaan sa Department of Education (DepEd) para sa Connectivity Enhancement Program for E-Learning, na target ang mahigit 8,200 last-mile schools sa buong bansa.

Ang isa pang P1.5 bilyon ay para naman sa Department of Information and Communications Technology (DICT) upang palakasin ang Free Public Internet Access Program. 

Binigyang-diin ni Pangandaman, na dati ay pangarap lang ang matatag na internet sa mga liblib na lugar, pero ngayon ay unti-unti na itong nagiging realidad sa bawat mag-aaral. Sa ilalim ng 2025 national budget, ang mga regional office ng DICT ang mangunguna sa pagpapatupad, gamit ang listahan ng DepEd ng mga paaralang tatanggap ng koneksyon. Target ng pamahalaan na bago matapos ang 2025 ay 100% connected na ang lahat ng iskul sa bansa. 

Dagdag ng kalihim, dapat ang bawat kabataang Pinoy, mula sa mga lungsod hanggang sa malalayong isla ay magkaroon ng patas na pagkakataon para sa dekalidad na edukasyon. 

Isang pahayag ito na hindi lang teknikal, kundi makatao rin. Sapagkat sa likod ng mga antena at router, ang tunay na layunin ay ang pagbibigay daan sa pangarap ng bawat mag-aaral. 

Kung dati’y mahinang signal ang hadlang sa pag-aaral, ngayon ay malakas na koneksyon na para mapabuti ang kanilang mga aralin. 

Higit sa lahat, ang proyektong ito ay naghahatid ng pagkilala na ang edukasyon ay hindi na nakabatay sa kung saan ka sa bansa dahil ang pag-asa ay sa pagkakaroon ng WiFi, kahit sa bundok o dalampasigan man.

Ngayong lahat ng impormasyon ay nasa internet na, nararapat lang na tayo ay mag-invest para sa mga kabataan. Tama lang na bigyan ng pansin ang problema ng mga pampublikong paaralan sa kung paano makakasabay ang bawat mag-aaral sa bilis ng teknolohiya. 

Ang pagkakaroon ng libre at dekalidad na WiFi connection ay isang malaking ginhawa para sa mga guro, mga magulang at sa mga batang nangangarap.

Gayundin, ang naturang programang ay hindi lang tungkol sa internet, ito’y koneksyon ng gobyerno sa bawat mamamayan, at pagbibigay sa lahat ng mag-aaral ng magandang kinabukasan. 

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com