Dapat mag-rally din sa tapat ng ICI, baka sakaling isapubliko ang imbestigasyon sa flood control scam

ni Pablo Hernandez @Prangkahan | October 19, 2025

KAPAG TINOTOO NG LIDERATO NG AFP NA TANGGALAN NG PENSYON ANG MGA RETIRED MILITARY OFFICIALS, LALONG TITINDI ANG GALIT NILA KAY PBBM -- Pinag-aaralan daw ngayon ng liderato ng Armed Forces of the Philippines (AFP) na i-revoke o kanselahin ang pension ng mga retired military officials na nangungimbinse sa mga active junior and senior military officials na mag-aklas o mag-withdraw ng support kay Pres. Bongbong Marcos (PBBM).

Naku, eh kapag tinotoo na tanggalan sila ng pension ay asahan nang lalong titindi ang galit ng mga retired military kay PBBM, boom!

XXX

LALONG MAGAGALIT SA MARCOS ADMN ANG TAUMBAYAN KAPAG GINAWANG STATE WITNESS SI ROMUALDEZ -- Itinanggi ng Dept. of Justice (DOJ) na kinokonsidera nilang state witness si Leyte Rep. Martin Romualdez sa flood control projects scam dahil hindi naman daw nag-a-apply ang dating House speaker na magpasailalim sa Witness Protection Program (WPP).

Kahit pa mag-apply sa WPP ay hindi dapat gawing state witness si Romualdez dahil kapag ginawa nila iyan, tiyak mas lalong magagalit sa Marcos administration ang taumbayan, period!

XXX

PARA MATIGIL NA ANG ANTI-CORRUPTION RALLY, DAPAT BILISAN NG ICI ANG IMBESTIGASYON UPANG MAPANAGOT NA ANG MGA SANGKOT SA FLOOD CONTROL PROJECTS SCAM -- Matapos maglunsad ng anti-corruption protest ang mga Duterte Diehard Supporters (DDS) noong October 12, 2025, ay sinundan ito kamakalawa (October 17) ng anti-corruption rally ng mga kabataang estudyante, at sa statement naman ng mga civil society groups at iba pang cause-oriented groups ay linggo-linggo na raw silang magsasagawa ng anti-corruption rally hangga’t hindi napapanagot ang mga sangkot sa flood control projects scam.

Aba’y dapat nang atasan ni PBBM ang Independent Commission for Infrastructure (ICI) na bilis-bilisan ang pag-iimbestiga upang mapanagot na ang lahat ng mga dawit sa anomalya para matigil na ang anti-corruption rally, kasi kung babagal-bagal at laging may magaganap na protesta laban sa katiwalian ay may malaking epekto iyan sa ekonomiya ng bansa dahil iisipin ng international community na sobrang lala na ang corruption sa ‘Pinas kasi weekly ay may nagsasagawa ng rally laban sa mga ‘buwaya’ sa pamahalaan, boom!

XXX

DAPAT MAY MAG-RALLY DIN SA TAPAT NG TANGGAPAN NG ICI AT BAKA SAKALI MAOBLIGANG ISAPUBLIKO ANG IMBESTIGASYON NILA SA MGA SANGKOT SA FLOOD CONTROL PROJECTS SCAM --Dapat sa susunod na may gagawing anti-corruption rally ang iba’t ibang sektor ng lipunan ay sa harap ng tanggapan ng ICI sila magsagawa ng protesta.

Kapag d’yan (ICI) nila ginawa ang anti-corruption rally ay baka maobliga na ang ICI na isapubliko ang ginagawa nilang hearing sa flood control projects scam, period!

Walang lockdown na magaganap, iwasan ang fake news

ni Leonida Sison @Boses | October 19, 2025

Panahon na naman ng taglamig na kung saan maraming sakit ang puwedeng kumalat at dumapo sa ating katawan. Pero, mas nakakabahala ang mabilis pang pagkalat ng fake news kaysa sa virus, lalo na kapag ubo’t sipon na ang nasasangkot.

Kaya tama lang ang ginawa ng Department of Health (DOH) na tanggalin o pawiin agad ang takot ng taumbayan na walang mangyayaring lockdown. 

Hindi lahat ng may trangkaso ay dapat katakutan, at hindi rin lahat ng nakikita online ay dapat paniwalaan. Sa halip na matakot, kalmahin muna ang sarili at alamin ang katotohanan. Mismong si DOH Secretary Ted Herbosa na ang nagsabing fake news ang kumakalat na lockdown announcement. 

Paliwanag niya, hindi ito flu outbreak kundi bahagi lamang ng karaniwang Influenza-like illness (ILI) season, ang panahong dumarami ang mga may ubo, sipon, at trangkaso tuwing tag-ulan. Giit ni Herbosa, wala tayong ‘outbreak from a single virus’, kaya walang dahilan para magdeklara ng lockdown. 

Batay sa datos ng DOH, umabot sa 133,000 ang kaso ng ILI nitong Setyembre ngayong taon, mas mababa pa sa 155,000 kaso sa parehong buwan noong 2024. Ibig sabihin, wala namang hindi pangkaraniwan sa sitwasyon, at kontrolado pa rin ito ng mga health authorities. 

Gayunman, dahil mabilis pa ring makahawa ang mga sakit na ito, pinaalalahanan ni Herbosa ang publiko na magsuot ng mask at manatili sa bahay sakaling may nararamdamang sintomas. 

Maraming paaralan na rin ang nagsuspinde ng face-to-face classes bilang pag-iingat, lalo na’t sinabayan pa ito ng banta ng lindol sa ilang bahagi ng Metro Manila. 

Sa ganitong sitwasyon, mahalaga na makiisa ang publiko sa mga health advisories upang maiwasan ang mas malaking problema. Sa halip na matakot, dapat ay maging responsable at maalam. 

Ang lockdown mindset ay dapat na ring iwan sa kasaysayan ng COVID-19 pandemic. Hindi lahat ng lagnat ay ituturing na delubyo, at hindi lahat ng balitang kumakalat online ay totoo. Minsan, mas mabilis pang makahawa ang takot kaysa sa mismong virus. 

Kung tutuusin, maganda ang ginagawa ng kagawaran na pagpapaalala na maging kalmado lamang ang publiko. Sa panahon ng tag-ulan kasunod ay sakit, disiplina at malasakit pa rin ang pinakamabisang bakuna o antidote. 

Kung matututo tayong makinig sa tamang impormasyon, makikiisa sa mga alituntunin para sa kalusugan, at hindi basta-basta maniniwala sa social media, mas madali nating malalampasan ang mabibigat na hamon o sitwasyon. 

Gayundin, kapag may sapat na kaalaman, kooperasyon, at kumpiyansa sa sistema ng kalusugan, hinding-hindi tayo malilinlang at lalong hindi magpa-panic. 

Sa ganitong panahon, hindi tamang pairalin ang takot, bagkus maging kalmado, linawan ang pag-iisip at magtiwala tayo sa Maykapal.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Serbisyo-publiko, ‘nababoy’ na nang todo dahil sa kapabayaan!

ni Ka Ambo @Bistado | October 18, 2025

Malilinaw ang mga ebidensya ng katiwalian sa DPWH, DepEd, DOH at maging sa Bureau of Customs.

Kahit ang mga transaksyon sa AFP, PNP, Department of Agriculture, DSWD, Department of Energy, DENR, BIR, LTO, LTFRB at iba pang kagawaran — ay nangangailangan ng ibayong imbestigasyon.

-----$$$--

ACROSS-ALL-DEPARTMENT ang katiwalian — at siyempre, hindi nakaligtas ang lehislatura — at of-course — ang Malacanang.

Ngayon lang ba nagaganap ‘yan?

Hindi po, kakambal na iyan ng burukrasya.

---$$$--

SA totoo lang, hindi makakaiwas mismo ang Duterte administration sa kaliwa’t kanang alingasngas.

Pero, dapat nating maunawaan — na ganyan din ang sitwasyon sa PNoy administration na nakilala ang DAP; at maging sa PGMA administration na nakilala ang PDAF, CDF at ZTE deal.

----$$$--

ANG administrasyong Erap ay gumuho dahil sa katiwalian pero ang Ramos administration ay sinisisi rin sa malawakang bentahan ng government assets gaya ng military bases at Manila Bay reclamation area na kinaroroonan ng MOA at Ayalas, at iba pa.

Lalong hindi makakaligtas ang Tita Cory administration sa malawakang sikwatan dahil sa “transition period” mula sa Marcos Sr. administration.

-----$$$--

INIYAYABANG na batbat ng corruption ang administrasyong Marcos Sr. — at tanging solusyon umano — ay magpalit ng gobyerno.

Matagal nang wala sa poder si Marcos Sr., pero hindi naresolba ang katiwalian — bagkus ay naging grabe pa ngayon, nang todo at LANTARANG pandarambong gamit ang amendment, insertion at unprogrammed fund sa annual budget.

----$$$---

WALANG silbi ang mga constitutional bodies na naatasang magbantay sa maayos na

pangangasiwa sa gobyerno.

‘Promotor’ dito at ‘kunsintidor’ ang COA, Ombudsman at Civil Service Commission.

----$$$--

NAKIKIPAGKUTSABA siguro ang mga auditor at mas malamang ay kaparte sa kulimbat.

Iyan din ang alegasyon sa Ombudsman na pinagbibintangan ding kunsintidor.

----$$$--

TAMAD naman, hindi kuwalipikado at iresponsable ang CSC dahil walang kakayahan itong iangat ang kalidad ng serbisyo sa hanay ng mga career executive at maging mga rank-and-file.

Batbat ng corruption sa lahat ng antas ng burukrasya — national, regional, provincial, city, municipality hanggang sa barangay.

----$$$--

Tumatakas at iresponsable ang CSC sa kanilang trabaho dahil mistulang “tamemeng ahensya” ito na simpleng administratibo lang ang ginagawa — imbes na serye ng mga programang magmumulat sa career executive at rank-and-file na iangat ang kalidad ng serbisyo-publiko.

‘Nababoy’ na nang todo ang serbisyo-publiko — at dapat sisihin dito ang CSC — dahil sa kapabayaan!

---$$$--

NAKAPAGTATAKANG sa serye ng mga pagdinig sa Kongreso kaugnay ng garapalang katiwalian sa burukrasya — hindi naririnig ang opinyon, panig at komento ng CSC.

Ibig sabihin, “walang patol” ang CSC — na isang kahihiyan at kamangmangan sa larangan ng lehislatura.

-----$$$--

PAANO mababago ang serbisyo-publiko nang hindi isasali sa usapan ang CSC?

Hindi ba’t sandamukal na kabulastugan ‘yan sa larangan ng public administration?

Iyan mismo ang ugat at dahilan kung bakit patuloy ang kapalpakan sa ating pamahalaan — katamaran at kamangmangan!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.