May napipinto na ring bangayan ng pro-Duterte retired generals vs. pro-Marcos retired generals

ni Pablo Hernandez @Prangkahan | October 22, 2025

MGA TRAPO, POLITICAL FAMILY AT ‘CONGTRACTOR’ MAGKAROON KAYA NG LAKAS NG LOOB ISAPUBLIKO ANG KANILANG MGA SALN? -- Nagkusa nang isapubliko ng mga kongresista mula sa mga partylist na Makabayan bloc at Akbayan ang kanilang mga Statement of Assets, Liabilities and Net Worth (SALN) na kanilang ipinost sa social media.

Importanteng nalalaman ng publiko ang laman ng mga SALN ng mga pulitiko, opisyal at tauhan ng pamahalaan dahil sa pamamagitan niyan ay malalaman kung ang mga taong-gobyerno ay may unexplained wealth o hindi maipaliwanag na yaman, ill-gotten wealth o ninakaw sa kaban ng bayan, at hidden wealth o tagong yaman.

Alam ng mga partylist representative na wala silang unexplained wealth, ill-gotten wealth o hidden wealth kaya malakas ang loob nilang isapubliko ang kanilang mga SALN.

Kaya’t ang tanong: Ang mga trapo (traditional politicians), political (dynasty) politicians at mga ‘congtractors’ (mga kongresistang kontraktor), magkaroon din kaya ng lakas ng loob na isapubliko sa social media ang kanilang mga SALN? Abangan!

XXX

KUNG MAY BANGAYANG DDS VLOGGERS VS. MARCOS LOYALIST VLOGGERS, MAY NAPIPINTO NA RING BANGAYAN NG PRO-DUTERTE RETIRED GENERALS VS. PRO-MARCOS RETIRED GENERALS -- Nagpa-presscon si ret. Gen. Edilberto Adan ng Associations of General and Flag Officers (AGFO) at nagsabing suportado raw nila si Pres. Bongbong Marcos (PBBM) sa kampanya nito kontra-corruption, at hindi raw nila miyembro ang mga retired generals na nananawagan naman na mag-resign ang Presidente dahil sa talamak na corruption sa pamahalaan nito.

Kung dati mga Duterte Diehard Supporters (DDS) vloggers at Marcos loyalist vloggers lang ang nagbabangayan sa social media, heto tila may madadagdag na bangayan sa pagitan ng mga pro-Duterte retired generals at pro-Marcos retired generals, boom!

XXX

MGA SANGKOT SA FLOOD CONTROL PROJECTS SCAM MALAPIT NANG MARANASAN ANG “BUHAY-IMPIYERNO” SA CITY JAIL -- Ipinakita ni Sec. Jonvic Remulla ng Dept. of the Interior and Local Gov't. (DILG) ang ipinagawa niyang kulungan sa loob ng Quezon City Jail na aniya ay wala itong aircon, at wala raw silang tatratuhing very important persons (VIP) prisoners, na dito raw ikukulong ang lahat ng mga pulitiko, Dept. of Public Works and Highways (DPWH) officials at mga kontraktor na sangkot sa flood control projects scam.

Ayos, walang aircon, ibig sabihin niyan kung naranasan ng mga kurakot na mga magbuhay hari at reyna habang nasa laya sa pagnanakaw sa kaban ng bayan ay mararanasan na rin nila ang “buhay-impiyerno” sa loob ng city jail, abangan!

XXX

MAYOR MAGALONG NA LIDER NG MAYOR’S FOR GOOD GOVERNANCE PERO SA LUGAR NIYA SA BAGUIO CITY SANGKATUTAK ANG ILLEGAL GAMBLING -- Kung hindi kaya ni Baguio City chief of police Col. Ruel Tagel na i-raid at arestuhin sina alyas "Patrick" na may raket na mini-casino sa Legarda Bokawlan Streets at raket na color games at drop balls ni alyas "Nestor" sa Kayang Street, Baguio City, ay dapat irekomenda na ni Mayor Benjamin Magalong sa PNP-Cordillera Region na sibakin ito bilang hepe ng lungsod.

Sa totoo lang naman kasi ay bad sa paningin ng publiko na sa nasasakupan ni Mayor Magalong na siya pa namang lider ng Mayor’s for Good Governance (MGG) ay may sangkatutak na ilegal na pasugalan, period!

Good news sa mga motorista, one RFID lang, all tollways na

ni Leonida Sison @Boses | October 22, 2025

Matapos ang halos walong taong paghihintay, tuluyan nang natuldukan ang aberyang matagal nang inirereklamo ng mga motorista. Ang hiwa-hiwalay na RFID para sa iba’t ibang expressway. Sa inilunsad na proyekto ni Pangulong Ferdinand “Bongbong” Marcos, Jr. na “One RFID, All Tollways,” sapat na ngayon ang isang RFID sticker para makadaan sa lahat ng expressways sa Luzon — mula NLEX, SLEX, SCTEX, CAVITEX, CALAX, hanggang TPLEX at Skyway. Isinagawa ang programa sa pakikipagtulungan ng Department of Transportation (DOTr), Toll Regulatory Board (TRB), Metro Pacific Investments Corporation (MPIC) na may-ari ng Easytrip, at SMC Infrastructure na nagpapatakbo ng Autosweep. 

Sa wakas, ang dating pahirap na dalawang RFID system ay napalitan na ng interoperability, isang simpleng teknolohiyang may malaking epekto sa araw-araw na buhay ng bawat Pinoy. Ayon kay DOTr Acting Secretary Giovanni Lopez, walong taon ang ginugol bago maipatupad ang sistemang ito dahil sa mga teknikal at regulasyong kailangang talakayin. Dahil dito, tuluyan nang natupad ang pangarap na mula Norte hanggang Sur, at maginhawa na ang pagbiyahe. Maging ang chairman ng MPIC ay nagpahayag ng pagbati sa gobyerno na sa wakas ang proyektong matagal nilang hinintay ay natupad na. Ganito rin ang sentimyento ng SMC Infrastructure, na nagpahayag ng suporta sa bagong sistema at tiniyak ang seguridad at kadalian ng transaksyon. 

Nilinaw naman ni Lopez na hindi kasama sa mga rason ng pagtaas ng toll fees ang One RFID. Dahil ang layunin nito ay mas mapabilis ang daloy ng trapiko at mabawasan ang abala sa mga toll plaza, lalo na sa mga motorista na dati’y nag-aalangan kung alin sa dalawang RFID ang gagamitin.

 Ang hakbanging ito ay hindi lamang tungkol sa mas madali at mabilis na pagbiyahe, ito ay sumasalamin sa epektibong koordinasyon ng gobyerno at pribadong sektor. 

Sa panahon kung saan madalas sabihing mabagal ang ating pag-asenso, pinatunayan ng proyektong ito na kapag gusto, may paraan. 

Ang One RFID ay higit pa sa sticker na ikinakabit sa ating mga sasakyan, ito ay tanda ng pag-unlad, modernisasyon, at malasakit sa bawat mamamayan. Isa rin itong paalala na kapag nakikinig ang pamahalaan sa mga hinaing ng taumbayan, nagkakaroon ng direksyon ang bawat plano at nagbibigay daan sa ating bansa para sa tunay na pagkakaisa at pagbabago.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Dyornalismo, ‘di kailanman malalaos, nagbabago lang ng anyo

ni Ka Ambo @Bistado | October 21, 2025

May mga nagsasabi na nalipasan na raw ng panahon ang mainstream media dahil sa teknolohiya ng digital stream ng mga impormasyon.

Hindi ito ganoon katotoo.

Kinakapos lang ng pang-unawa ang lahat.

----$$$--

DAPAT nating maunawaan na ang dyornalismo ay hindi kailanman malalaos, nagbabago lang ito ng anyo.

Nang wala pang imprenta, inuukit lang sa dahon ng halaman, bato at kahoy ang mga impormasyon — at ito ang ugat ng dyornalismo.

----$$$--

NANG mauso ang imprenta, nilikom ang mga impormasyon at ginawang Bibliya.

Ang unang apat na aklat ng Bagong Tipan sa Banal na Kasulatan ay aktuwal na mainstream media: “Ang Mabuting Balita” o “The Good News”?

-----$$$--

SA Old Testament, aktuwal na dyornalist si Moses na siyang sumulat ng maraming aklat upang makaabot sa ating henerasyon ang mga sinaunang kaalaman.

Malalaos ba ang Bibliya?

Hindi. Kailanman!

----$$$-

HINDI kailanman, malalaos ang Bibliya, bagkus ito pa rin ang pinaka-best seller na aklat sa daigdig hanggang ngayon.

Maraming sekta, ideolohiya, Konstitusyon at gabay panglipunan — ay hinugot at kinopya mula sa pilosopiya at esensiya na napapaloob sa Banal na Kasulatan — na siyang orihinal na “mainstream media”.

----$$$--

SA radio at telebisyon naman ang imahe na nakikita ng mata at tunog na umaabot sa pandinig.

Iyan naman ang brodkasting na kakambal ng dyornalismo.

----$$$--

DATI-RATI ay hindi ka puwedeng makipagkonek nang wala kang hawak na papel at lapis, pero ngayon ay puwede na.

Hindi na uso ang papel at lapis, pero ito mismo ang pundasyon ng komunikasyon at orihinal na "gadgets" — na hindi kailanman malalaos.

-----$$$--

KINAKAPOS lamang ng pang-unawa o nabigong makasabay sa modernisasyon ang mga taong gumagalaw sa larangan ng pamamahayag.

Naging modern na ang teknolohiya, pero ang mga tao ay patuloy pa ring niyayakap ang kahon o padron na kanilang kinalakihan o nakasanayan.

----$$$--

WALA na, yumao at nagretiro; dili kaya’y kakaunti na lamang ang aktibong editor o news director na siyang tunay na may karanasan sa pamamahayag.

Nabigo sila na makasabay at hindi nailipat ang kanilang pambihirang kaalaman, kakayahan at diskarte sa mga kabataan.

-----$$$--

KAILANGAN pa ring mapagdugtong ang mayabong na karanasan at kasanayan ng mga batikang editor, pero walang nangangahas na pagsanibin ito sa modernong teknolohiya.

Bigo rin ang akademisyan na pagyabungin ang pamamahayag kung saan nagkakasya lang sila sa pagmamasid imbes na aktibong makilahok sa nagbabagong anyo ng dyornalismo.

----$$$--

SA totoo lang, kahit ang inyong abang-lingkod na may higit nang apat na dekada sa pamamahayag at serbisyo-publiko — ay nangangapa sa modernisasyon sa pamamahayag.

Sa kabila ng sagwil sa pag-unawa, sinisikap pa rin nating makisabay — o unahan ang ibang nagtatangka na babuyin ang dyornalismo — gamit ang palsipikadong mga impormasyon at iskema.

-----$$$--

LINGID sa kaalaman ng iba, marami pa rin ang suki at sumusubaybay sa tradisyunal na pamamahayag lalo na sa siyudad ng Pasay at lalawigan ng Bulacan na sumusubaybay sa pahayagang ito partikular sa ating espasyo.

Kabilang sa nanatiling suki ang mga may edad na at retiradong dentist na si Lola Rozalinda Baguyo, edad 86; at maging ang retiradong principal na si Lola Aurora Fronda – kapwa ng Barangay Villamor sa Pasay.

----$$$--

NAGTITIYAGANG bumili ng BULGAR newspaper sa newsstand ang dating dentist sa Philippine Air Force Hospital na si Lola Rozalinda at maging ang dating principal sa VABES na si Lola Auring — nananatiling suki sila ng mainstream media sa gitna ng modernong teknolohiya.

Bahagi ng kanilang araw-araw na buhay ang “content” ng ating pahayagan partikular ang opinyon sa ating kolum.

-----$$$--

GANYAN din sa lalawigan ng Bulacan, nananatiling suki ang mga Bulakenyo ng pundasyon at haligi ng Wikang Tagalog.

Hangga’t may nangungusap nang Tagalog — ang mayorya ng populasyon — hindi kailanman, malalaos ang mainstream media — maghuhunos lamang ito sa bagong anyo.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.