Nang pumanaw ang Superstar… JOHN RENDEZ, ‘DI NA UMUWI SA BAHAY NI NORA

ni Mercy Lejarde @Showbiz Talkies | Apr. 25, 2025

Photo: Nora Aunor at John Rendez - Nora Aunor National Artist

May kasabihan sa showbiz that goes… “The show must go on,” ke malungkot ka man, may problema, etc., etc..

Ngayong buwan ng April 2025 ay sobrang lungkot sa ating showbiz world dahil sa sunud-sunod na pagkamatay ng ilan sa ating mga singer icons na pinangunahan ni Ms. Pilita Corrales, then sumunod si Superstar-cum National Artist Nora Aunor, at pagkatapos ay ang isa pang kinilalang music icon na si Hajji Alejandro.

Si Nora Aunor, as fondly called Ate Guy ng halos karamihan, ang talagang shocked halos lahat sa atin nang ibalitang pumanaw ito last April 16, 2025.

Isa si yours truly sa mga pinalad na maging super close-cum family na rin sa ating Superstar na ang tawag ni yours truly ay ‘Bok, Ate Guy’ since dekada 70s noong mapunta ako sa Tower Productions nina Direk Temyong Marquez at Marivic Villanueva Marquez na parehong matagal na ring namayapa.

Unang pagkikita pa lang namin ay nagkasalubong kami. Siya, galing sa Tower Productions house at ako naman ay papunta sa nasabing lugar. Pagkakita niya kay yours truly ay bigla siyang huminto at tinanggal niya ang makapal niyang gintong kuwintas at sinabit sa leeg ko tapos ay nagyakapan kami. At ‘yun na ang simula ng aming special friendship with matching background music na may lyrics that goes... “Through the years, you never let me down, you turned my life around, the sweetest days I’ve

found... I’ve found with you through the years…”

Last Tuesday, April 22, 2025, ay inihatid na nga siya sa kanyang huling hantungan sa Libingan ng mga Bayani. Ang naiwan lang sa bahay na nirentahan niya ay ‘yung dalawang girlash na nagbantay sa kanya mula nang siya ay nagkasakit.

Si John Rendez daw ay hindi na umuwi sa nirentahang bahay ni Ate Guy simula nang yumao ang ating Superstar.

Sa mga huling araw ng chat namin ni Ate Guy sa Facebook (FB) ay tipong nagsabi siya ng mga katagang, “Nag-aayos na ako ng mga dapat ayusin.”

At lately ko lang na-realize na kasama pala ako sa gusto niyang ayusin dahil inalok niya ako ng trabaho na maging marketing arm ng Channel 13. Marahil ay gusto niya akong maging stable financially kaya gusto niya akong ipasok sa Marketing Department ng Channel 13.

Sobrang nakakaiyak at sobrang nakakalungkot ang pagpanaw ng isang Nora Aunor, sa true lang.

Gayunpaman, ang kanyang mga anak na sina Lotlot de Leon, Ian de Leon, Matet de Leon, Kiko de Leon at Kenneth ay naturuan niya ng magandang asal at magmahalan ang bawat isa.

Wish lang ni yours truly ay mabigyan ng more TV and movie projects ang lalaking nakasama niya for 33 years na walang iba kundi si John Rendez.

Naalala pa ni yours truly ang kuwento ni Ate Guy na nu’ng minsan daw na may tumutok ng baril sa kanya ay biglang iniharang ni John Rendez ang sarili at pumunta ito sa kanyang harapan para kung sakaling pumutok ang baril ay sa kanya tatama at hindi kay Ate Guy.

“‘Yan ang ‘di ko talaga malilimutan, Ate Mercy. Si John Rendez lang ang tanging lalaking handang mamatay para sa akin,” ang revelation ni Ate Guy kay yours truly….

Boom, ‘yun na!

Bukod kay John, ang mga nag-alaga kay Ate Guy ay sina Jen Donna Pergis Morera at Editha Gabiana na true blooded Noranians. Marami pong salamat sa pagmamahal at pag-aalaga n’yo kay Ate Guy.

Umalis na sina Jen Donna at Editha sa bahay ng Superstar. Wala nang nakatira ru’n kundi mga gamit na lang ni Guy. Si John Rendez naman ay nakauwi na sa Clark.

‘Niwey, sa lahat ng mga worldwide Noranians na nagmahal at nagmalasakit sa ating Superstar cum National Artist Ate Guy a.k.a. Nora Aunor tulad nina Mari Cusi, Robert

Ganon, Mercy Magsaysay, Jen Donna Pegris at sa iba pa, maraming-maraming salamat sa inyong lahat.

Yes, we all love you, we salute you and we will miss you so much, Bok Ate Guy and may your soul rest in the Kingdom of our heavenly Father Lord God Jesus Christ. Amen!

---

SAMANTALA, ibinigay na ni Freddie “FMG” Garcia ang kanyang Golden Buzzer sa FM Lightrix matapos siyang mamangha sa performance ng grupo na gumamit ng makukulay na LED strips sa kanilang high-tech na dance number sa Pilipinas Got Talent (PGT) Season 7 noong nakaraang Linggo (Abril 20).

Binigyan ng kakaibang ilaw ng Cebu-based group na FM Lightrix ang entablado ng PGT gamit ang LED costume design sa kanilang high-energy dance routine. Ibinahagi ng grupo na layunin nila na matulungan ang kanilang mga miyembro upang makapagtapos ng pag-aaral.

Pinuri nga ni FMG ang husay ng FM Lightrix sa paggamit ng ilaw at hinangaan ang kanilang dance sequence at kakaibang konsepto. Sa kanyang pagiging hurado sa loob ng pitong taon, ito raw ang unang beses na nakakita siya ng ganoong klaseng pagtatanghal.

Bukod dito, pinuri rin ni Donny Pangilinan ang kagustuhan ng FM Lightrix na makapagtapos ang kanilang mga miyembro sa pag-aaral. Nagpahayag naman ng paghanga sina Kathryn Bernardo at Eugene Domingo sa talento at nakakabilib na performance ng grupo.

Ang “Golden Buzzer” ay isang special privilege ng 4 na judges at hosts na nagbibigay sa kanila ng kapangyarihan na maghatid ng isang act diretso sa live semis. Isang Golden Buzzer lang ang puwedeng gamitin ng bawat judge at hosts sa buong auditions. 

Sa ngayon, tatlong Golden Buzzers na ang nakuha matapos gamitin ito nina Robi at Melai, Eugene, at FMG. Dalawang Golden Buzzers na lang ang puwedeng makuha ng auditionees.

Abangan ang iba pang nakakamanghang performances sa PGT Season 7 tuwing weekend, 7:15PM sa Kapamilya Channel, Kapamilya Online Live, at A2Z. Available rin ang programa sa nasabing timeslot sa TV5 tuwing Sabado at 7:45 PM naman tuwing Linggo.

Puso, delikado… ANAK NI NIKKI, MAY KAKAIBANG SAKIT

ni Mercy Lejarde @Showbiz Talkies | Apr. 16, 2025

Photo: Nikki Gil - IG

Nag-post sa social media ang singer na si Nikki Gil ng ilang photos kasama ang kanyang anak na si Maddie habang sila’y nasa hospital.  

And the following ay ang pahayag ni Nikki… “Maddie was diagnosed with Kawasaki Disease — something we had never even heard of. And seeing our little girl in pain, hooked to IVs, enduring tests and meds, was the hardest thing we’ve ever gone through as parents.

“But even in the scariest moments, God showed up—in the peace He gave, the people He sent, and the healing He allowed. We give Him all the glory for carrying us through and for Maddie’s recovery.

“We’re finally home with our brave girl, and while recovery continues, our hearts are filled with gratitude. God is so, so, so good.”

Ang Kawasaki disease ay isang sakit na karaniwang tumatama sa mga bata, kung saan namamaga ang mga daluyan ng dugo sa katawan, lalo na sa puso. Nagdudulot ito ng lagnat, rashes, at pamumula ng mata, labi, at balat. Kung hindi agad magagamot, puwedeng magdulot ng problema sa puso.

Samantala, marami ang nagpadala ng prayers para gumaling agad ang kanyang anak because God Jesus Christ is so good all the time. 

Amen!!!

---

‘NIWEY, dahil nalalapit na rin ang Mayo na buwan ng santacruzan ay ibabahagi namin sa inyo ang magaganap na santacruzan sa Binangonan Libid Rizal sa May 4, 2025. 

Taong 2019 nang magsimula ang patimpalak ng Reyna at Konsorte ng Santacruzan, isang makulay at bagong ideya na nagmula sa tagapamahala ng Brgy. Libid Grand Santacruzan mula pa noong 1975 sa pamumuno ni Mr. Gomer Celestial. 

Well, si Kapuso star Faith da Silva ang Reyna Elena na napakaganda.

Bakit nga ba Reyna at Konsorte ng Santacruzan ang naging titulo? Maaari  

namang Mr. and Miss Libid o Ginoo at Binibining Libid? Ngunit natatangi ang sagala o santacruzan ng Brgy. Libid sa buong bayan ng Binangonan. ‘Ika nga nila, “Barangay Libid is the home of the Grand Santacruzan of Binangonan.” Kaya minabuting gamitin ang titulong Reyna at Konsorte ng Santacruzan upang ito ay mamukod-tangi sa mga patimpalak ng mga karatig-barangay. 

Walang question and answer portion, bagkus ipapamalas lamang nila ang angking kagandahan at kaguwapuhan kasabay ng matatamis na ngiti sa kanilang paglilibot sa araw ng santacruzan. Irarampa nila ang mga naggagandahang Filipiniana gowns at barong na gawa ng mga kilalang local designers na pawang mga taga-Binangonan. At higit sa lahat, ipagmamalaki nila ang kanilang pangalan at pinagmulan.

Ngayong 2025 ang ika-50th anniversary ng Grand Santacruzan sa Libid bilang pagdiriwang at pagbibigay parangal sa Mahal na Krus.

Ang Meet the Press ay ginanap nu’ng Linggo (Abril 13) sa Cafe de Lawa Restaurant, Mahabang Parang, Binangonan, Rizal na pagmamay-ari ni Mr. Ivan Sta. Ana na isa rin sa major sponsors ng naturang pagdiriwang. Ipinresenta sa press ang 16 na pares ng mga Reyna at Konsorte ng Santacruzan. Punong-abala rin doon ang founder ng Pista ng Cruz Santacruzan na si Gomer Celestial at Direk Bobbit Patag.

Layunin ng selebrasyong ito ang  maipakilala ang mayaman at makulay na kultura, tradisyon, at turismo ng Barangay Libid at bayan ng Binangonan, Rizal.

Netizens, nayabangan… SUNSHINE AT ATONG, CHOPPER ANG SERVICE SA SABUNGAN

ni Mercy Lejarde @Showbiz Talkies | Apr. 6, 2025

Photo: Atong Ang at Sunshine - Circulated

Sa isang Facebook (FB) account ay nabasa namin na magkasamang dumating ang magdyowang Sunshine Cruz at Atong Ang sa isang sabungan at inihatid sila ng helicopter.  

Pagbaba nga ng chopper, sinalubong sila ng kanilang mga supporters sabay inalalayan papaloob ng sabungan.  

Pero mas maraming netizens ang pumalag kasi tipong ang yabang daw ng arrival nina Sunshine at Atong, gayung ang daming naghihirap na Pinoy na apektado ng nagdaang COVID-19 pandemic.  

Gayunpaman, meron din namang mga dumepensa sa magdyowa kasi siguro raw ay hindi naman intention ng dalawa ang mang-inggit ng kapwa nila dahil iyon na ang kanilang lifestyle.  

Oo nga naman. To each their own, ‘ika nga. 

Boom! ‘Yun na!  

---

ANG Kapamilya love team-partners na sina Kim Chiu at Paulo Avelino ay magkasamang pumunta sa ABS-CBN Ball 2025 nu’ng Friday sa Solaire Resort North.

Natanong sila kung ano ang pakiramdam sa pagpunta sa naturang event.

“Masaya siyempre. It’s a different feeling na nandito kami celebrating with our Kapamilya sa industry and siyempre with Pau,” sabi ni Kim Chiu na host din ng It’s Showtime (IS).

“Same sa tagline ng ABS-CBN - In the Service of the Filipino people. So we do our service by entertaining people and bringing smiles into people's homes. So maraming-maraming salamat po, mga Kapamilya,” ang nasabi naman ni Paulo Avelino.

Sina Paulo at Kim ang mga bida sa pelikulang My Love Will Make You Disappear (MLWMYD) na palabas pa rin sa mga sinehan.

“First we want to say thank you sa mga nanood not only here in the Philippines but also across the world. Nakikita namin sa mga social media namin. So we are happy and thankful for that overwhelming support. Sa mga hindi pa nakakapanood, panoorin n’yo. Nasa sinehan pa po s’ya,” saad ni Kim.

“Now on our second week,”  dagdag pa ni Paulo.

The 2025 ABS-CBN Ball, dubbed as Brighter Together (BT), celebrates the artists, employees, and industry partners who continue to shape ABS-CBN’s journey as a global storytelling company. 

It also champions greater cause as a portion of the proceeds will help support ABS-CBN Foundation’s advocacies.