May sign daw dahil nawala ang engagement ring… CHRISTIAN, SA HOTEL ROOM NILA NG GF NAG-PROPOSE NOON

ni Mercy Lejarde @Showbiz Talkies | May 8, 2025

Photo: Christian Bautista - IG

Ang saya ng kuwentuhan nina Boy Abunda, Christian Bautista at Kat Ramnani sa Fast Talk with Boy Abunda (FTWBA) last May 6 (Tuesday).

Ikinuwento ni Christian na inimbitahan niya noon si Kat na makipagkita sa kanya sa Greece dahil bahagi ito ng kanyang European tour.

“Funny story. Mayroong European tour na nangyari and then sabi ko sa kanya, ‘Mayroon akong European tour, magkita naman tayo sa Greece kasi nandu’n na ako, makakatipid tayo,’” ang ganda ng ngiting kuwento ng Asia’s Romantic Balladeer.

Ikinuwento rin ni Christian na naiwala niya ang engagement ring na kanya sanang

gagamitin para mag-propose sa noo’y nobya pa lamang na si Kat.

“So, pumunta s’ya doon. Itinago ko ‘yung engagement ring,” saad niya.

Sinabi ni Christian na habang nasa Europe, sinubukan niyang maghanap ng pinakamagandang lugar at moment para mag-propose, pero parang hindi ito umaayon sa kanyang plano.

Aniya, “I don’t know, hindi lumalabas, hindi ko ma-feel at that moment or spot, until mawala ‘yung engagement ring.

“Nawala ‘yung engagement ring kasi inilagay ko sa check-in baggage at ‘yung eroplano, ipinadala sa ibang bansa. So, parang nagtanong ako sa sarili ko na, ‘Is this a sign? What’s going on?' ‘Di ba? So, parang I was so, so distraught,” dagdag pa ni Christian.

Nakita naman ang bag at naibalik ito kay Christian.

“Thank God, after a few days, nahanap ‘yung bag, and then noong nakita ko ‘yung bag and ‘yung ring, I proposed that night,” sabi niya.

Natuloy din sa wakas ang proposal ni Christian kay Kat kahit simple at private lamang sa kanilang hotel room.

At ang kuwento naman ni Kat ay “He proposed to me in my pajamas na may butas-butas on our last night. So in all the beautiful spots in Europe, no. He just did it in the room, in private, in my Winnie the Pooh pajama with butas on it.”

Dagdag pa ni Christian na gusto niyang ipakita kay Kat na wala siyang kailangang iba sa kanyang proposal kundi si Kat lamang.

“Parang ipinakita ko rin sa kanya na I don’t need all of these sceneries. I just need you,” pagtatapos ng kuwento ni Christian.

---

BUONG-PUWERSA ang ABS-CBN News na magbabantay sa mga pangyayari sa araw ng midterm elections — bawat oras mula botohan hanggang bilangan — sa Halalan 2025 marathon coverage ngayong Mayo 12 hanggang Mayo 13 sa Kapamilya Channel, A2Z at ANC.

Ihahatid ng Halalan 2025 special coverage ang real-time updates, breaking news, at election analysis sa mga Pilipino saanman sa mundo sa ABS-CBN News at ANC 24/7 channel sa YouTube (YT) at sa iba pa nitong digital platforms sa Facebook (FB), X (dating Twitter), Instagram (IG) at TikTok (TT).

Mangunguna sa paghahatid ng mga pinakamaiinit na balita at pagsulong ng katotohanan ang ilan sa mga batikang mamamahayag sa bansa na sina Noli “Kabayan” de Castro, Karen Davila, Bernadette Sembrano, Alvin Elchico, Jeff Canoy, Zen Hernandez, Adrian Ayalin, Tony Velasquez, Karmina Constantino, Ron Cruz, at Rico Hizon.

Kasama rin sina TJ Manotoc, Stanley Palisada, Denice Dinsay, Michelle Ong at Migs Bustos.

Magpapatrol din ang ABS-CBN News reporters sa iba’t ibang sulok ng bansa para ihatid ang unang bugso ng mga resulta sa bilangan ng boto hanggang sa proklamasyon ng mga kandidato.

Nitong Enero, nakipagsanib-puwersa ang ABS-CBN News sa 30 ahensiya ng gobyerno, media partners, research agencies, poll watcher organizations at ilang unibersidad para sa Halalan 2025 coverage at panawagang malinis at tapat na eleksiyon.

Todo-thank you kay PBBM sa award ng madir… SIGAW NI LOTLOT: NORA, NATIONAL PRIDE

ni Mercy Lejarde @Showbiz Talkies | May 7, 2025

Photo: Lotlot De Leon - IG

Nag-post sa social media si Lotlot De Leon ng pasasalamat kay PBBM sa iginawad na Presidential Medal of Merit para sa ating Superstar and National Artist na si Nora Aunor. 

Ang mga sumusunod ang kanyang naging pahayag:

“Last May 4, our beloved National Artist, our mother, Ms. Nora Aunor, was once again given a prestigious honor—posthumously awarded the Presidential Medal of Merit by President Ferdinand “Bongbong” Marcos Jr., with the gracious presence and support of First Lady Liza Araneta Marcos.

“Our hearts are full. This recognition is more than an award—it is a powerful affirmation of the lasting legacy our mom has left behind. Her artistry, her voice, and her deep connection with the Filipino people have shaped our nation’s cultural identity. She was not just an actress or a singer—she was, and will always be, a symbol of excellence, resilience, and national pride.

“We extend our deepest gratitude to President Ferdinand “Bongbong” Marcos Jr. and First Lady Liza Araneta Marcos for this meaningful tribute.

“Their continued support for the arts and recognition of our mother’s extraordinary contributions ensure that her legacy will live on and inspire generations to come.

“Mommy our Superstar, our National Artist,

Ang Ina ng Sining ng Industriya ng Pilipino, thank you for everything. This honor is yet another shining jewel in the crown of your lifelong dedication to Philippine arts and culture.

“Again, to our President Bongbong Marcos Jr. and to our First Lady Liza Araneta Marcos, maraming maraming salamat po!

“Maraming salamat po sa lahat na patuloy na nagmamahal sa aming mommy lalo na sa lahat ng fans niya. Mabuhay po kayo at mabuhay ang alaala ni Nora Aunor, at mabuhay ang sining at kulturang Pilipino.”

Hindi lang si PBBM ang pinasalamatan ni Lotlot kundi lahat ng Noranians. At ang mga sumusunod ay ang simple pero wagas na pasasalamat niya.

“To all the NORANIANS, mula noon hanggang ngayon, hindi n’yo iniiwan si Mommy. Taos-puso at wagas na pasasalamat po sa inyo. Thank you po sa pagmamahal at suporta n’yo kay Mommy that you also have passed down to us her children.

“Mula sa aming magkakapatid, Ian, Matet, Kiko, Ken at sa akin at sa aming mga anak. Mahal po namin kayo! God bless all of you and thank you!”

Ikinasaya ng mga Noranians ang pasasalamat nilang magkakapatid at pinusuan ng mga netizens.

---

SAMANTALA, mala-rollercoaster ride na pag-ibig ang ibinahagi ng It’s Showtime (IS) host na si Cianne Dominguez sa debut extended play (EP) na Gumamellow.

Hango sa mga salitang gumamela at mellow ang titulo ng five-track mini album na sumasalamin sa feminine at sweet side ng musika ni Cianne.

Tampok dito ang tatlong bagong awitin na Gumamellow, Layag at Sikreto at ang singles na Traffic at Shot Puno na nauna na niyang ilunsad. Lahat ng kanta sa EP ay nagmula sa komposisyon at produksyon ni Teddy Corpuz.

Sa key track na Layag na naging bahagi ng Spotify Fresh Finds Philippines playlist, inilarawan ni Cianne ang nararamdamang pag-ibig bilang paglalayag sa gitna ng alon ng dagat kasama ang taong mahal.

Noong nakaraang taon, nagpakilala ang StarPop artist sa pamamagitan ng kanyang unang single na Traffic. Kasunod nito, inilabas niya nitong Pebrero ang Valentine’s offering na Shot Puno.

Bago nagsimula ang karera niya sa musika, naging grand finalist si Cianne sa Sexy Babe (SB) segment ng IS at tuluyan nang naging mainstay ng noontime show.

Kaya nagalit sa parents? XYRIEL, MAHIGIT 10 TAONG NAG-SHOWBIZ, WALANG IPON

ni Mercy Lejarde @Showbiz Talkies | May 6, 2025

Photo: Xyriel Manabat - IG

Sa Pinoy Big Brother Celebrity Collab Edition (PBBCE), muling napatunayan na hindi porke’t artista ay mapera na. 

Isa sa mga naging emosyonal na rebelasyon ay mula sa aktres na si Xyriel Manabat, na kilala sa kanyang mahusay na pagganap sa telebisyon.

Nasabi ni Xyriel sa isang episode ng PBB ang kanyang matagal nang gustong sabihin.

Pahayag niya, “Hindi ko pinagsisisihang tumulong ako sa pamilya ko, pero sana rin, matutunan kong alagaan ang sarili ko habang ginagawa ko ‘yun.”

Habang nagkukuwento sa loob ng bahay ni Kuya ay emosyonal si Xyriel sa kanyang pinagdaanan bilang breadwinner sa loob ng mahigit isang dekada.

Saad pa niya, “I’ve been working more than half of my life, more than a decade, pero wala akong savings.”

Bata pa lang, sikat na ang aktres pero nakakalungkot nga na waley pala itong naipon.

Just asking, ‘yun kaya ang dahilan kaya sinasabi niyang napatawad na niya ang kanyang mga magulang, lalo na ang tatay niya?

---

Nakiusap ang loyal Noranian na si Jen Donna Pergis Moreno na, “‘Wag na po mag-comment ng hindi magagandang salita para kina Lotlot, Ian, Matet, Kiko at Kenneth.”

Dagdag pa ni Jen, “Kung tayo po ay nasaktan… mas masakit po ito para sa kanila.

“Kung tayo po ay nawalan, mas nawalan po sila. Kani-kanya po tayo ng sakit na nararamdaman. Sana, maging mabait na lang po tayo sa bawat isa, lalo sa mga anak ni Ate Guy.”

Pakiusap ito sa mga taong patuloy na namba-bash sa mga anak ni Nora sa social media at kung anu-anong panlalait ang sinasabi.  

Well, alam ni yours truly kung gaano kamahal ni Ate Guy ang kanyang mga anak kaya mas magiging masaya siya kung lahat ay magkakaisa-isa. Boom, ganernnn!

Samantala, last May 4, Sunday ay naigawad na ang Presidential Medal of Merit on National Artist for Film para sa nag-iisang Superstar Nora Aunor na dinaluhan at tinanggap naman ng kanyang mga anak na sina Lotlot, Ian, Matet, Kiko at Kenneth. 

Pero kahit na tinanggap nila ang Presidential Medal of Merit ay bakas pa rin sa mga mata ng magkakapatid ang lungkot na wala na ang kanilang mahal na ina na si Nora Aunor.

---

NANDITO na uli sa Pilipinas ang Filipino-American singer and Doctor of Nursing na si Nick Vera Perez at kamakailan lang ay nagkaroon ito ng mediacon to promote his fourth and latest album titled Parte Ng Buhay Ko to touch the hearts of many listeners. 

Parte Ng Buhay Ko was first released online noong 2022 at ang album ay patuloy naman na nakakaantig ng puso ng mga listeners. All 9 songs were written for Nick by composer Adonis Tabanda.

Some of the songs on the album include Biyaya, Paghilom ng Sugat, Titig, Lihim ng Puso, Kalendaryo, May Tayo Ba?, Pangarap Ko’y Ikaw, Sana’y Mapansin, and the title track, Parte Ng Buhay Ko. Each song tells a story of love, pain, hope, and healing.

Sa Q&A portion ay natanong ni yours truly si NVP kung bakit hindi niya naisipang pasukin ang pag-aartista gayung super pogi niya at sinabi ko sa kanya na I know a star when I see one. 

At ang kanyang naging sagot ay… “Meron... meron akong plano noon na mag-artista pero hindi kaya ng schedule ko kasi nag-aaral pa ako noon. Iba ‘yung pag-iisip ko. When I was growing up, okay naman ang family namin.

“Pero ang iniisip ko lang talaga noon ay to finish school first so doon ako nag-concentrate.

“Noon ko pa na-meet si Beth Tamayo na naging ka-batchmate ko. Dati pa may mga offers din sa akin na gumawa ng movies pero hindi pa ako ready noon.

“Kaya nga ‘yung I Am Ready na first album ko... ‘yun ang ginawa kong title. Kasi nga nu’ng nag-release kami ng first album ko, doon ko na-feel na ready na pala ako.

“Pero ngayon siguro, kung ako ngayon, tatay na ang role.”

If ever, sino naman ang gusto niyang maka-love team?

Sagot niya, “Si Bea.”

“Sino’ng Bea? Bea Binene or Bea Alonzo?” balik-tanong namin.

Sey niya, “Sino si Bea Binene?”

“Naku, ‘yan ngayon ang pinaka-leading lady sa muling pagkabuhay ni Totoy Bato sa TV5,” sagot ni yours truly.

“Ah, si Bea Alonzo ang gusto ko. Natural umarte at magaling na artista at walang ka-effort-effort sa pag-arte,” he said with matching smile.

Anyway, to bring his music closer to fans and supporters, Nick has lined-up a series of appearances on television, radio, malls, and outreach events.

Makakasama ni Nick sa tour ang talented Eternal Diva, Ms. Evelyn O. Francia, and rising singer Hannah Shayne.