Mga maaaring gawin para maiwasan ang lungkot at stress ngayong pandemya

ni Jasmin Joy Evangelista | September 6, 2021

Bukod sa banta ng COVID-19, marami ang nahaharap din sa mental health crisis ngayong panahon ng pandemic. Ito ay dahil sa kabi-kabilang quarantine, lockdown, at mga health protocols na dapat sundin sanhi ng kumakalat na virus na ito.

Sa mga nagdaang pag-aaral nang magsimula ang COVID-19 outbreak sa bansa, kasabay ng pagtaas ng kaso ng Covid ay tumataas din ang bilang ng mga nakararanas ng iba’t ibang mental health issues.

Kaya panawagan ng mga mental health expert na sana ay bigyang-pansin din ang mental health bilang public health response ng gobyerno.

Kabilang sa mga tinitingnang sanhi ng mental health issues ngayon ay ang problema sa pinansiyal na aspeto, kawalan ng trabaho, pangamba ng pagkakahawa o pagkakaroon ng sakit, at ilan pang mga pagbabago sa pang-araw-araw nating pamumuhay.

Marami ang naninibago at hindi pa rin maka-cope na kailangang mag-isolate, o iwasan muna ang gatherings kahit pa sa mga malalapit na pamilya at ang pagtatrabaho at pag-aaral sa bahay. Tila hindi na umano kayang ibalanse ng ilan ang mga pagbabagong ito kaya nauuwi sa stress, anxiety, o depression.

Ayon sa ilang eksperto, makatutulong kung hahanap ng bagong libangan o mapagtutuunan ng pansin upang makaiwas sa ‘negative thoughts’ ang isang indibidwal. Ilan sa maaaring gawin ay ang mga sumusunod:

• Mag-set ng regular na schedule para sa mga routines and tasks

• Mag-exercise araw-araw

• Bawasan ang paggamit ng gadgets pagkatapos ng klase o trabaho

• Iwasan ang over-sleeping, under-sleeping, at over-eating

• Tumuklas ng mga interesting hobbies

• Bumuo ng magandang komunikasyon sa kaibigan at pamilya, virtually

• Mag-isip ng mga malikhain/unique na paraan para makatulong sa iba

• Laging magbasa/manood ng mga balita

• Um-attend ng webinars tungkol sa mental health concerns

• Patatagin ang pananampalataya sa Panginoon

Hindi natin maiiwasan ang mangamba at malungkot sa mga panahong ito ngunit maraming paraan para lagpasan ang mga ito at hindi tayo malugmok sa buhay. Lagi nating isipin ang mga positibong pangyayari sa kabila ng mga negatibong bagay na ibinabato sa atin ng mundo. Mahalaga pa rin na tayo ay maging mapagpasalamat dahil tayo ay malusog at nananatiling ligtas kasama ang mga mahal natin sa buhay.

Matatapos din ang pandemyang ito. Babalik din tayo sa normal at pagdating ng panahon na tayo ay malaya na sa mapaminsalang virus na ito, nasa atin na ang lahat ng oras sa mundo upang bawiin ang mga nasayang na sandali sa ating buhay. Cheer up!

Bayang Magiliw

ni Lyricko Seminiano - @What's In, Ka-Bulgar | August 17, 2021

Pilipinas, ano, kumusta ka na?

Sa panahon ng kasaganaan ay tapos ka na ba?

Dahil kahit na magsumikap ay kapos talaga,

kaya sa pagsigaw ng katarungan ay paos ka na nga.

Ang bayang Pilipinas kong minumutya,

pinipilas ninyo’t kinukutya,

sinisira at pinupuksa,

nililimas ninyo’t tinutusta.

‘Yung bansang dating malusog, biglang naging sakitin,

kaya karitin na ‘yung dapat na karitin,

dahil ‘di lang taumbayan, pati gobyerno, may mali rin,

sa mismong bayan mong sinilangan, ikaw pa mismo ‘yung alipin.

Ang kasarinlan na minsang ipinaglaban ng ating mga bayani,

tila nilipad na lang ng hangin na parang piraso ng dayami.

Alam n’yo ‘yung nakakalungot at kakatakot?

‘Yung pinilit nila tayong mapalaya pero ngayon pilit tayong nagpapasakop.

Kaya muling ginamit ang angking galing,

upang ihayag ang aming daing.

Hindi ko nais ng gulo at wala rin sanang pikunan.

Inilalahad ko lang ‘yung nakikita ko sa ‘ting lipunan.

Kaya meron akong katanungan,

Nasaan ang katarungan?

Napakalaki ng utang tapos ating lupa ang kapalit,

‘yan ang dahilan ng mga luhang mapait.

At upang makamit,

ang kanilang mithi, sa una, animo’y mga tupang mabait,

ang mga buwaya na sakim kaya sana ating kusang mabatid,

na ‘yan ang katotohanan na lubhang masakit.

Mga talukap ng mata n’yo, siguro nakababa ‘yan, ‘no?

Kaya ‘di n’yo nakikita ang paghihirap ng kababayan n’yo.

Inipon ko nang kay tagal itong tugma,

para mabigat ‘pag isinampal ko sa makakapal ninyong mukha.

Panahon na naman ng halalan kaya mga namumulitika,

panay ang pagpapasikat at nangungulit sila,

tanging iniisip lang naman ay ‘yung mga mauumit nila.

Nasa ating desisyon kung ‘yung nakaraan, mauulit ‘di ba?

Sa kabila ng panahong moderno’t makabago,

sila’y walang ipinagbago, puro komento’t panggagago.

Ang kailangan po namin ay solidong pagbabago,

at isang gobyernong makatao.

Sana ay magsilbi ‘tong tanda,

na ang maling boto ay ‘di lang sa daliri ‘yung mantsa,

kaya ito ang napili kong paksa,

upang imulat na ikaw dapat ang bida sa sarili mong bansa.

Mga dapat baguhin sa diet para sa healthy at glowing skin

ni Jersy Sanchez - @Life & Style| July 04, 2021

Balat ang pinakamalaking organ sa ating katawan, at ang mabuti at tamang nutrisyon ay mahalaga para mapanatili itong malusog.

Well, alam naman nating ang pagkain ng masusustansiyang pagkain at madalas na pag-inom ng tubig ay nakatutulong upang magkaroon tayo ng clearer skin, pero knows n’yo ba na may iba pang paraan para ma-achieve ang healthy-looking skin, partikular sa ilang pagbabago sa inyong diet? Yes, besh!

1. IBA’T IBANG KULAY NG PRUTAS AT GULAY. Kung ikaw ‘yung tipo ng tao na hindi kumokonsumo ng prutas at gulay araw-araw, kumain ng isang serving ng produce kada meal. Sey ng experts, kumain ng mga prutas at gulay na may iba’t ibang kulay tulad ng red peppers, leafy greens at carrots o yellow squash — ang iba’t ibang kulay ng produce ay indikasyon ng iba’t ibang micronutrients. Gayundin, ang broccoli ay magandang option para sa healthy skin dahil ito ay mayayaman sa golate at Vitamin K na sumusuporta sa healthy cells.

2. BAWASAN ANG SUGAR INTAKE. Para maiwasan ang skin irritation, inirerekomenda ng mga eksperto na limitahan ang pagkain ng processed food, partikular ang added sugar. Para maiwasan ito, alaming mabuti kung gaano karaming packaged food ang iyong nakakain dahil madalas, mayroong added sugar ang mga ito.

3. NO TO TRENDY SUPPLEMENTS. For sure, bet mo ring i-boost ang iyong vitamin at mineral intake sa pamamagitan ng pills, pero mga besh, ayon sa health experts, hindi ito worth it pagkagastusan. Bakit? Ito ay dahil puwede naman nating makuha ang mga vitamins at minerals na ito sa pamamagitan ng pag-intake ng tunay na pagkain. Halimbawa, ang whole foods na mayroong iba’t ibang nutrients, kabilang ang fiber na importante upang magkaroon ng healthy digestion. Dagdag pa rito, ang ‘fad diets o detox’ ay hindi talaga nakatutulong dahil natural na mailalabas ng katawan ang toxins kung mayroon itong sapat at tamang nutrients.

4. WATER PA MORE. Ang pag-inom ng tubig ay nakatutulong upang ma-flush ng katawan ang toxins. Gayundin, puwede itong dagdagan ng herbal o green tea para sa mas ‘fun’ na paraan upang mag-hydrate.

5. CAFFEINE & ALCOHOL CONSUMPTION. Bagama’t ang mga inuming may caffeine tulad ng kape at tsaa ay healthy dahil mayaman ang mga ito sa antioxidants, ang sobrang caffeine —tulad ng energy drinks — ay posibleng makapagpataas ng stress hormone level, na may negatibong epekto sa balat paglipas ng panahon. Bukod pa rito, dapat ‘in moderation’ ang pag-inom ng alak dahil nakasasagabal ito sa pag-process ng iba pang toxins sa katawan.

Oh, ha! Akala n’yo para lang sa pagpapapayat ang diet, ‘noh? Well, hindi lang pala dahil nakatutulong din ito para magkaroon tayo ng mas glowing at healthy-looking skin. Pero siyempre, kailangan muna nating gawin ang mga nabanggit sa itaas para sure na ma-achieve ang healthy body at skin. Keri?