Simbang gabi, simula ng Pasko, simula ng pag-asa

ni Fr. Robert Reyes - @Kapaayapaan / Patakbo-takbo | December 17, 2022

“Simbang Gabi, simula ng Pasko sa puso ng bawat Pilipino.” Ito ang unang linya sa awit na isinulat ni Propesor Lucio San Pedro. Masigla at masayang awit ito. Isinulat para sa koro at siguradong panggising sa oras na karaniwang mahimbing pang natutulog ang lahat.

Kay tagal nang itinuro ni Padre Eduardo Hontiveros, Sj ito sa aming mga seminarista ng Seminaryo ni San Jose noong 1972, kadedeklara pa lang ng Martial Law. Habang kinakanta namin ang Simbang Gabi, naghahalo ang aming mga damdamin. Maaari bang paghaluin ang pagsasaya at pagpoprotesta?

Heto tayo ngayon, Simbang-gabi na naman kahapon. Naghalo ang saya at lungkot sa mga mulat na sa nagdaang limang dekada. Ako’y 16 years old nang pinag-aralan naming kantahin ang Simbang Gabi. Unang Pasko sa ilalim ng Batas Militar.

Kakaibang hamon ang maging masaya sa gitna ng kalungkutan; umasa sa gitna ng laganap na kalungkutan dahil sa mga nabasag na panaginip at naglahong pangarap. Noong nakaraang linggo, ipinagdiwang natin ang Linggo ng Rosas.

Sa ebanghelyo noong Huwebes, muling binanggit ni HesuKristo ang mahalagang papel ng kanyang pinsan na si Juan Bautista. “Pinauna ko sa iyo ang aking sugo upang ihanda ang daan sa harap mo.” At natapos din ang mahalagang papel ni Juan sa buhay ng ating Panginoong HesuKristo. Walang sawa at takot niyang ipinahayag ang pagdating ng “Isang higit sa kanya, na hindi siya karapat-dapat kalagin ang mga tali ng kanyang pangyapak.” (Juan 1:27) At narinig ang tinig ni Juan na sumisigaw sa ilang, “Magsisi kayo’t talikdan ang inyong mga kasalanan dahil malapit nang maghari ang Diyos.” (Lucas 3:4)

Gigising nang siyam na gabi o madaling araw. Gigising at magbabantay, imumulat ang mga mata at sentido sa pagdating ng Panginoon. Babasagin ang lungkot at takot, maglalakad ng langkay-langkay. Ibabalik ang paggalang sa matatanda at sa iba. Magmamano sa kanila at gagalang sa iba. At higit sa pag-ibig sa sarili, muling paiiralin ang pag-ibig sa Diyos at sa kapwa.

At ito ang ating pag-asa, na sa gitna ng nakamamatay na labis na pag-ibig sa sarili, dumarating at palaging dumarating ang himig ng Pasko, ang himig ng Pag-ibig ng Diyos, ang himig ng pag-ibig natin sa isa’t isa. Siyam na gabing gigising at maglalakad, langkay-langkay.

Huwag kukurap, hindi puwedeng maghari ang mga korup!

ni Fr. Robert Reyes - @Kapaayapaan / Patakbo-takbo | December 13, 2022

Mabuting balita na hindi na gagamitin ang pondo ng Social Security System (SSS) at Government Service Insurance System (GSIS) bilang bahagi ng seed money para sa Maharlika Investment Fund. Mabuti naman at nakikinig pa rin ang mga mambabatas sa tinig ng karaniwang mamamayan, na nagsisikap mag-impok para sa kinabukasan sa pamamagitan ng kanilang kontribusyon sa SSS at GSIS.

Pero tapos na ba ang problema? Ayon sa mga may-akda ng panukala sa ibang pondo na lang kukunin ang seed money para sa naturang investment fund. Hihingin na lang umano nila ang mga kinita ng Bangko Sentral ng Pilipinas upang dagdagan ang pondong ilalaan ng Land Bank of the Philippines (LBP) at Development Bank of the Philippines (DBP).

Napag-alaman nating may mga grupo na nagtipun-tipon sa Kongreso sa Batasang Road upang iparating ang kanilang pagtutol sa Maharlika Investment Fund. Kaya naman, naghanda rin tayo kasama ang ilang parukyano at nagtungo sa Batasang Pambansa Complex sa Commonwealth. Pagdating namin ay naroroon na ang mga grupong nagpoprotesta. Mahinahon ang kilos-protesta na ito, kaunti lang ang mga nakiisa, samantalang mas marami ang mga pulis na dumating. Tumapat agad ang mga pulis sa amin. Kung hindi lamang tayo sanay sa mga kilos-protesta, malamang ay matakot tayo sa mga kalasag at batuta na kanilang dala-dala. Ngunit sa kabila mukhang matapang at palaban, bumabati sila sa amin hanggang magsimula ang misa.

Nagpatuloy ang misa at taimtim na nanalangin ang lahat. Nararamdaman nating maging ang kapulisan ay nagdarasal din. Samantala, kalauna’y nagpasalamat tayo at binitiwan ang hamong, “‘Wag kukurap, baka maghari ang korup!”

Natapos ang masaya at puno ng pag-asa na misa. Nararamdaman natin ang lalim at tibay ng paninindigan at pagmamahal sa bayan ng lahat. Meron pang mga galing sa ibang bansa na nagpahayag ng kanilang pakikiisa, gayundin ang pagkadismaya sa Maharlika Investment Fund. Bagama’t sila ay nagtatrabaho sa ibang bansa at kumikita ng mas malaki kaysa sa karaniwang mga Pinoy, patuloy ang kanilang paghuhulog sa buwanang kontribusyon. Bakit? Dahil malinaw ang kanilang pagmamahal sa sariling bansa, na sa kabila ng pagkakaroon ng trabaho sa labas ay hindi nila nakakalimutan ang Inang Bayan.

Sa katapusan ng misa, pagkatapos ng pasasalamat sa huling panalangin, sabay-sabay nating isinigaw, “No, no, no to Maharlika Fund!”

Sa loob ng isang oras, nagawa ng lahat ngumiti at magpasalamat sa mga kasama. Nagawa ng lahat na magnilay at magdasal, mangakong hindi titigil sa pagmumulat sa iba at sa pagkilos para sa kabutihan at kapakanan ng lahat. Mga kapatid, huwag nating kalimutan ang hamon, “‘Wag kukurap, baka maghari ang mga korup.”

Para ba talaga sa kapakanan ng bayan ang Maharlika Investment Fund?

ni Fr. Robert Reyes - @Kapaayapaan / Patakbo-takbo | December 12, 2022

Noong 1976, una akong nagtrabaho bilang guro at kinailangan kong kumuha ng Social Security System (SSS) number bilang requirement upang matanggap sa paaralang nais kong pasukan. Mahigit 10-buwan kaming naghati ng paaralang aking pinasukan sa buwanang kontribusyon na hinihingi ng SSS. Mabilis natapos ang sampung buwan at umuwi ako sa Malabon. Pagkatapos ng ilang linggo na bakasyon, bumalik ako ng seminary para ipagpatuloy ang aking pag-aaral tungo sa pagiging pari. Lumipas ang maraming taon. Hindi ko namalayan sa maraming taong nagdaan na ipinagpatuloy pala ng aking mahal na ina ang buwanang pagbayad sa aking SSS ng kontribusyon.

Malaki ang pasalamat ko nang malamang patuloy pala ang pagbabayad ng aking ina sa SSS ko. Ganitong naipagpatuloy ang paghulog ng aking kontribusyon hanggang naabot ko ang edad ng 65, ang “compulsory claim of pension.” Salamat sa aking ina na hindi pumalya sa pagbayad ng kontribusyon sa SSS, nagsimula akong tumanggap ng pensyon hanggang ngayon.

Pero nang nagsimula akong magkaroon ng “maintenance”, pagkatapos magkaroon ng COVID-19, sapat na lang ang halagang aking tinatanggap sa pagbili nito. Habang tinatanggap at ibinibili ko ng aking maintenance medicine ang pension, madalas kong maisip ang mga kababayan nating walang SSS, pero kailangang bumili ng “maintenance” at iba pang pangangailangan.

Napakahalaga talaga ng pagkakaroon ng pensyon, maliit man ito o malaki. Literal na malaking tulong ang SSS sa pagbuhay ng mga retirado hanggang sa katapusan ng kanilang buhay.

Samantala, kamakailan lang ng biglang sumulpot ang panukalang batas tungkol sa Maharlika Investment Fund. Ito ay plano na bumuo ng malaking pondo para sa iba’t ibang batayang pangangailangan ng bawat mamamayan. Ang panimulang kapital (seed money) ay maaaring kunin sa iba’t ibang pondo, tulad ng SSS at Government Service Insurance System (GSIS). Noong binanggit ang SSS at GSIS ay mabilis umalma ang mga miyembro nito. Hindi lamang indibidwal, kundi grupo ang bumabatikos dahil malamang ay mapunta lang sa wala o ma-scam ang nasabing investment.

Malapit na ang Pasko. Ang mga nalalabing araw ay dapat nating gamitin sa paggunita sa pag-ibig ni HesuKristo para sa atin. Itinuro niya na mahalin ang kapwa at sikaping huwag maging alipin ng sarili. Ipinamalas niya ang kagandahan ng paglilingkod na wagas, na walang hinihintay na kapalit.