Bukod sa dapat paggawa ng mabuti… Tama bang mahalin ang kaaway?

ni Fr. Robert Reyes @Kapaayapaan / Patakbo-takbo | January 14, 2023

May mga taong madaling mahalin at may mga taong mahal na natin, tulad ng magulang, kapatid, kaibigan, asawa o anak.

Subalit, mababasa sa Lucas 6:38 ang tungkol sa pagmamahal na hindi karaniwan, hindi madali: “Kung ang nagmamahal lamang sa inyo ang mamahalin, ano pang gantimpala ang inyong hihintayin? Ang makasalanan man ay marunong din magmahal sa mga nagmamahal sa kanila. Kung ang mga nagmamabuti lamang sa inyo ang gagawan ng mabuti, ano pang gantimpala ang iyong hihintayin? Kahit ang masasamang tao ay gumagawa rin niyan! At kung ang makababayad lamang ang inyong pauutangin, ano pang gantimpala ang inyong hihintayin? Kahit ang masasamang tao ay nagpapautang din sa kapwa, sa pag-asang sila’y mababayaran. Sa halip, mahalin ninyo ang kaaway at gumawa kayo ng mabuti. Magpahiram kayo na hindi umaasa ng anumang kabayaran. Sa gayun, malaking gantimpala ang tatamuhin Ninyo at kayo’y magiging mga anak ng Kataas-taasang Diyos. Sapagkat Siya’y mabuti kahit sa masasama at sa mga hindi marunong tumanaw ng utang na loob.”

Madaling mahalin ang nagmamahal sa atin. Madaling gawan ng mabuti ang gumagawa ng mabuti sa atin. Madaling pautangin ang nagbabayad. Wala tayong pagkakaiba sa masasamang tao na ganun din ang ginagawa. Kaya ang paalala ng Panginoon, “Sa halip, mahalin ninyo ang inyong kaaway at gumawa kayo ng mabuti.” Kailangan nating matutunan ang tunay na pagmamahal na hindi naghihintay ng kapalit at kabayarang kapantay ng anumang tinanggap.

Sa huli, hindi pagmamahal sa kapwa o sa iba ang hinahanap ng sinumang nagmamahal ng nagmamahal; pinauutang ang sinumang nagbabayad sa kanila o ginagawan ng mabuti ang mabuti na sa kanila. Ito ang kahulugan ng katarungan ng pantay na pagtrato (commutative justice). At merong mas higit dito—ang pag-ibig.

Sa ebanghelyo noong Huebes, ipinamalas ni HesuKristo ang kakaibang pagmamahal sa Kanyang pagpansin, pagtulong at pagyakap sa lalaking ketongin. Napansin niya ang ketongin na lumapit sa kanya’t nagsabi, “Kung gusto Ninyo, maaari Ninyo akong pagalingin.” Naawa si HesuKristo, hinawakan ito at sinabi, “Gusto ko, luminis ka.” (Marco 1:40-45)

Parang nahagip ng ketongin ang kalagayan ng mga nakalimutan nang lipunan. Napakaraming mga ilang ulit nang humingi ng tulong, pero ilang ulit na ring nabigo. Sanay na silang hindi pansinin at hindi tulungan—nasanay silang dedmahin. Hindi ba’t ganito ang karaniwang kalagayan at kapaligiran sa lipunan?

Patuloy ang zarzuela ng malalaki at makapangyarihan sa ating bansa. Tuluy-tuloy ang pagtaas ng presyo ng sibuyas at susunod pa ang presyo ng itlog. Sa gitna ng lahat, naririnig natin ang tinig ng mga pagod at halos nakalimutan na, na halos sawa nang manawagan at humingi ng tulong.

Kaliwa’t kanan ang kalbaryo sa iba’t ibang aspeto, makabuluhan ba ang pag-ibig na ibibigay natin sa mga ito? Marami man tayong kinahaharap o pinagdaraan, sana’y hindi mawala ang pag-ibig na dahilan kung bakit makabuluhan pa rin ang lahat.

Salamat at paalam, Papa Benedicto

ni Fr. Robert Reyes @Kapaayapaan / Patakbo-takbo | January 8, 2023

Habang naghahanda ang marami para salubungin ng nakabibingi na ingay ng Bagong Taon, merong mahalagang tinig ang tuluyang tumahimik. Ito ang tinig ni Papa Benedicto XVI, na yumao noong ika-31 ng Disyembre, 2022 ang huling araw ng taon.

Para sa mga Katoliko, malaking kaganapan ang kamatayan ng Papa. Babalikan ang mahahalagang kontribusyon ng yumaong Papa para sa kaisipan ng isa sa pinakamalaking relihiyon sa mundo.

Sa kabila ng kahanga-hangang talino at lalim ni Papa Benedicto, maaalala siya sa tatlong kakaibang posisyon na lubos na nagpakilala sa kanyang katapangan at kakaibang kaisipan.

Una, matagal na niyang nakikita ang pagliit ng Simbahang Katolika sa Europa. At sa halip na mawalan ng pag-asa, sinimulan niyang itulak ang pananaw ng pagpapalitaw ng “Catholic Creative Minority.”

Pangalawa, siya ang kauna-unahang papa na nagbitiw pagkaraang ng anim na daang taon. Maalala ang pagbitiw ni Papa Celestine V noong 1294 at si Papa Gregorio XII noong 1415. Hindi na pinabot ni Papa Benedicto ang kanyang paglilingkod sa punto na halos hindi na siya makapaglakad at makapagsalita ng tuwid. Maaalala natin ang hirap na hinarap ni Papa Santo Juan Pablo II. Hukot, mahina’t hindi na halos makalakad, hirap magsalita at hindi na halos maintindihan ang sinasabi. Malinaw at matalas pa rin ang kanyang pag-iisip, ngunit ibang-iba na ang kanyang katawan na pinipilit na lang kumilos at gumawa sa kabila ng sakit ang katandaan.

Pangatlo, ayon sa nag-alaga kay Papa Benedicto hanggang sa kanyang pagpanaw, ang mga huling salita ng pumapanaw na Papa ay “Jesus, Ick liebe Dich.” Hesus, mahal kita. Ipinaliwanag ni Papa Francisco ang buong buhay na pagsisikap ni Papa Benedicto. Sinikap ni Papa Benedicto na makita ang mukha ni HesuKristo at akayin ang lahat na makita rin ito. Kaya ang isa sa pinakahuling librong isinulat ni Papa Benedicto ay Jesus of Nazareth.

Hanggang sa katapusan ng kanyang buhay, sinikap ni Papa Benedicto na makita at ipakita ang mukha ni HesuKristo. Sa omeliyang binigay natin noong nakaraang ika-5 ng Enero 2023, ang araw ng libing ni Papa Benedicto, naitanong ko sa mga nagsisimba, “Gusto ba ninyong makita ang mukha ng inyong asawa?” Nagtawanan ang mga nagsisimba. Marahil dahil, bakit pa nila titingnan ang mukha ng taong kasama nila araw-araw? Ngunit, ipinaalala natin sa mga naroroon, na noong sila’y nagkakakilala at nagliligawan pa lamang ay halos ayaw nilang magkahiwalay.

Sana-sana, sa maikli nating buhay ay matutunan nating hanapin at akayin ang iba upang makita ang mukha ni HesuKristo, ang mukha ng Diyos.

Sana ay matuklasan natin ang kakaibang buhay ng pagmamahal sa Diyos, sa kapwa, sa maliliit, sa mundo, sa kalikasan at ipakita ito hindi lang sa salita kundi sa gawa. Sana ganito ang ating buhay para tulad ni Papa Benedicto atin ding mabibitawan mula sa ating lahi ng hindi na muling magsasalita ang mga katagang, Hesus, Mahal Kita!

Diyus-Diyosan ng pulitikang Pinoy

ni Fr. Robert Reyes - @Kapaayapaan / Patakbo-takbo | December 18, 2022

Sino ang puno’t dulo ng Maharlika Investment Fund? Walang iba kundi sina Martin Romualdez, Sandro Marcos, Jose “Mannix” Dalipe, Stella Luz Quimbo at ang mga kinatawan na sumanga-ayon at lumagda sa HB 6608 o ang Maharlika Investment Fund.

Majority ng mga mambabatas ay sumang-ayon at sumuporta, kaya't kahanga-hanga ang anim na mambabatas na kumontra sa naturang panukalang-batas, pero pinaboran naman ang mamamayan. Pero sa kabila nito, hindi nakapagtataka kung bakit ganito ang nangyari.

Nagsulat noong nakaraang araw ang komentarista na nagsabing tuwing anim na taon, nagkakaroon ng Great Migration o malaking paglipat, hindi ng mga hayop, kundi ng mga pulitiko tungo sa bagong nakaupo sa Malacañang. Kadalasan, sabi ng komentarista, hayop tulad ng mga ibon ang lumilipad at lumilipat sa mas ligtas at masaganang lugar, tulad ng mga “migratory birds” ng China na lumilipad patungong Candaba Swamps sa Pampanga. Sa ating bansa ang Great Migration ay isinasagawa ng mga pulitiko. At ganito ngayon ang nagaganap sa Kongreso hinggil sa HB 6398. Nagmamadali silang lahat lumipat sa may hawak ng poder at pondo ng pamahalaan. At lalong nais “i-certify as urgent” ng pangulo ang HB 6608 ay lalong paspasan nang nagaganap ang mabilisang paglipad at paglipat.

At lalong bumilis at sumigla ang paglipat ng mismong ang pangulo ang nagsabing sa kanya nagsimula ang Maharlika Investment Fund. Inamin ito ng Pangulo sa miyembro ng media sa kanyang paglipad tungong Brussels, Belgium sa kanyang paglahok sa “Association of Southeast Asian Nations-European Union Commemorative Summit mula ika-12 hanggang ika-14 ng Disyembre, 2022.

Kakaibang “timing” ang sinunod ng mga mambabatas. Habang papalapit na ang Pasko ng Pagsilang ng Panginoon, doon nila pilit isinisilang din ang HB 6308. Higit sa panggulo sa pagdiriwang ng Pasko, magandang hamon ito upang tunay nating pagnilayan at pagdasalan ang malalim na kahulugan ng Pasko. Isinilang ang Anak ng Diyos upang paalalahanan tayong huwag sumamba sa mga diyus-diyosan. Sa ating bansa, merong kambal na diyus-diyosan, ang salapi at kapangyarihan. Amoy na amoy at damang-dama natin ang masangsang at nakapangingilabot na espiritu ng marumi at pansariling pulitika na buhay na buhay sa Kongreso at Malacañang.

Ngayong nagsimula na ang siyam na gabi ng pagpupuyat at pagsasakripisyo, sama-sama tayong magnilay, mag-usap-usap, magdasal at maghanda para sa makabuluhan at mabisang pagtutol sa mga diyus-diyosan ng salapi at kapangyarihan, na patuloy na sinasamba at pinaglilingkuran ng maraming mambabatas.