Pinunong may liwanag at kababaang-loob ang kailangan ng bansa

ni Fr. Robert Reyes @Kapaayapaan / Patakbo-takbo | January 28, 2023

Dalawang magkasunod na araw na ang tema ng mga pagbasa ay Liwanag. Noong nakaraang Miyerjykes, ika-25 ng Enero, Pista ni San Pablo Apostol, tinalakay sa unang pagbasa (Gawa 22:3-16) ang pagbabagong buhay ni San Pablo mula sa taga-usig ng mga Hudyo na nakinig at sumunod kay Kristo tungo sa tagasunod ni Kristo. Naglakbay tungong Damasco si San Pablo na Saul pa lamang ang pangalan, nang nakita niya ang nakakasilaw na liwanag. Sa sobrang tindi ng liwanag, nahulog si Saul sa sinasakyan nitong kabayo at sa kanyang pagbagsak sa lupa, mayroon siyang narinig na tinig na nagtanong, “Saul, Saul, bakit mo ako inuusig?” At sumagot ang tinig, “Ako si Jesus ng Nazareth na siyang inuusig mo.” Ngunit, hindi narinig ng mga naroon ang tinig, bagama’t nakita nila ang nakakasilaw na liwanag. Inutusan ni Jesus si Saul na pumunta sa Damasco. Pumunta nga ito at nakausap niya si Ananias, isang taong maka-Diyos na nagsabing tanggapin mo muli ang iyong paningin at nakakita muli si Saul. Nagpatuloy si Ananias, “Hinirang ka ng Diyos ng aking mga ninuno upang malaman mo ang kanyang kalooban at makita ang makatarungan at marinig ang kanyang tinig.”

Sa sumunod na araw o noong nakaraang Huwebes, narinig natin ang mga salita ni Kristo tungkol sa Liwanag:

“Dumarating ba ang ilaw para takpan ng salop o para ilagay sa ilalim ng higaan? Hindi!

Inilalagay ito sa patungan. Walang nalilihim na hindi nabubunyag at walang tinatakpan na hindi malalantad. Makinig ang may tainga!”

Mapanganib ang taglay na liwanag ni Saul. Kayang-kaya niyang mang-usig ng mga Kristiyano dahil sa liwanag na inakala niyang tama, ngunit hindi pala. Ngunit sa totoo lang, palso ang liwanag na kanyang dala. Mabigat at madilim ang liwanag na ito dahil hindi Diyos ang pinanggagalingan nito. Dahil dito, bagama’t walang sinasabi ang batas ng mga Hudyo na usigin at patayin ang mga Kristiyano, nabulag at naging panatiko si Saul. Siguradong-sigurado si Saul sa kanyang iniisip at ginagawa at walang makakapigil sa kanya. Sa puntong ito, dumating ang matinding liwanag ng Diyos na nagpabagsak at bumulag sa kanya. Kailangan ni Saul ang pagbagsak at pagkabulag na ito upang magising siya sa katotohanan na magtuturo sa kanyang magpakumbaba at maging mahinahon, at itigil ang kanyang pag-usig sa mga naniniwala sa “Daan.”

Ang ebanghelyo ng sumunod na araw ay tungkol sa dapat kalagyan o puwesto ng liwanag. Ito ang sinabi ni Hesus: “Dumating ba ang ilaw para takpan ng salop o para ilagay sa ilalim ng higaan?

Hindi! Inilalagay ito sa patungan! Walang nalilihim na hindi nabubunyag at walang tinatakpan na hindi malalantad! Makinig ang may tainga!” (Marcos 4:21-25)

Naalala ko ang nabalitang talumpati ng kasalukuyang Prime Minister ng New Zealand na si Jacinta Arden. Aniya, “I want you to know that I leave with a greater love and affection for Aotearoa New Zealand and its people than when I started. I didn’t think that was possible.”

“You won’t find me commenting on domestic politics. I’ve had my time. It’s time for the new team. I’m ready to be many things. I’m ready to be a backbench MP). I’m ready to be a sister and a mum.”

Inamin din ni Arden na napagod siya sa napakaraming problemang hinarap niya sa nakaraang anim na taon at dahil dito, ubos na ang kanyang gasolina at hindi na niya pipiliting gawin ang hindi na niya kaya.

Pinanood ko ang maikling talumpati ni Arden at humanga ako. Baliktad na baliktad sa pag-iisip ng maraming namumuno sa ating bansa. Malinaw na wala na silang kakayahang mamuno. Malinaw din na hindi maganda ang kanilang motibasyon sa pamumuno. At malinaw na sa maraming tao ang pagkatig nila sa hindi malinis at makatarungang sistema ng pulitika ng mga dinastiya at trapo.

Kakaibang liwanag ang tinaglay ni Arden sa nakaraang anim na taong panunungkulan nito. Hindi makasarili at mapangimbabaw. Puno ng pagmamahal at pagmamalasakit sa kanyang bayan at mga kababayan. Kay layo, napakalayo sa uri ng pamumuno ng marami sa ating mga pinuno.

Sa parte ni Saul, kailangan ang nakasisilaw na liwanag ng biyaya ng Diyos upang gisingin siya sa kanyang bulag na panatisismong usigin at patayin ang mga tagasunod ni Kristo. Dahil dito, nagpakababa at sumunod si Saul bilang Pablo sa mismong taong kanyang pinag-uusig at nais lipulin.

Sa parte naman ni Arden, sa halip na pilitin niyang manatili sa puwesto at pilitin ang kamag-anak, asawa, anak, kapatid o sinumang malapit sa kanya na magpatuloy sa kapangyarihan para sa kanya, pinili niyang bumaba at muling maging pangkaraniwang mamamayan. Sa kanyang kababaan, higit pa siyang naging liwanag ng kanyang bansa at mga kababayan.

Ito ang kailangan ng ating bansa at ng buong mundo… ang liwanag ng pamumunong mapagkumbaba.

Mayor Casimiro Junjun Ynares, tulungan at protektahan mo ang mga kababayan mo

ni Fr. Robert Reyes @Kapaayapaan / Patakbo-takbo | January 21, 2023

Mayor Casimiro 'Junjun' Ynares, pakinggan at protektahan mo ang mga nakatira sa gilid ng Sumulong Highway.

Kumalat sa social media noong nakaraang Miyerkules, ika-18 ng Enero, ang pagpanaw ni Fr. Catalino Arevalo Sj, kilalang propesor ng teolohiya sa Loyola School of Theology, Ateneo de Manila.

Naging guro si Fr. Arevs ng maraming naging pari at obispo. Mayaman at makabuluhan ang buhay ni Fr. Arevs na umabot ng 97 taon.

Bagama't malungkot ang marami sa pagpanaw ng mahal na paring propesor, hindi na ganoon kasakit dahil sa naging mahaba at mabungang buhay nito.

Hindi lang propesor ng mga naging pari at obispo si Fr. Arevs, siya rin ay naging adviser nina Pangulong Cory Aquino at ng kanyang anak si Noynoy. Kasalukuyang dinadagsa ang lamay ni Padre Arevs sa loob ng Ateneo de Manila Campus.

Napakaraming naghahangad na makita sa kahuli-hulihang pagkakataon si Fr. Arevs.

xxx

Noong nakaraang Lunes, ika-16 ng Enero, bandang alas-5 ng madaling-araw, tumatawid ng Sumulong Highway sa bandang Mambugan ang mag-inang Wilma at John Denmark. Mabuti na lang at mabilis ang mga mata ni Wilma na biglang itinulak palayo sa kanya si John Denmark.

Nadapa at tumama ang mata ng 12 taong gulang na si John Denmark. Tinamaan at napuruhan si Wilma, ang nanay ni John Denmark.

Namatay si Wilma at dahil sa kanya, nasagip ang kanyang anak.

Noong nakaraang Huwebes, nakarating sa aming mga pari ng diyosesis ng Cubao ang tungkol sa trahedya sa Housing Project for Workers ng Diocese of Cubao sa Brgy. Mambugan.

Nagkaroon ng misa para kay Wilma ika-5:30 ng hapon sa Simbahan ng Pagbabagong Anyo ni Kristo sa Murphy, Cubao.

Pinamunuan ito ng aming Obispo, ang kagalang-galang na Honesto Ongtioco ang naturang misa.

Humabol ako sa misa at dalawa kami ni Obispo Nes na nag-alay ng misa. Nang dumating kami ni Obispo Nes nakita namin ang mag-amang John Denmark at Denver. Magang-maga ang mukha ng bata na walang tigil ang iyak. Naramdaman ko ang bigat na nararamdaman ng aming Obispo. Ganon din ang buong kapaligiran ng munting burulan ng parokya.

Kailangan pa bang mangyari ito sa kabila ng paulit-ulit na panawagan ng mga residente ng Mambugan kay Mayor Junjun Ynares, na nagsimula pa pagkatapos ng trahedya noong Disyembre 2011, nang bumulusok ang isang 18-wheeler truck (plate no RFD 594) sa Sumulong Highway sa bandang Brgy. Mambugan? Walo katao ang namatay habang 12 ang nasaktan nang banggain ang isang owner type jeepney at isang passenger jeepney na sinundan ng pagsagasa ng trak ang isang tindahan, karinderya at ilang bahay na dikit-dikit.

Malalim ang iniwanan nitong takot at agam-agam sa mga residente ng Mambugan kaya’t noon pa man ay narinig ko na rin ang paghahangad ng marami na kausapin si Mayor Junjun. “Sana pakinggan na kami ng mahal naming Mayor Junjun Ynares:

“Mahal na Mayor Junjun, alam namin ang pagmamahal mo sa iyong mga kababayan ng Antipolo. Tulungan mo po kaming makatawid nang maayos at ligtas sa kabilang daan.”

At isa sa narinig kong mungkahi ay ang pagpapatayo ng overpass o footbridge sa mapanganib na lugar.

At kung madalas na kayo sa Antipolo, madaling makikita ang iba’t ibang lugar na dapat noon pa ay nilagyan na rin ng overpass o footbridge.

Lubhang nakakatakot na basta tumawid na lang ang tao sa mga pababa’t pataas na zigzag ng Antipolo. At malinaw na hindi lang kakulangan ng mga overpass at footbridge ang problema kundi ang kakulangan ng mga drayber ng mga motorsiklo na may kaalaman sa batas ng kalye at may disiplina.

Hindi ko maintindihan kung bakit kakaunti ang mga nagmomotorsiklo na hindi nagmamadali at pawang walang takot mamatay.

O mahal naming Mayor Junjun, inaasahan din naming maging tunay kang ama sa maliliit mong mga anak. Salamat sa inyong pagtangis kasama ang mga kamag-anak ni Wilma. At higit dito ay gagawin n'yo ang nararapat para gumanda, tumibay at umayos ang mga kalye sampu ng pag-uugali ng mga nagpapatakbo ng pamahalaang lokal at nasyonal.

Sa 'Pinas, ang justice ay just-tiis, just-just at just-test

ni Fr. Robert Reyes @Kapaayapaan / Patakbo-takbo | January 15, 2023

Ilang estudyante ng abogasya ang nakausap ko at pinakiusapang mag-isip-isip nang husto kung ano'ng klaseng abogado ang nais nilang maging. Napakaganda sana ng propesyon ng mga abogado kung mananatili silang patas, marangal at tapat sa Konstitusyon.

Bakit ko ito nasabi? Kailangan pa bang sabihin ito na tila lumalabas na merong mga abogadong hindi patas, hindi marangal at hindi tapat sa Konstitusyon? Hindi natin nilalahat ang mga abogado o anumang propesyon, tulad ng mga pari, guro, doktor, pulis, sundalo at iba pa. Ngunit alam nating hindi palaging maganda ang kapaligiran na hindi nakatutulong sa matino at marangal na pagsasabuhay at pagsasagawa ng iba’t ibang propesyon.

Para nating sinabi na hindi maganda ang kapaligiran na kinikilusan ng mga abogado, na kung hindi sila mag-iingat at magpapakatatag ay madali silang mahuhulog sa patibong ng kompromiso at korupsiyon.

Napakahaba na ng ating karanasan sa pagtulong, pag-alalay, pagtatanggol o simpleng pagbabantay sa iba’t ibang kaso ng maling paggamit sa batas na nagpaparusa at nagpapahirap sa mga malinaw na inosente at walang anumang bahid ng kasamaan, katiwalian, malisya at tuwirang paglabag sa batas.

Sana may himalang mangyari upang ang 'justiis', 'just-just' at 'just-test' na hustisya ng ating bansa ay maging tunay na nagpapalayang, nagtatanggol sa dangal at karapatan ng bawat mamamayan.