Natuto na ba tayo sa pandemya o kailangan natin ng saklolo?

ni Fr. Robert Reyes - @Kapaayapaan / Patakbo-takbo | June 25, 2023

Dalawa ang parokya ng Ina ng Laging Saklolo sa diyosesis ng Cubao. Halos magkasing-tanda ang dalawang parokya dahil kapwa magse-senior na. Mapalad akong nadestino sa dalawang parokya ng Ina ng Laging Saklolo.

Ang pinakaunang “assignment” ko bilang batang pari, noong Abril 1982 ay ang Parokya ng Laging Saklolo sa 13th Avenue, Bgy. Socorro, Cubao, Quezon City. Natulungan ko ng anim na linggo si Msgr. Cesar Pagulayan nang walang sabi-sabi, isang tanghaling tapat bandang Hunyo ng 1982, biglang dumating si Jaime Cardinal Sin na hinahanap ako.

Nang buksan ni Monsi Pago ang pintuan, nagulantang na lang kaming dalawa nang bumulaga si Cardinal Sin na ang unang tanong ay, “Where is Robert? I want to transfer him to UP Diliman.” At doon natapos ang maikli ngunit masasayang araw ko sa OLPH-13th Ave., Cubao. At pagkaraan ng 38 taon binulaga na naman ako ng tadhana nang sabihan ako ni Obispo Honesto Ongtioco bandang Mayo 2021 na ililipat niya ako sa Our Lady of Perpetual Help, Project 8.

Nasa edad 27 ako noon 1982. At 66 taong gulang naman ako noong 2021.

Hindi pala matagal ang 39 na taon mula 1982 hanggang 2023 na parang kahapon lang. Napakarami ring nangyari sa loob ng 41 taon na parang isang iglap lang ang lahat-lahat ng mga ito. Ganyan kabilis ang buhay at ganyang kaikli ang buhay kaya’t hindi dapat aksayahin ang anumang sandali o pagkakataong ipinagkakaloob sa atin ng Diyos.

Para sa pagdiriwang ng Pista ng Parokya ng Ina ng Laging Saklolo sa Project 8, Quezon City, na napili naming pagnilayan ang mga mahahalagang leksyon ng nagdaang pandemya ng COVID-19. Ang tema ng aming pista ay ‘Front Liner Tayong Lahat!!!’

Nais kong ibahagi ang 9 na tema para sa Nobenaryo ng Patron ng Parokya at ang tatlo pang tema na bubuo sa 12 buwan na pagninilay, panalangin at pagkilos para sa pagpapasigla, pagbubuo at pagpapatatag ng buhay espirituwal at pamayanan ng parokya.

Ito ang 12 tema ng Front Liner Tayong Lahat!:

June 16, Unang Araw (Hunyo): Kalusugan, Yaman, Lakas at Pag-asa ng Pamilya, Pamayanan at Bayan.

June 17, Pangalawang Araw (Hulyo): Panahon, Yamang Banal, Dumadaloy at hindi Mababalik. Huwag lustayin. Gamitin para sa kapwa, Kalikasan at Kinabukasan ng Sangkatauhan.

June 18, Pangatlong Araw (Agosto): Pamilya, Unang Pamayanan, Munting Simbahan, Punlaan ng Pananalig, Pag-ibig, Pag-asang Bumabago, Nagpapalaya.

June 19, Pang-apat na Araw (Setyembre): Kalikasan, Tinig ng Diyos, Tinig ng Katotohanan, Tinig ng Ngayon at Kinabukasan.

June 20, Pang-limang Araw (Oktubre): Kayamanan, tunay , makatao, maka-Diyos, maka-Kalikasan, maka-Bayan, maka-Mahirap, Di Maka-Sarili.

June 21, Pang-anim na Araw (Nobyembre): Pag-gawa, Trabahong Mapaglikha, Mapagpalaya, Mapag-ugnay sa Diyos, Kapwa at Kalikasan.

June 22, Pang-pitong Araw (Disyembre): Katahimikang Banal, Komunyon (pakikiisa sa Diyos, Kapwa at Kalikasan.

June 23, Pang-walong Araw (Enero 2024): Kababaang-loob, bunga ng Pagtanggap ng Kamatayan, ng Katapusan ng Buhay, ng hangganan nito. Simula ng Pananampalataya sa Buhay na Walang Hanggan.

June 24, Pang siyam na Araw (Pebrero 2024): “Ang Bago at Tunay na Normal: Payak na Pamumuhay.

Marso (2024): Katatagan, Kahandaan sa Lahat ng Hamon sampu ng Trahedya ng Buhay sa Lupa…

Abril (2024): Tunay na Kagalakan , likas, hindi nabibili, hindi nagagawa (artipisyal, komersyal), bunga ng malalim na paghanga (admiration) at pagkamangha (awe).

Mayo (2024): Front Liner ang lahat; kaisa sa pagtatanggol, pag-aahon, pagliligtas at pagtataguyod ng buhay at dangal ng lahat.

Kung buhay pa tayo ngayon, malinaw na sinaklolohan at iniligtas tayo ng Diyos sa kapahamakan.

Nararapat lang din na kilalanin at hingin natin sa Inang Maria na saklolohan niya tayo.

Kaya sa mga iba’t ibang sitio ng parokya, madalas kong yayaing manalangin ang lahat sa Ina ng Laging Saklolo.

Tulad ng basbasan ko ang bangkay ng isang batang ama na namatay sa “pancreatic cancer”. Namatay ang ama na may limang anak sa “pancreatic cancer” dahil sa labis na pag-inom ng alcohol.

Muli kong inanyayahan ang lahat na hilingin na saklolohan ni Inang Maria ang maraming kalalakihang nalululong sa bisyo.

Mainam dapat na ituro ang pag-iingat at pamumuhay nang malinis at may pananagutan sa sariling kalusugan.

Kung tayong lahat nga’y Front Liner, magsisimula ito sa sariling kalusugan. Bantayan, ingatan, ilayo sa bisyo at sari-saring kapahamakan ang personal na kalusugan gayundin ng pamilya, batayan ang kalusugan ng pamayanan, ng bayan at ng sangkatauhan.

Pinakaunang leksyon na natutunan natin noong nakaraang pandemya, ang pagbalik sa pinakamahalaga, ang ating kalusugan.

Talino at konsensya, mananaig sa kaso ni Leila

ni Fr. Robert Reyes - @Kapaayapaan / Patakbo-takbo | June 23, 2023

Nang dalawin namin ni Padre Flavie Villanueva SVD si dating Senadora Leila De Lima sa Kampo Crame, noong nakaraang linggo, nagkuwento ang dating senadora kung paano siya nadismaya sa desisyon ni Judge Romeo Buenaventura na hindi siya payagang magpiyansa.

Subalit, hindi tumagal ng higit isang araw ang kanyang hindi magandang pakiramdam.

Pagkaraan ng isang araw, maganda na muli ang kanyang disposisyon. Nang pinagbahagi namin si Leila, maikli ngunit puno ng tatag at pag-asa ang kanyang pagsasalaysay. “Hindi ako madudurog. (I will not be broken). Dahil alam ko at tiyak akong malinis at inosente ako. Lalaya ako dahil walang dahilan na manatili akong nakakulong.”

Kinabukasan, araw ng Kalayaan, nagtungo ang ilang grupo at indibidwal sa Chino Roces bridge sa Mendiola. Sa gitna ng aming pagdiriwang ng Araw ng Kalayaan, pinagtibay namin ang aming paninindigan para kay Leila. At mababasa ito sa aming mensahe: “Kalayaan ni Leila, Kalayaan ng Lahat”. Sa mga nagdaang taon mababasa rin sa mga pahayag ng mga sumusuporta kay Leila ang mensaheng: “Laban ni Leila, laban ng lahat”. Matagal man ang anim na taon, naririyan pa rin ang lahat ng sumusuporta kay Leila. Naririyan din si Leila na walang kakupas-kupas ang pananalig sa Diyos at ang pag-asang lalaya siya sa tamang oras. Kailan man iyon ay laging maririnig na namumutawi sa kanyang bibig: “Basta’t lalaya ako dahil alam kong wala akong kasalanan.”

At muling nagulat ang lahat nang lumabas ang balita noong nakaraang Biyernes, ika-16 ng Hunyo 2023. Nagbitiw (inhibit) sa kaso ni Leila si Judge Buenaventura ng Muntinlupa Regional Trial Court 256. Nangyari ito pagkatapos na mag-file ng “Motion to Inhibit” sina Ronnie Dayan, Joenel Sanchez at Franklin Bucayu. Ibinunyag din ng tatlo na kapatid ni Judge Buenaventura si Atty. Emmanuel Buenaventura na tumulong kay Dayan na gawin ang affidavit niya laban kay Leila na sa pahayag ni Dayan ay sapilitang pinagawa sa kanya. Napag-alaman din ng tatlo na dati ring abogado si Atty. Emmanuel Buenaventura ni Rep. Reynaldo Umali na Chairman ng Justice Panel ng Kongreso. Sinabi rin ni Judge Buenaventura na bagama’t hindi siya matitinag ninuman sa kanyang mga desisyon, bibitiw na siya sa kaso ni Leila para hindi makompromiso ang sistema ng katarungan.

Walang tiyak na makapagsasabi kung bakit ito ang naging katapusan ng paghawak ni Judge Buenaventura sa kaso ni Leila. Bagama’t meron at merong maaaring sabihin ang sinuman, sapat nang magpasalamat sa maituturing na positibong pagpihit ng gulong ng katarungan. Kaya’t aabangan ng lahat ang anunsyo kung kailan ira-raffle ang kaso at kung sinong judge ang hahawak sa huling kaso ni Leila. Sa ngayon, sapat nang magtulung-tulong pa rin ang lahat upang suportahan ang laban ng dating senadora.

Anuman ang tunay na dahilan sa pagbibitiw ni Judge Buenaventura sa kaso ay hindi na mahalagang alamin. Kailangan nang magdasal na bigyan si Leila ng makatarungan at patas na hurado na hindi papipilit, paiimpluwensya ninuman sa direksyon ng kanyang mga desisyon.

Hindi lang isip ang pinagagana ng mga hurado kundi pati ang kanilang konsensya.

Meron at merong konsensya ang mga may hawak ng mga kaso ni Leila. Natitiyak natin na mas mahigit ang mga huradong mabait, maprinsipyo at may sariling desisyon. At isa sa kanila ang muling hahawak sa kaso ni Leila. Isa rin sa kanila ang magbibigay katarungan at kalayaan kay Leila.

Malinaw na hindi natutulog ang Diyos. Hindi Niya pababayaan ang malinis, marangal, ma-prinsipyong Leila. Walang ibang panggagalingan ang desisyong pinili ni Judge Buenaventura kundi ang itaas, ang Diyos ng langit at lupa. Maraming, maraming salamat po Panginoong Diyos.

Huwag maging bulag, pipi at bingi sa Maharlika Fund na mas magpapahirap sa taumbayan

ni Fr. Robert Reyes - @Kapaayapaan / Patakbo-takbo | June 19, 2023

Bumubuhos na ulan, nag-aalburotong bulkan, mapanganib na lindol. Anong mensahe dito ng Inang Kalikasan?

Magdadalawang linggo na kaming naglilimas ng tubig na galing sa tumutulong bubong ng simbahan. Mula ika-5 ng Hunyo hanggang sa mga araw na nagsimula ang banta ng pagdating ng Bagyong Chedeng, halos gabi-gabi habang bumubuhos ang ulan sa labas gayundin sa loob ng simbahan, limas dito, limas doon ang mga pari, sakristan, manggagawa at kabataan ng parokya.

Bagama’t nakakainis na maglimas sa loob ng simbahan dahil sa perhuwisyo at nakakapanghinayang na pagkasira ng mga kasangkapan, kagamitan, ilaw, breaker, speakers, computers, atbp dulot ng ulan, meron din namang biyayang tinatanggap.

Pagod at ginaw man ang nararamdaman namin habang naglilimas ng tubig at nagpapatuyo ng baldosa, ngunit masaya at nagdiriwang dahil nagkakaisa kami sa pagtutulungan at pagdadamayan para sa kapakanan ng simbahan at parokya.

Sa muling pag-aalburoto ng Bulkang Mayon ay naghahanda na ng malakihang paglikas ang pamahalaang lokal ng mga apektadong lugar. Nakakabahala ang Alert Level 3 na inilabas ng Phivolcs sa estado ng bulkan sa Albay, “Maaaring umagos ang lava at magkaroon ng pagsabog ng bulkan sa mga darating na araw.”

Hindi naman nag-aaksaya ng oras ang pamahalaang lokal na magbigay ng anumang palugit kaya’t pinalikas na sa lalong madaling panahon ang mga mamamayang nakatira malapit sa paligid ng bulkan. Binabantayan ng Phivolcs ang mga Pyroclastic Density Currents (PDC), ang pagragasa ng lava, bato at sari-saring na-emit na gas mula sa bulkan.

Hindi ramdam ng mga nakasakay sa MRT3 na pa-biyaheng Baclaran ang Intensity 6.2 na pagyanig noong nakaraang Huwebes ng umaga. Nagulat na lang kami na may mga nag-text na mga kaibigan na dinuduyan daw sila ng lindol sa 25 at 35 floor ng mga gusaling kinalalagyan nila. Habang bigla namang tumigil ang aming sinasakyang tren sa Guadalupe Station. Walang bumaba ng tren sa simula hanggang sa napansin naming nagbabaan na ng tren ang mga pasahero sa Northbound ng MRT. Walang anumang pagkadismaya na ibinulong sa akin ng matandang katabi ko, “Hindi ako aalis dito, dahil kung aalis din ang tren eh ‘di nakasakay pa rin ako sa kanya.” Malinaw na walang hinahabol si lolo, samantalang si Pader ay merong appointment ng alas-10 ng umaga pero alas-10:30 ng umaga ay hindi umuusad ang tren.

Hindi lang bumubulong si Inang Kalikasan, malinaw na sumisigaw ito sa mga taong tila nagbibingi-bingihan at nagbubulag-bulagan. At kasabay ng naitalang lindol sa bayan ng Calatagan ang balitang ipapasa na ang Maharlika Investment Fund. Alam kaya ni Inang Kalikasan ang hindi kanais-nais at kahina-hinalang bagong batas na gustong ipatupad ng gobyerno?

Subalit, nakakatulong pa rin si Inang Kalikasan sa pagkubli ang nilalaman ng mga bagay na dapat isiwalat.

Kahit na pinagtatalunan at ilan ay gustong ibasura ito sa dahilan kung hindi ito makakatulong bagkus makasasama pa sa nakararami. Ganito ang Maharlika Investment Fund, na masahol pa sa matinding ulan, mapanganib din sa marahas na pagsabog ng bulkan, at mapangwasak gaya ng malakas na lindol na sa aking pakiwari ay nagiging instrumento ng pagpapayaman nila.

Ano kaya ang hinihintay ng lahat, ang matinding paglubog natin sa kahirapan, ang pagkalugmok ng ating kabuhayan dahil sa pinipilit na Maharlika Investment Fund? Sino ba ng tunay na makikinabang ang mga mamamayan o mga lider ng pamahalaan?

Huwag nawa tayong maging bulag, pipi at bingi sa nagsusumigaw na katotohanan dahil mas pahirap ito sa kabuhayan ng taumbayan.