Parbusters Saso at Ardina, isang hakbang sa Olympics

ni Eddie M. Paez Jr. - @Sports | September 3, 2020

Lalo pang tumibay ang tsansa ni Fil-Japanese Yuka Saso na makakuha ng upuan sa women's golf event sa Japan sa susunod na taon matapos itong sumibad sa pang 30 baytang galing sa pang-46 na posisyon ayon pinakahuling talaan para sa Tokyo Olympics Golf Rankings.

Animnapung lady golfers lang ang papayagang maglaro sa Olympics sa susunod na taon at nililimitahan sa dalawang manlalaro lang kada bansa ang puwedeng pumalo sa event. At dahil sa pagpasok ng 19-taong-gulang na si Saso sa kalagitnaan ng elite roster, halos tiyak nang madadagdagan ang mga makakasama nina EJ Obiena (pole vault, athletics), Felix Eumir (boxing), Carlos Yulo (artistic gymnastics) at Irish Magno (boxing) sa pagpapakinang ng tatlong kulay ng bandila ng Pilipinas sa prestihiyosong sports event sa Japan sa 2021. Isa pang Pinay, si Dottie Ardina, ay nasa top 60 rin at posibleng makasama sa Tokyo Olympics.

Bukod dito, pumasok na rin sa top 100 ang Asian Games double gold medalist sa Rolex Women's World Golf Rankings at kasalukuyang hawak ang pang-76 na puwesto mula sa pagkakasadlak nito sa pang-287 na upuan bago nagsimula ang coronavirus pandemic.

Naging napakalaking instrumento sa malupit na pang-angat ni Saso sa pandaigdigang hagdan ay ang mainit niyang arangkada sa malupit na Japan Ladies Professional Golf Association (Japan LPGA) Tour. Tatlong torneo pa lang ang sinasalihan niya rito pero dalawang korona na ang kanyang naiuwi. Ang Youth Olympic Games silver medalist ang umakyat sa mga trono ng NEC Karuizawa 72 Golf Tournament (Nagano Prefecture) at ng Nitori Ladies Golf Tournament (Otaru Country Club, Hokkaido) Bukod pa rito ay pumanglima siya sa isa pang paligsahan na kanyang sinalihan (Earth Mondamine Cup, Chiba, Japan).

At ang masamang balita para sa mga karibal ng dalagita, inaasahan pang lalong huhusay si Saso dahil tila nagsisimula pa lang ito sa pag-aaral sa buhay professional.

GM Paragua, best performer; India at Russia, nagkampeon

ni Eddie M. Paez Jr. - @Sports | September 2, 2020

Idineklarang co-champions ang India at Russia sa isang maigting na labanang nauwi sa hindi inaasahang pagtatapos ng pinakaunang FIDE Online Chess Olympiad.

Sa best-of-three championship duel ng dalawang powerhouse na koponan, nauwi sa gitgitang 3.0-3.0 na tabla ang unang match. Russia ang nagkumahog para maitabla ang unang salpukan.

Opensiba naman ang India sa pangalawang match. Ang diskarte naman ng kinatawan ng Asya ay itabla ang mga top boards bago humataw sa lower boards kung saan sila lyamado. Sa kasamaang palad, naputulan ng koneksyon ang mga manlalaro ng India kaya ipinoste ang isang 4.5-1.5 na panalo.

Nagprotesta ang India at dagli namang nagsiyasat ang Appeals Committee. Napag-alamang malawakan ang pagkakaputol ng internet at may substansya ang protesta ng India. Dahil dito, nagdesisyon ang nagsasaayos na FIDE na gawing co-champions ang Russia at India. Si FIDE President Arkady Dvorkovich pa ang opisyal na nagpahayag ng desisyon.

Sosyo naman sa pagiging tersera ang mga semifinalists na Poland at tropang USA ni Grandmaster Wesley So. Ang world chess power na China, kampeon sa huling standard Chess Olympiad sa Batumi ay hindi man lang nakapasok sa final 4.

Ang Philippine Team o Agila naman ay nagsimulang kumamada ng mga panalo sa Division 2 ng torneo pero hindi nakapasok sa top 3 ng Pool A kaya naging miron na lang. Pero naging best performer naman ng Division 2 Pool A sa board 1 si GM Mark Paragua.

Sa kabilang dako, umangat naman galing sa Division 3 patungong Division 2 ang tropang International Physically Disabled Chess Association o IPCA ni Pinoy FIDE Master Sander Severino pero hindi napabilang sa unang tatlo finishers sa Pool nila kaya nagwakas na rin ang kanilang paglalakbay.