GM So, pinisak si Carlsen sa Champions Chess Showdown

ni Eddie M. Paez Jr. - @Sports | September 14, 2020

Pinisak ni Pinoy Grandmaster Wesley So sina Norwegian GM Magnus Carlsen at Russian GM Peter Svidler upang mapanatiling nasa tamang landas ang kanyang paghahangad na makuha ang titulo ng malupit na 2020 Champions Showdown: Chess 9LX Online.

Muling nasaksihan ang karibalang So-Carlsen at pinatunayan ng 26-taong-gulang na dating hari ng ahedres sa Pilipinas na pagdating sa Chess 960 o Fischer Random Chess, hindi uubra ang tikas ng world standard chess king na si Carlsen sa kanya. Ang malupit pa nito ay tangan ni So ang itim na piyesa nang daigin niya si Carlsen.

Matatandaang noong isang taon ay inilampaso ni So si Carlsen sa kanilang duwelo tungo sa pag-angkin ng titulong FIDE World Fischer Random Chess. Ito ay naganap sa mismong bansa ni Carlsen at dinurog niya ang puso ng mga tagapanood na Norwegians.

Sa bakbakan naman nila ni Svidler, kinain ng kampo ni So, tubong Cavite, ang dalawang pawns ng Ruso na naging sanhi ng bantang checkmate sa isang queen-knight endgame. Bukod sa dalawang panalo, may anim na draws din si So sa event.

Sa larong ito ng ahedres na pinasikat ni US GM Bobby Fischer, ang starting position ng mga piyesa ay laging magkakaiba kaya ang paghahanda ng mga chessers ay halos bokya na at ang kanilang natural na tikas sa board ang kanilang sinasandalan.

Sa kasalukuyan, nasa pangalawang puwesto si So kasama sina Carlsen at GM Hikaru Nakamura taglay ang apat na puntos. May 4.5 puntos naman si Armenian GM Levon Aronian upang pansamantalang hawakan ang liderato sa tatlong araw, siyam na round na kompetisyon. Naghihintay ang USD 37,500 para sa magkakampeon at halagang USD 25,000 para naman sa sesegunda. Ang cash pot sa torneo ay USD 150,000.

Kalahok din sa torneo sina GM Maxime Vachiere Lagrave (France), GM Leinier Dominguez (USA), GM Alireza Firouzja (Iran), GM at dating world champion Garry Kasparov ng Crotia.

Muling nakahablot ng korona si Saso sa Nitori Golf Tour

ni Eddie M. Paez Jr. - @Sports | September 1, 2020

Pinatunayan ni Fil-Japanese Yuka Saso na hindi tsamba ang kanyang mainit na arangkada sa Japan Ladies Professional Golf Association o JLPGA matapos niyang hablutin ang korona ng 2020 Nitori Ladies Golf Tournament sa Otaru, Hokkaido.

Isinumite ni Saso, may-ari ng pilak na medalya sa Youth Olympic Games (Argentina), ang isang 13-under-par 275 na iskor sa pagsasara ng apat na rounds ng bakbakan sa palaruan ng Otaru Country Club sa Hokkaido tungo sa trono. Dalawang palo ang naging layo niya sa pumangalawang sa Haponesang si Sakura Koiwai.

Ang troika nina Kana Mikashima, Ji Hee Lee at Mayu Hamada ay kumain ng alikabok at kumartada lang ng 285, sampung strokes sa likod nina Saso at Koiwai para sa pagsososyo sa pangatlong puwesto.

Bukod sa pabuyang JPY 36,000,000 na natanggap dahil sa pagiging kampeon, nagpatuloy ang paghahasik ng takot ng 19-anyos na golf phenom sa Asya dahil Ito na ang pangalawang sunod na kampeonato ni Saso sa malupit na golf tour sa Asya sa kabila ng pagiging rookie.

Kamakailan ay hinirang na reyna ang Asian Games double gold medalist sa NEC Karuizawa 72 Golf Tournament. Apat na strokes ang naging agwat niya sa kanyang pinakamalapit na karibal. Ang champion’s purse ni Saso ay JPY 14,400,000.

Sa kanyang unang torneo naman (Earth Mondamine Cup sa Chiba, Japan) umeksena siya bilang panglimang finisher. Dalawang palo lang ang naging agwat sa kanya ng mga nanguna. May naibulsang JPY 8,640,000 ang 19-taong-gulang na tubong Bulacan.

Bago nagsimula ang bakbakang Nitori, pumapangalawa na si Saso sa karera para sa Mercedes Benz Player of the Year. Sa hagarang ito, meron na siyang 276.80 puntos at gantimpalang salapi na JPY 23,040,000. Tanging nasa harap niya ang tumatrangkong si Ayake Watanabe na may 307 puntos at may naiuwi nang JPY 43,720,000 bilang pabuya. At dahil sa panalo, inaasahang ang rookie lady parbuster na ang mangunguna.

GM So, hinatak ang US sa online olympiad semis

ni Eddie M. Paez Jr. - @Sports | August 30, 2020

Ibinasura ni Pinoy Grandmaster Wesley So ang dalawang karibal mula sa Ukraine upang hatakin ang USA papunta sa semifinals ng malupit na FIDE Online Chess Olympiad.

Sa dalawang matches sa final 8, tinangay ng tropa ni So ang tagumpay para makuha ang karapatang makasagupa ang Russia sa kompetisyong apat na bansa na lang ang natitirang nakatayo.

Bukod sa USA at Russia, nasa semis na rin ang India at Poland. Tinalo ng India ang Armenia, 2.0-0.0 samantalang naungusan ng Poland ang Azerbaijan, 2.0-1.0.

Ang world chess power na China, kampeon sa huling standard Chess Olympiad sa Batumi ay laglag na sa kompetisyon. Ang Philippine Team o Agila naman ay nagsimulang kumamada ng mga panalo sa Division 2 ng torneo pero hindi nakapasok sa top 3 ng Pool A kaya naging miron na lang. Pero naging best performer naman ng Pool sa board 1 si GM Mark Paraguay.

Sa kabilang dako, umangat naman galing sa Division 3 patungong Division 2 ang tropang International Physically Disabled Chess Association o IPCA ni Pinoy FIDE Master Sander Severino pero hindi napabilang sa unang tatlong finishers sa Pool nila kaya nagwakas na rin ang kanilang paglalakbay.

Tiklop kay So si dating World Rapid Chess winner GM Vassily Ivanchuk sa unang salang ng 26-anyos at tubong Cavite na chesser sa quarterfinals upang pangunahan pagpoposte ng US ng isang 4.5-1.5 na panalo. Sa pangalawang salang sa board 1, dumapa naman si GM Anton Korobov sa dating hari ng ahedres sa Pilipinas at kasalukuyang hari ng Random Chess sa buong mundo sa 4.0-2.0 na tagumpay para pa rin sa Estados Unidos.