Pagdanganan, sasabak na uli sa Ladies PGA

ni Eddie M. Paez Jr. - @Sports | September 17, 2020

Muling sasabak sa hanay ng mga “pro parbusters” si Southeast Asian Games double gold medalist Bianca Pagdanganan ng Pilipinas sa dikdikang Ladies Professional Golf Association (LPGA) Cambia Portland Classic na hahataw sa loob ng apat na araw sa palaruan ng Columbian Edgewater Country Club sa Portland, Oregon simula ngayong Huwebes.

Nakahablot ng upuan sa kompetisyong may nakalaang na USD 1,750,000 para sa mga magpo-podium ang 22-taong-gulang na Pinay dahil sa pagpasok nito sa top-45 ng LPGA Qualifiers noong nakaraang taon.

Tatlong torneo na ang naging bahagi ng sumisibol na professional career ni Pagdanganan at sa ngayon ay hindi pa naoobligang lumingon sa tikas niya ang mga miron. Sa LPGA Drive-on Championships, tumapos lang siya sa pang-28 na puwesto samantalang sa Marathon LPGA Classic Presented by Dana, nasa pang 59 na baitang naman ang dalaga. Malayong pang-71 ang naging puwesto ng Pinay sa Walmart NW Arkansas Championships Presented By P&G.

Sa kabila nito, isang magandang aspeto ng laro ni Pagdanganan sa tatlong torneo ay hindi pa siya napapauwi sa kalagitnaan ng bakbakan dahil sa mapaklang iskor. Sa tatlong mga paligsahang nabanggit, nakatawid siya sa weekend play.

Isa pang pag-asa na nakikita ay ang potensiyal niyang makipagsabayan sa mga beterana ng tour nang minsan siyang humataw ng bihirang back-to-back eagle at minsan na rin siya nakapuwesto sa top 10 habang tumatakbo ang torneo bagamat kinapos siya sa dulo. Sa kabila nito, nakakulekta na ang Pinay ng USD 10,987 pabuya mula sa tatlong paligsahang nabanggit.

Kaya sa pagpalo ng Pinay sa 6,478 yardang greens sa Oregon, maraming golf apisyunado sa Pilipinas ang umaasang tataas na ang antas ng kanyang palo sa isa sa pinakamalupit na professional tour sa buong daigdig.

Mga boksingerong Aleman, nagkaroon ng COVID-19

ni Eddie M. Paez Jr. / Gerard Arce - @Sports | September 16, 2020

Hindi nakaligtas maging ang malalakas na pangangatawan ng 25-strong na German National Boxing team matapos mapag-alamang tinamaan ang “malaking bilang” ng miyembro nito ng coronavirus disease habang naghahanda para sa 2020 Tokyo Olympic Games sa Austrian Alps.

Iniulat ng German Boxing Federation na kinabibilangan ng 18 boksingero at 7 staff members ang kasalukuyang naka-quarantine sa isang training camp sa Laegenfeld sa Tirol, Austria, matapos kakitaan ng sintomas, ngunit nasa mabuting kondisyon.

“The boxers are now in quarantine. They aren’t showing strong symptoms and can even keep training,” wika ni DBV director Michael Mueller sa panayam ng AFP.

Ayon pa kay Mueller, mahigpit na binabantayan ang kondisyon ng mga atleta, habang papayagan na ang mga itong makabalik ng kanilang tahanan sa mga susunod na linggo, kung saan hindi nabanggit kung ilan ang eksaktong nakakuha ng COVID-19 sa grupo.

Inilathala rin ang reports ng pahayagan Der Spiegel ng Germany na nasimulang kakitaan ng mga senyales ng cold-like symptoms ang mga boksingero noong nakalipas na Martes, bago ang pagkumpirma sa hinihinalang COVID-19 noong nakaraang Miyerkules. Patuloy na nagsasanay ang mga national boxers nito kahit pa man naipagpaliban na ang 2020 Tokyo Olympics ngayong taon.

Tinukoy din ng German media ang pananatili ng mga boksingero sa Laegenfeld Hotel, kung saan namalagi rin ang koponan ng Bundesliga football club na Schalke 04 nitong huling linggo ng Agosto, na napag-alamang nagpositibo rin sa COVID-19 habang namamalagi sa nasabing lugar.

Ipinagtanggol naman ni Mueller ang desisyong dalhin ang boxing team sa Austria dahil mababa naman umano ang kaso ng coronavirus sa naturang lugar bago sila doon nagtungo.

Ayon naman sa ibang ulat, tulad umano ng ibang European countries, nakakita ng pagtaas ng kaso ng sakit sa Austria kamakailan. “We have gained some valuable experiences that we can use on our next trips,” saad ni Mueller. “Anyone who thinks the preparation for the Olympics can happen without any coronavirus cases, is not living in reality.”

Matatandaang nagdesisyon ang International Olympic Committee (IOC) at Japanese organizers na ipinagpaliban sa kauna-unahang pagkakataon sa kasaysayan ng Summer Games ang mga laro dahil sa nagaganap na pandemya sa buong mundo, samantalang inilipat na lamang sa bagong petsa na July 23-Agosto 8, 2021 ang kumpetisyon sa Tokyo, Japan.

Volleyball bubble nakahuli ng Coronavirus positive

ni Eddie M. Paez Jr. - @Sports | September 16, 2020

Nagsara na ang hatawan ng bola sa King of the Courts Competitions sa Utrecht, Netherland kung saan hinirang na kampeon ang mga tambalan mula sa Switzerland at Brazil ngunit umagaw ng eksena ang patuloy na pananalasa ng COVID- 19 sa larangan ng sports katulad ng beach volleyball.

Dahil sa bubble na inilatag ng mga tagapangasiwa na kinabibilangan din ng mga test protocols, napag-alamang dalawa sa mga kalahok ay positibo sa nakamamatay na coronavirus at kinailangan silang tanggalin sa kompetisyon.

Sinabi ng International Volleyball Federation o FIVB na mayroong COVID-19 sina Quentin Metral ng Switzerland at si David Schweiner na mula naman sa Czech Republic ilang linggo bago nagsimula ang event. Nakarekober ang dalawa kaya sila nakalahok sa torneo. Bilang bahagi ng mga pag-iingat, isinailalim uli sila sa PCR testing nang nasa loob na sila ng beach volleyball bubble. Positibo ang naging resulta ng test kaya nagsagawa na ng self-isolation at contact tracing.

Sa isang pahayag sa social media, sinabi ni Metral na, "Those two days in Utrechrt showed me that our sport has an enormous potential and that the media interest will continue to grow if the FIVB and @kingof thecourtbeach organize such event in the future. Unfortunately, it also showed me that Covid still has the upper hand this season. It will take sometime until International sport is back to normal."

Ang event ay isang beach volleyball variant kung saan nagpapalitan ng mga kakampi ang lahat ng kalahok. Itinuturing na kampeon ang mga manlalaro na may pinakamataas na bilang ng tagumpay.