Speedchess Monster, reresbak kay GM So

ni Eddie M. Paez Jr. - @Sports | December 10, 2020

Tahimik na pinupuntirya ni Pinoy Grandmaster Wesley So na patunayang hindi tsamba ang mga nakaraan niyang tagumpay kontra kay GM Hikaru “Speedchess Monster” Nakamura habang resbak naman ang saloobin ng huli sa paghaharap nila ngayong Huwebes sa semifinals ng iwas-pandemyang online 2020 Speed Chess Championships (SCC).

Grudge match na naituturing ang muling pagkikita ng dalawang élite online chessers. Noong 2018 at 2019 na mga edisyon ng SCC, hinirang na kampeon si Nakamura at ginawa niyang tuntuntungan paakyat sa trono sa mga pagkakataong iyon si So nang daigin niya sa finals ang tubong Cavite na karibal. “It’s payback time - so I’m going to be out for blood! I will say that much,” pahayag ni Nakamura.

Pero ngayong 2020, solido ang mga sulong ng 27-anyos na si So. Sa katatapos na Champions Chess Tour - Skilling Open, na nilalahukan ng 16 na pili at malulupit na chessers, naungusan ni So sa semis si Nakamura bago nasingitan sa finals para sa korona si Norwegian GM at world chess king Magnus Carlsen. Kasama rin sa gitgitang tagumpay ni So bago nakuha ang Skilling title ay ang pangingibabaw niya laban kay GM Teimour Radjabov ng Azerbaijan.

Kamakailan din ay ipinatong sa ulo ni So ang korona ng prestihiyosong US Chess Championship na ginanap din Online sa unang pagkakataon. Ito na ang pangalawang beses na naging US chess champion ang dating hari ng ahedres sa Pilipinas. Taong 2017 nang una siyang magkampeon sa US. Samantala, sa 2020 Saint Louis Rapid and Blitz Tournament naman, isang bakbakan sa larangan ng rapid chess at blitz chess, idineklara sila ni Carlsen bilang co-champions matapos silang makaipon ng 24 puntos.

PHL top 5 sa FIDE PWD Online Chess: Russia, nag- kampeon

ni Eddie M. Paez Jr. - @Sports | December 5, 2020

Itinanghal na kampeon ang unang team ng Russia matapos daigin ang Poland sa championship face-off sa pagsasara ang pinakaunang FIDE Online Chess Olympiad For People With Disabilities.

Nasikwat ng Ukraine ang tanso dahil sa pagdurog nito sa pangalawang koponan ng Poland sa kanilang sariling engkwentro para sa pangatlong posisyon. Dahil dito, nauwi sa isang 1-3 finish ng mga disipulo ng ahedres mula sa Poland.

Samantala, tinapos ng Pilipinas, sa pamumuno ni Team Captain James Infiesto at top board player at ni International Physically Disabled Chess Association (IPCA) world champion Sander Severino, ang torneo bilang bahagi ng unang limang bansa sa larangang ito ng ahedres.

Noong preliminaries, kung saan hangad ng mga kalahok na makapasok sa top 4 para sa semifinals, nakasosyo ng bansa para sa pang-apat hanggang pang-siyam na puwesto ang Poland 2, Poland 3, Germany, Russia 2 at Croatia dahil sa naipong tig-sasampung puntos. Matapos pairalin ang panuntunan sa tiebreak, pumanglima ang Pilipinas.

Kasama sa mga dinaig ng tropa ni FIDE Master Severino, na binubuo rin nina AGM Henry Lopez, untitled Darry Bernardo, Jasper Rom at Cheyzer Crystal Mendoza, ang Estados Unidos (4-0), Russia 2 (3-1), Ukraine (3-1) at topseed Poland (3-1). Nakatabla ng Pilipinas (2-2) ang mga chessers mula sa Canada at Israel.

Champion’s Chess Tour: So, sinilat si Speedchess Monster Nakamura

ni Eddie M. Paez Jr. - @Sports | November 30, 2020

Tuloy ang pagsulong sa trono ni Pinoy Grandmaster Wesley So matapos silatin si GM Hikaru “Speedchess Monster” Nakamura sa semifinals ng online na bakbakan sa paspasang ahedres na tinaguriang Champions Chess Tour: Skilling Open.

Pagkatapos ng dalawang 4-game series, nangibabaw ang 27-taong-gulang na chesser karga ang 4.5-3.5 na iskor mula sa isang panalo at pitong tabla. Halos ganito rin ang naging resulta sa kabilang hati ng semifinals nang nagliwanag ang husay ni GM Magnus Carlsen laban kay Russian GM Ian Nepomniachtchi.

Maghaharap sina So at ang world champion mula sa Norway na si Carlsen sa finals ng patimpalak na nilalahukan lang ng 16 na pili at malulupit na mga chessers mula sa iba’t-ibang parte ng daigdig para makaparte sa cash pot na $100,000.

Bukod sa pagbibigay ng sama ng loob kay Nakamura, maigting ang naging landas ng tubong Cavite na chesser papunta sa championship round.

Pumangatlo si So noong preliminaries tangay ang 8.5 puntos para makahakbang sa knockout stage kung saan unang humarang sa kanyang daanan si GM Teimour Radjabov ng Azerbaijan. Nameligro si So pagkatapos makatikim ng 1.5-2.5 na kahihiyan sa unang salpukan nila ni Radjabov. Naitabla niya ang sumunod na mini-series nila kaya nauwi sa rubber match na armagedon ang duwelo. Sa huli, naipagpag ni So ang karibal para makapasok sa round-of-4.

Puntirya ni So ang kanyang pangatlong korona ngayong 2020. Kamakailan, naitakbo niya ang kanyang pangalawang titulo sa prestihiyosong US Chess Championship (una siyang naging US Champion noong 2017). Noong 2020 Saint Louis Rapid and Blitz Tournament naman, isang bakbakan sa larangan ng rapid chess at blitz chess, idineklara sila ni Carlsen bilang co-champions matapos silang makaipon ng 24 puntos.