FIDE World Online Youth Chess: Claros, nasa top 5

ni Eddie M. Paez Jr. - @Sports | December 24, 2020

Tinapos ni April Joy Claros ng Pilipinas ang kanyang makulay na paglalakbay sa pandaigdigang palaruan ng ahedres nang makasosyo ng dalaginding sa panglimang puwesto ang tatlong iba pang kalahok sa Girls Under 14 ng pinakaunang FIDE Online World Youth and Cadet Championships.

Nakapasok sa podium sina Eline Roebers (1st, Netherlands), Woman FIDE Master Zsoka Gaal (2nd, Hungary) at Laysa Latifah (3rd, Indonesia) samantalang pumang-apat si Woman International Master Rocehlle Wu (USA).

Inilagay lang ng mga eksperto si Claros sa pangalawa sa kulelat sa mga may tsansang magwagi. Bilang 12th seed sa grupo ng 14 na mga kalahok, si Claros ay hindi inaasahang makakalusot sa unang sulungan ng knockout rounds. Tila hindi mapapahiya ang mga nagduda sa kakayanan niya dahil nang makaharap ni Claros ang paboritong si Woman Candidate Master Martyna Starosta ng Poland, tumiklop ang pambato ng bansa.

Isang draw na lang ang layo ni Starosta sa quarterfinals pero hindi ito nasaksihan dahil si Claros naman ang nagwagi sa pangalawang laro nila sa nabanggit na duwelo. Dahil dito, ginanap ang bakbakang Armagedon nina Starosta (Rating: 2094) at Claros (Rating: 1459) kung saan nagwagi ang huli kontra sa 3rd seed na Polish bet.

Si Claros ay bumangga sa husay ng Indonesian na si Latifah sa quarterfinals, 0-2, kaya hindi na ito nakapasok sa semifinals. Kasama sa panglima hanggang pangwalong puwesto ng batang Pinay si WCM Ruiyang Yan (USA), Macheld Foreest (Netherlands) at Shri Savitha (India).

Ang bituin mula sa Central Luzon ang pinakamakinang mula sa Philippine contingent. Pumangalawa siya sa Asian qualifiers na pinangunahan din ni Latifah. Si Michael Concio, sumabak sa Open Under 16 bilang top bet ng Asya, ay hindi nakaporma sa unang salpukan pa lang. Isa pang kinatawan ng bansa ay si Whisley King Puso sa Open Under 12 matapos mangibabaw sa Asian eliminations pero pinaratangan ng hindi patas na paglalaro kaya hindi pinasali sa world finals. Hindi nagpakita ng ebidensya ng pandaraya ang FIDE at nasa tuntunin din ng naturang qualifying tournament na hindi kinikilala ang anumang apila sa desisyon. Sinabi rin ng National Chess Federation of the Philippines na sumunod ang pambato ng bansa sa lahat ng tuntunin at wala namang pag-almang ginawa ang FIDE habang ginaganap ang paligsahan.

World One Pool 10x4: Carlo Biado, kampeon

ni Eddie M. Paez Jr. - @Sports | December 19, 2020

Itinanghal na kampeon si Carlo “The Black Tiger” Biado ng Pilipinas matapos itong mangibabaw sa apat na kataong finals kabilang na ang pangalawa sa pinakamalupit na cue artist sa mundo na si Joshua “The Killer” Filler ng Germany sa pinakaunang edisyon ng online na tumbukang tinawag na Predator One Pool 10x4 World One Pool 10-Ball Tournament.

Muling ipinakita ni Biado ang pormang nagbigay sa kanya ng gintong medalya sa 9-Ball event ng 2017 World Games at ng trono sa World Pool Billiards Association (WPA) 9-Ball Championships may tatlong taon na ang nakakalipas upang mamayagpag sa kakaibang torneo ng cue artists na tumutulong sa pagsawata sa pandemyang nagpabagal sa daigdig ng isports.

Umiskor si Biado sa finals ng 115 puntos kontra sa 93 puntos ni Filler, 103 puntos ni WPA no. 4 Fedor Gorst ng Russia at ang 42 ng sorpresang finalist na si Aloysius Yapp ng Singapore.

“All I can say is, Thank you everyone,” ani Biado, tumulong para maging runner-up ang bansa sa 2019 World Cup of Pool, sa isang pahayag ng pasasalamat at kagalakan. “All my hardwork really paid off. Mabuhay tayong mga Pinoy!” dagdag pa niya sa isang post sa social media.

Sa kahabaan ng paligsahan, hindi nawala ang tikas ng laro ng kampeong Pinoy. Noong unang salpukan sa knockout round, nagposte siya ng umuusok na 127 puntos, 112 puntos noong round-of-16 habang 116 puntos ang naging kartada niya nang ginanap ang semifinals.

Bukod kay Biado, nagningning din si Jayson Nuguid, isang Pinoy na nakabase sa United Arab Emirates bilang Hall Manager sa isang bilyaran, nang makapasok siya sa walo-kataong semifinals.

Hindi basta-basta ang mga naghangad na makaakyat sa trono pero pawang mga naglaway na lang dahil sa lupit ng Pinoy. Kabilang sa listahan sina Polish Konrad Jusczcyszy, Tyler Styler ng United States, mainstay ng World Cup of Pool Champion Austria na si Mario He, Hapones na si Naoyuki Oi, ang Rusong si Ruslan Chinakhov, Ralf Souquet ng Germany, Kastilang si David Alcaide at ang Italyanong si Stefano Delano.

Biado at Nuguid, swak sa World One Pool 10x4 QF

ni Eddie M. Paez Jr. - @Sports | December 16, 2020

Hindi pinabayaan nina Carlo Biado at Jayson Nuguid na magwakas ang kampanya ng Pilipinas sa harap ng matinding oposisyon nang matagumpay silang makapasok sa walo-kataong semifinals ng umiigting nang labanan sa pinakaunang edisyon ng online Predator One Pool 10x4 World One Pool 10-Ball Tournament.

Nanumbalik ang mainit na pagtumbok ni Biado, naging tanyag dahil sa pagiging gold medalist sa World Games 9-Ball event (2017) nang maging hari ng World Pool Billiards Association (WPA) 9-Ball Championship (2017), kaya ito maaliwalas na naka-arangkada sa kompetisyon. Kumana siya ng 112 puntos upang pangunahan ang kanyang round-of-16 bracket.

Malayo sa init ni “The Black Tiger” Biado ang 70 puntos ni ni Nuguid, isang Hall Manager ng isang bilyaran sa United Arab Emirates pero sapat na ito upang magpatuloy ang kanyang paglalakbay at upang gawin na lamang miron ang mga pamosong cue artists na sina Polish Konrad Jusczcyszyn (60 puntos) at Tyler Styler ng United States (43 puntos).

Nakapasok si Biado, bahagi rin ng Philippine Team na pumangalawa sa 2019 World Cup of Pool, sa knockout rounds ng paligsahan dahil sa mataas nitong estado sa mundo ng professional billiards samantalang si Nuguid, nakabase sa Abu Dhabi ay dumaan sa butas ng karayom nang pangunahan niya ang Tournament Qualifier No. 5. Ang iba pang kinatawan ng bansa (Oliver Villafuerte, Jordanel Banares at Elijah Alvarez) ay nahulog na sa sidelines.

Kasama pa ng dalawang Pinoy sa paghabol sa korona sina WPA no. 2 Joshua Filler (Germany), WPA no. 4 Fedor Gorst (Russia), mainstay ng World Cup of Pool Champion Austria na si Mario He, Roman Hybler (Czech Republic), Aloysius Yap (Singapore) at Jalal Alsarisi.