1,382 bagong kaso ng Omicron

ni Madel Moratillo @News | July 10, 2023

Nakapagtala ng 1,382 bagong kaso ng Omicron subvariants sa bansa sa loob lamang ng 3 araw.

Sa COVID-19 biosurveillance report ng Department of Health, ang mga ito ay mula sa

samples na isinailalim sa sequencing ng Baguio General Hospital Medical Center at UP Philippine Genome Center - Visayas mula Hunyo 26 hanggang 29.

Sa monitoring ng DOH, 1,251 rito ay XBB variant.

Sa bilang na ito, 139 ang XBB.1.5 cases; 217 ang XBB.1.16 cases; 366 ang XBB.1.9.1 cases; 60 ang XBB.1.9.2 cases; 326 ang XBB.2.3 cases; at 143 iba pang XBB sublineages.

Ang XBB ay variant under monitoring ng World Health Organization at variant of interest ng European Center for Disease Prevention and Control.

Mayroon ding 46 BA.2.3.20 cases; 35 BA.5 cases; 6 na XBC cases, 3 na BA.2.75 cases; 1 na BA.4 case; at 40 iba pang Omicron sublineages ang natukoy.

Ayon sa DOH, lahat ng XBB subvariants ay local cases mula sa halos lahat ng rehiyon sa bansa maliban sa Region 6, habang ang BA.2.3.20 cases ay mula Regions 1, 2, 3, 4A, 4B, 5, 7, 11, 12, CAR, Caraga, at NCR.

Habang ang BA.5 cases ay mula Regions 1, 2, 3, 4A, 5, 7, CAR, at NCR, habang ang XBC cases ay mula sa Regions 1, 12, at NCR.

May 3 BA.2.75 cases naman ang natukoy sa Regions 4B, CAR, at NCR, habang ang 1 na BA.4 case ay mula sa Region 4B.

Pag-alis sa COVID public health emergency, oks kay P-BBM — DOH

ni Mylene Alfonso | July 5, 2023

Pormal na utos na lamang ni Pangulong Ferdinand Marcos, Jr. ang kailangan upang tuluyang alisin ang COVID-19 public health emergency.

Ayon kay Health Secretary Teodoro Herbosa, sinabi sa kanya ng Pangulo na tila inalis na ang public health emergency dahil sa pagpapagaan ng mga COVID restrictions.

"Ang sabi niya (Marcos) kasi, de facto, parang naka-lift na rin tayo di ba? Optional na ang masking 'di ba? Hindi na in-extend 'yung ano...," wika ni Herbosa sa isang panayam.

"Wala pang formal, we're still waiting for the [order], eh, de facto naman tayo, ang dami na, nagpunta ko sa mall ang dami nang 'di nagma-mask eh," sabi pa ni Herbosa.

Ayon pa sa Kalihim, kabilang sa mga marching order ng Pangulo sa kanya ay ang makarekober mula sa COVID at makabangon ang ekonomiya.

"Basically ni-reiterate ko ‘to kanina during our sectoral meeting that we now consider COVID among health care workers as similar to other illnesses like cough, colds, influenza," saad ni Herbosa.

"But we still have to protect ourselves. I think the public health warning is you still have to protect yourself if you are vulnerable – and you still need to get the vaccine if you want to be specially protected," diin pa niya.

Matatandaang sinabi ni Herbosa na irerekomenda niya sa Palasyo na alisin ang COVID-19 state of public health emergency sa bansa makaraang ideklara na rin ng World Health Organization na tapos na ang pandemya.

2,747 bagong kaso ng COVID

ni Madel Moratillo | July 4, 2023

Nakapagtala ng 2,747 bagong kaso ng COVID-19 sa bansa nitong nakaraang linggo.

Sa datos ng Department of Health, mula June 26 hanggang July 2, ang average na arawang kaso ng COVID sa bansa ay 392.

Mas mababa naman ito ng 20 porsyento kung ikukumpara sa naitala mula June 19 hanggang 25.

May 32 namang bagong kaso ng severe at kritikal ang naitala habang 2 ang nadagdag sa listahan ng nasawi.

Una rito, iniulat ng OCTA Research Group na bumaba na sa 6.7 percent ang COVID-19 positivity rate sa bansa nitong Hulyo 2, mas mababa nang bahagya sa 6.9% noong Hulyo 1.

Habang sa National Capital Region naman ay bumaba pa sa 4.9% ang COVID-19 positivity rate hanggang nitong Hulyo 1.

Pasok ito sa 5% threshold na itinatakda ng World Health Organization (WHO) para sa positivity rate ng COVID-19.

Maliban sa NCR, pasok na rin sa naturang threshold ang mga lalawigan ng Laguna, na mula sa dating 7.6% positivity rate noong Hunyo 24 ay nasa 5.0% na lamang nitong

Hulyo 1, at ang lalawigan ng Rizal, na mula sa dating 7.3% noong Hunyo 24 ay nasa 4.7% na lamang nitong Hulyo 1.