Filipinas, babawian ang Bangladesh sa AFC Cup

ni Anthony E. Servinio @Sports | September 22, 2023

Laro ngayong Biyernes – Hanoi, Vietnam

5 p.m. Bangladesh vs. Pilipinas

Natalisod ang Philippine Women’s Football National Team laban sa Australia, 6-2, sa pagbubukas ng 2024 Under-17 AFC Women’s Asian Cup Qualifier Round Two Miyerkules sa Vietnam Youth Football Training Center sa Hanoi. Nasayang ang dalawang maagang goal ni Nina Mathelus at bumanat ng anim na goal ang Australia upang maagaw ang tagumpay.

Madaling ipinasok ni Mathelus ang iginawad na penalty kick sa ika-siyam minuto. Tatlong minuto pa lang ang lumilipas ay dinoble niya ang lamang sa isa pang goal subalit hanggang doon na lang ang Filipinas sa unang opisyal na laban ni Sinisa Cohadzic bilang head coach.

Sumandal ang Australia sa mga goal nina Grace Kuilamu (30’) at Ruby Cuthbert (42’) upang maitabla ang laro pagsapit ng halftime, 2-2. Pinalamang agad ni Shelby McMahon sa unang minuto ng second half at sinundan ng mga goal nina Lillian Skelly (55’), Talia Younis (76’) at penalty ni Mikayla Duong (88’).

Sisikapin ng mga Filipinas ang buhayin ang kampanya laban sa Bangladesh ngayong Biyernes sa parehong palaruan simula 5:00 ng hapon, oras sa Pilipinas. Galing din sa pagkatalo ang Bangladesh sa host Vietnam, 2-0, at dahil do ay maaaring magsilbing knockout ang laro sa Filipinas.

Nakapasok ng tatlong beses ang Bangladesh sa torneo noong unang edisyon 2006 at huling dalawa noong 2017 at 2019. Hindi pa naglalaro ang Pilipinas sa Under-17 o dati nitong pangalan Under-16 Women’s Asian Cup.

Kasama ang kanyang apat na goal sa Round One noong Abril, katabla ni Mathelus si Rinyaphat Moondong ng Thailand na may anim na goal sa qualifiers. Si Won Ju-Eun ng Timog Korea ang kasalukuyang nangunguna sa paramihan ng goal na may pito.

Women's Booters, masusubok ng Hong Kong sa Hangzhou

ni Anthony E. Servinio @Sports | September 22, 2023

Laro ngayong Biyernes – Wenzhou Sports Center

4:00 PM Pilipinas vs. Hong Kong

Maglilikha ng bagong kasaysayan ang philippine women’s football national team sa kanilang pagsabak sa 19th Asian Games Hangzhou ngayong Biyernes laban sa Hong Kong sa Wenzhou Sports Center simula 4 p.m. Inilabas na ng Philippine Football Federation ang opisyal na listahan ng 21 na pinakaunang kinatawan ng bansa sa 33 taon na may Women's Football sa palaro.

Tampok dito ang 14 beterana ng 2023 FIFA Women’s World Cup na sina Sarina Bolden, Hali Long, Quinley Quezada, Sara Eggesvik, Meryll Serrano, Katrina Guillou, Sofia Harrison, Jessika Cowart, Reina Bonta, Jaclyn Sawicki, Anicka Castaneda, Chandler McDaniel, Kiara Fontanilla at Olivia McDaniel. Inakyat ang mga reserba noong World Cup na sina Inna Palacios at Isabella Pasion habang babalik sa pambansang koponan sina Eva Madarang, Camille Rodriguez, Natalie Oca, Kaya Hawkinson at Alisha del Campo.

Ito ang magiging unang pagsubok sa bagong talagang coach Mark Torcaso na pinalitan si Coach Alen Stajcic na hindi pumirma ng bagong kontrata matapos ang World Cup. May paunang listahan na isinumite noong Hulyo sa kalagitnaan ng World Cup subalit kinailangan itong baguhin at may ilang hindi makakasama.

Mabigat na paborito ang Pilipinas sa bisa ng kanilang 4-0 tagumpay sa Hong Kong noong 2024 Paris Olympics Qualifiers Round One noong Abril. Naka-dalawang goal si Bolden at tig-isa sina Serrano at Quezada kasabay ng matibay na depensa ni goalkeeper Olivia McDaniel.

Ang iba pang laro ng Filipinas sa Grupo E ay kontra Timog Korea sa 25 at Myanmar sa 28. Ang mga numero uno ng Grupo A hanggang E at ang tatlong may pinakamataas na kartada sa limang magpapangalawa ay tutuloy sa knockout quarterfinals.

Shandong Taishan, pinasuko ang Kaya FC Iloilo sa AFC

ni Anthony E. Servinio @Sports | September 21, 2023

Lumaban ng sabayan ang Kaya FC Iloilo bago isuko ang 3-1 desisyon sa bisitang Shandong Taishan Martes ng gabi sa makasaysayang pinakaunang opisyal na laro ng AFC Champions League sa Pilipinas. Nanatiling matatag ang Kaya, ang kampeon ng Philippines Football League (PFL), at nagtapos na walang goal ang first half subalit iba ang usapan pagdating ng second half at nanaig ang kalidad ng kalaro.

Biglang gumuho ang Kaya makalipas ang mahigit isang oras ng mainitang aksiyon at pinatawan si Ricardo Sendra ng penalty matapos niyang patirin si Moises malapit sa goal. Walang kabang ipinasok ng Brazilian ang penalty kick at nabahiran ang mahusay na ipinapakita hanggang sa puntong iyon ni Kaya goalkeeper Quincy Kammeraad.

Dumoble ang lamang sa ika-71 minuto nang lusutan ng isa pang Brazilian import na si Matheus Pato ang depensa para maging 2-0. Pumalag pa rin ang Kaya at bumawi si Sendra at ipinasa ang bola sa tumatakbong si Jarvey Gayoso para lumapit sa ika-80 minuto, 1-2.

Subalit gabi talaga ng Shandong at sa gitna ng kalituhan habang nagpapalit ng manlalaro ang Kaya ay naisingit ni Cryzan ang pandiin na goal sa ika-96. May isang pagkakataon pa ang Kaya na bawasan ang agwat ngunit matagumpay na naharang ng depensa ang huling sipa ni Sendra at pumito na ang reperi.

Kahit bigo, ipinagmalaki pa rin ni Coach Colum Curtis ang kanyang koponan at nakita niya ang trinabaho nila sa nakalipas na anim na linggo. Para kay Coach Choi Kang Hee ng Shandong, sinita niya ang ulan at basang lupa para sa kanilang mabagal na simula pero nasanay na sila sa paglipas ng laro.

Lalakbay ang Kaya para harapin ang Incheon United ng Timog Korea sa Oktubre 3 at Yokohama F Marinos ng Japan sa 25. Ang susunod na laro nila sa Rizal Memorial ay kontra Yokohoma sa Nobyembre 7.