FIBA 3x3 World Tour balik bakbakan sa Cebu

ni Anthony E. Servinio @Sports | September 23, 2023

Mga laro ngayong Sabado – SM Seaside City

12:45 p.m. Lubao MCFASolver vs. Taichung

1:55 p.m. Lubao MCFASolver vs. Auckland

4:20 p.m. Vienna vs. Manila Chooks

8:20 p.m. Futian vs. Manila Chooks

Cebu City – Magbabalik ang pinakamataas na antas ng professional 3x3 sa ikalawang edisyon ng FIBA3x3 World Tour Cebu Masters ngayong Sabado sa SM Seaside City. Tiyak na magiging mahigpitan ang labanan at nakaakit ang torneo ng lima sa Top 10 koponan sa pinakabagong FIBA3x3 World Ranking.

Aani ng pansin ang numero unong koponan na Ub Huishan NE ng Serbia na tampok sina Strahinja Stojacic, Dejan Majstorovic at Marko Brankovic na #1, #2 at #3 sa FIBA3x3 Player Ranking at #6 Nemanja Barac. Sisikapin ng Ub na sundan ang kanilang kampeonato sa Manila Masters noong Mayo.

Nabunot ang Ub sa Grupo A kasama ang Sansar MMC Energy ng Mongolia at Wuxi ng Tsina. Nasa Grupo B ang #2 Amsterdam, Paris ng Pransiya at San Juan ng Puerto Rico.

Pangungunahan ng Manila Chooks ang pagtanggol sa Pilipinas laban sa mga banyaga.

Sasamahan ang numero unong manlalarong Pinoy Mark Jayven Tallo nina Marcus Hammonds, Marquez Letcher-Ellis at Tosh Sesay.

Nabunot ang Manila sa Grupo C kasama ang Vienna ng #5 Austria at Futian ng Tsina. Maglalaro sa Vienna si Stefan Stojacic na minsan nagsilbing coach ng programa ng Chooks 3x3 at kuya ni Strahinja ng Ub.

Ang isa pang koponang Filipino na Lubao MCFASolver ay kailangang dumaan muna sa qualifying kontra Auckland ng New Zealand at Taichung Hong Jia ng Chinese-Taipei simula 12:45 ng hapon. Kung papalarin, tutuloy ang Lubao sa Grupo D kung saan naghihintay ang #8 Miami ng Estados Unidos at #9 Ulaanbaatar MMC Energy ng Mongolia.

U-17 Filipinas Booters, dapa ang Bangladesh sa AFC Cup

ni Anthony E. Servinio @Sports | September 23, 2023

Buhay na buhay pa rin ang pag-asa ng Philippine Women’s Football National Team at natamasa ang pinaghirapang 3-1 panalo sa Bangladesh sa pagpapatuloy ng 2024 AFC Under-17 Women’s Asian Cup Qualifiers Biyernes ng gabi sa Vietnam Youth Football Training Center sa Hanoi. Humugot ng inspirasyon ang mga dalagita sa kasabay na tagumpay ng kanilang mga ate kontra Hong Kong sa 19th Asian Games Hangzhou.

Nagpakita ng determinasyon ang Filipinas at lumikha agad ng goal si forward Isabella Preston sa ikatlong minuto pa lang. Naging saglit ang kasiyahan at itinabla ni Mst Sagorika ang laro makalipas ang isang minuto, 1-1.

Kung kailangan ng goal ay pinatunayan muli ni Nina Mathelus na talagang siya ay maaasahan at inihatid ang pang-lamang na goal sa ika-31 minuto. Ito na rin ang ika-pitong goal ni Mathelus sa torneo mula pa noong Round One noong Abril.

Sumunod ay sinikap ng mga Pinay na palakihin ang agwat upang makabawi sa kanilang masaklap na 2-6 pagkabigo sa Australia noong isang araw. Mahalaga ang lamang oras na manatiling tabla ang mga koponan sa pagwakas ng torneo.

Nahirapan hanapin ang mahalagang goal hanggang isinipa ni Jelena Pido ang paniguradong goal sa ika-95 minuto at bago ang huling pito ng reperi. Pumantay rin ang kartada ng pambansang koponan sa 1-1 panalo-talo.

Hahanapin na nila ang ginintuang tiket patungo sa kanilang unang Asian Cup laban sa host Vietnam ngayong Linggo sa parehong palaruan simula 8:00 gabi, oras sa Pilipinas.

Tinatapos ang tapatan ng Vietnam at Australia na parehong nagwagi sa una nilang mga laro noong Miyerkules.

Women's Booters, wagi vs. Hong Kong sa Asiad

ni Anthony E. Servinio @Sports | September 23, 2023

Laro ngayong Lunes – Wenzhou Sports Center

7:30 PM Timog Korea vs. Pilipinas

Umukit ng makapigil-hiningang 3-1 panalo ang Philippine Women’s Football National Team kontra Hong Kong para sa engrandeng simula ng kampanya sa 19th Asian Games Hangzhou sa Wenzhou Sports Center Biyernes ng gabi. Mga goal nina Sarina Bolden, Quinley Quezada at Katrina Guillou ang susi para patahimikin ang kalaro.

Tabla ang laro sa 1-1, ipinasok ni Quezada ang bola sa ika-89 minuto sa gitna ng kalituhan mula sa masikip na kumpulan sa harap ng goal ng Hong Kong at maagaw ang bentahe. Biglang gumuho ang Hong Kong at isinuko ang pandiin na goal ni Guillou sa ika-91 minuto at kumapit ang Filipinas sa nalalabing apat na minuto.

Maaga pa lang ay naka-goal si Bolden sa penalty kick sa ika-siyam na minuto bunga ng hand ball violation. Biglang ipinantay ni Cheung Wai Ki ang talaan sa ika-39 minuto sa kanyang malupit na sipa mula 17 metro na lumipad patungo sa kanto ng goal at hindi talaga maaabot ni goalkeeper Olivia McDaniel.

Nabuhayan ang Hong Kong at lalong naging palaban. Maraming pagkakataon ang Filipinas subalit may handang sagot ang depensa hanggang dumating ang milagro sa huling mga minuto at bigyan si bagong coach Mark Torcaso ng tagumpay sa kanyang unang opisyal na laro.

Susunod para sa Filipinas ang Timog Korea ngayong Lunes sa parehong palaruan simula 7:30 ng gabi, oras sa Pilipinas. Ang mga Koreana ang nag-uwi ng tanso sa 2018 Asian Games sa Palembang, Indonesia.