Ateneo, NU at Adamson, maagang paborito sa UAAP

ni Anthony E. Servinio @Sports | September 28, 2023

Mga laro sa Sabado – MOA Arena

2 p.m. UE vs. UST

4 p.m. UP vs. AdU

Magbubukas ang 86th University Athletic Association of the Philippines (UAAP) sa Sabado sa MOA Arena sa pangunguna ng host University of the East. Matapos ang dalawang taon na pagbangon sa pandemya, balik sa dating sigla ang pangunahing ligang pampaaralan ng bansa taglay ang temang “Fueling The Future.”

Nagkakaisa muli ang 8 coaches ng Men’s Basketball na bukas ang karera subalit lumalabas na maagang paborito ang defending champion Ateneo de Manila University at mga kanilang nakasama sa Final 4 na University of the Philippines, National University at Adamson. Subalit hindi pahuhuli ang De La Salle, Far Eastern University, University of Santo Tomas at host UE bunga ng kinuhang bagong manlalaro.

Sa ngayon, nakatutok ang pansin ng mga coach sa kanilang unang mga laro simula sa pagharap ng UE sa UST sa Sabado simula ng 2 p.m. at susundan ng Ateneo kontra NU sa 4:00. Sa Linggo ang tapatan ng DLSU at FEU at UP laban sa Adamson.

Ito na rin ang unang sabak ng bagong talagang Commissioner Xavier Nunag at kanyang Deputy Atty. Mariana Lopa na parehong mga dating manlalaro para sa UP at Ateneo. Isa pang pagbabago ngayong taon ang pagiging bahagi ng mga coach at atleta ng Women’s Basketball sa pambungad na pulong balitaan noong Miyerkules.

Mananatiling hindi kikilalanin ng UAAP ang Special Guest License ng Games and Amusements Board (GAB) subalit ayon kay Executive Director Atty. Rebo Saguisag na bukas ang liga na pag-aralan ang mga kasong dala ng mga apektadong sports tulad ng Basketball, Volleyball, Football at Chess. Maaaring magkaroon ng pagkakataon na maibalik sa atleta ang karapatan na maglaro sa liga matapos makakuha ng SGL pero kailangan may mga matupad na pangangailangan tulad ng pag-upo ng isang taon.

Gilas Women wagi sa Kazakhs, 3x3 Men's, shoot sa Twinkill

ni Anthony E. Servinio @Sports | September 28, 2023

Laro ngayong Biyernes - Shaoxing Olympic Sports Center

1:30 PM Hong Kong vs. Pilipinas

Sinimulan ng Gilas Pilipinas Women ang kanilang kampanya sa 19th Asian Games Hangzhou sa isang kumbinsidong 83-59 panalo sa Kazakhstan Miyerkules ng gabi sa Shaoxing Olympic Sports Center. Ito ang pinakaunang beses sa kasaysayan ng palaro na lumahok ang bansa sa Women's Basketball.

Pumukol ng pitong three-points si Janine Pontejos para sa lahat ng kanyang 21 puntos.

Nabitin sa double-double si Jack Animam na siyam na puntos at 12 rebound.

First half pa lang ay idinikta ng Gilas ang takbo ng laro at itinayo ang 40-26 lamang.

Doon pa lang ay umangat sina Animam para sa walo at Afril Bernardino para sa pitong puntos.

Susunod para sa mga Pinay ang Hong Kong ngayong Biyernes. Tatapusin nila ang aksiyon sa Grupo B kontra Japan, ang bansang nag-uwi ng tanso noong 2018 sa Indonesia, sa darating na Linggo.

Determinadong bumawi ang pambansang koponan matapos mapilitan umatras sa Women's 3x3 dahil hindi pumayag ang nangangasiwa ng torneo na magpalit sila ng ilang manlalaro. Ayon sa mga bagong patakaran, ang 3x3 ay bukas sa mga edad 23 pababa at bawal ang maglaro ng parehong 3x3 at Basketball.

Samantala, dobleng selebrasyon para sa 3x3 team ng men's basketball nang magwagi rin sila sa unang laro sa 19th Asian Games sa Hangzhou, China.

Miami, kampeon sa FIBA 3x3 World Tour Cebu

ni Anthony E. Servinio @Sports | September 27, 2023

Tunay na nasa kapalaran ng Miami na maiuwi ang kampeonato sa 2023 FIBA3x3 World Tour Cebu Masters Linggo ng gabi sa SM Seaside City. Sa likod ni MVP Jimmer Fredette, pinabagsak ng mga Amerikano ang hamon ng Vienna ng Austria, 22-19, at walisin ang kanilang limang laro.

Binubuo ng eksaktong apat na pambansang koponan na pumangalawa sa Serbia sa 2023 FIBA3x3 World Cup noong Hunyo, isinalba sila ng dating NBA player Fredette na winakasan ang laro sa kanyang 2-points na may 46 segundong nalalabi at ibulsa ang $40,000 (P2.27 milyon). Ang iba pang kasapi ng kampeon ay sina Kareem Maddox, Dylan Travis at Canyon Barry na anak ng NBA alamat na si Rick Barry.

Patungo sa korona, nakaganti kahit paano ang Miami sa Ub Huishan NE sa semifinals, 21-13. Karamihan ng Ub ay kumatawan din sa kampeon na Serbia sa nakalipas na World Cup.

Sa quarterfinals, nagtrabaho ng husto ang Miami upang pauwiin ang San Juan ng Puerto Rico, 21-17. Nagwagi ang mga Amerikano sa group stage sa Lubao MCFASolver ng Pilipinas, 22-15, at Ulaanbaatar MMC Energy ng Mongolia, 21-18.

Sa Slam Dunk Contest bago ang finals, nanaig si Rafal “Lipek” Lipinski ng Poland kontra kay Pinoy David Carlos. Nag-uwi ang kampeon ng $4,000 (P227,048).

Samantala, nagkakasundo ang numero unong Pinoy 3x3 player Mark Jayven Tallo at Coach Chico Lanete na malaki ang maiitulong ng pagtapos ng ika-walo ang Manila Chooks sa Cebu Masters. Mahigit na isang taon na hindi nakakatikim ang mga koponan ng Chooks sa World Tour at gusto nila na dalhin ang positibong pakiramdam sa mga susunod nilang torneo tulad ng Al Bidda Park Challenger sa Qatar sa Oktubre 17 at 18 at Abu Dhabi Masters sa Oktubre sa Oktubre 28 at 29.