Dahilan kung bakit ‘di dapat gobyerno lang ang kumikilos ‘pag may problema, alamin!

ni Sr. Socrates Magnus II - @Karunungang Lihim| June 29, 2020

Bigyang-daan natin ang mahahalagang bagay na dapat isabuhay, may COVID-19 pandemic man o wala.

Kung ano ang natutunan mo sa iyong mga naranasan, ito ang masisilbing gabay mo sa buhay, kaya ang tanong, anu-ano ang mga naranasan mo ngayong may COVID-19 pandemic na puwede mong mapakinabangan?

Ang mga pangako mula sa mga awtoridad ay huwag asahan. Napansin mo ba na ang pangako na may tulong-pinansiyal para sa mga unang buwan ng lockdown ay hindi agad naipamigay?

Buti na lang, ang mga tao ay hindi “kabayo” dahil kung nagkataong kabayo ang mga tao, sabi ng kasabihan, “Aanhin pa ang damo kung patay na ang kabayo?”

Pero wala namang bago para sa mga Pinoy sa ganitong nakaugalian ng mga awtoridad dahil kung ating matatandaan, noong Bagyong Yolanda, gutom na gutom na ang mga tao pero hindi pa rin dumarating ang tulong ng pamahalaan.

Kaya parang hindi naman natuto ang mga bagong nasa pamahalaan dahil paulit-ulit lang ang paghihirap ng mga taong biktima ng kalamidad.

Kung may natutunan sa dalawang katotohanang ito sa kasaysayan ng ating bansa, hindi na gaanong malulungkot dahil ito ay normal lang sa ating mga namumuno. Kaya muli, huwag umasa at huwag maging palaasa.

Mas magandang isabuhay ay ang mag-ipon kahit pakonti-konti. Kumbaga, kahit pa barya-barya lang ay tiyak na dadami ang iyong naiipong pera. Pero ang walang ipon ay sama lang ng loob ang aabutin dahil sa sitwasyon natin ngayon, kailangang magalit muna at magmura ang presidente bago tumupad sa tungkulin ang mga namamahala.

Nakakaawa rin ang presidente dahil gusto niyang sa loob ng tatlong araw ay magagawa na ng mga nasa puwesto ang pagtulong sa mamamayan.

Pero ngayon, alam na ni Pres. Duterte na siya ay bigo sa kanyang matinding hangarin na mabilis na pagtulong sa mamamayan.

Dahil dito, may aral din tayong dapat matutunan na nagsasabing sarili lang natin ang dapat asahan sa lahat ng panahon ng ating buhay.

Magpasalamat tayo sa ayuda ng pamahalaan kahit sobrang naantala ito dahil kahit paano ay nakatulong ito sa atin.

Magpasalamat din tayo sa mga pribadong sektor, samahan at kumpanya na nagbibigay ng mga ayuda.

At ang isa pang mahalaga, kapag tayo ay may ipon dahil ipon tayo nang ipon, kapag dumating ang hindi inaasahang kagipitan, bilang indibidwal, tayo ay dapat ding tumulong sa ating kababayan.

Itutuloy

Dahilan kung bakit dapat isabuhay ang mga natutunan ngayong may COVID-19 pandemic

ni Sr. Socrates Magnus II - @Karunungang Lihim| June 26, 2020

Bigyang-daan natin ang mahahalagang bagay na dapat isabuhay, may COVID-19 pandemic man o wala.

May isa pang susi ang tagumpay na kapag isinapuso ng tao ay malabong bumagsak ang kanyang negosyo o buhay.

Ito ay ang “Dapat may natutunan sa buhay o negosyo mo.” Ang salitang “natutunan” ay tumutukoy sa nangyari na at sa pangyayaring ‘yun ay may nakuha kang aral o mahalagang impormasyon.

Ang totoo, hindi lang ito applicable sa negosyo dahil ito ay para sa lahat ng aspeto ng buhay. Kumbaga, kung sino ang may natutunan sa nakaraan, siya ay may malaking tsansa na umabante o hindi na muli pang mabigo, masaktan, malugi o mawalan.

Tulad ngayong may COVID-19 pandemic, ang tanong, may natutunan ka ba sa buhay mo? Dapat ang sagot ay “oo” dahil kung wala kang natutunan, wala kang pag-asa sa buhay.

Narito ang ilang mahahalagang bagay na dapat na bulay-bulayin na naranasan ng marami ngayong may COVID-19 pandemic.

Ang walang naipon noon ay sobrang takot magutom. Kaya para hindi na maulit na takot na takot ka, from now on, ikaw ay mag-iipon.

May mga bayan at siyudad na nagsawa sa relief operations o pamimigay ng ayuda sa mga tao. Nakakatuwa na malaman na ang bigas na kilo-kilong naibigay sa kanila ay marami pa hanggang ngayon. Mahirap paniwalaan, pero marami ang nagsasasabi na kahit lumagpas pa ang month of July, sila ay may isasaing pa.

Kahit ang ganitong bagay ay masarap marinig at maranasan, ang mga tao ay hindi dapat maging palaasa sa gobyerno. Dapat tandaan na ang tunay na negosyante ay walang ugaling palaasa o umaasa sa kahit na sino. Ang tunay na negosyante ay kumikilos, nag-iisip at nagnenegosyo hindi dahil umaasa siya sa kapwa o sa iba na bibigyan siya ng grasya.

Ang mga hindi negosyante ay dapat ding hindi magiging palaasa dahil ang palaasa ay hindi na aasenso kahit kailan. Ang katotohanang ito ay hindi mahirap malaman kung sadyang totoo dahil makikita sa mga miyembro ng pamilya na ang palaasa o umaasa lang sa bigay o tulong ng may kayang miyembro ng pamilya ay mabubuhay dahil sa bigay o tulong ng kapamilya. Ang nakagugulat pang dagdag na kaalaman ay nagagalit pa siya kapag hindi napagbigyan ang kanyang mga request. Kumbaga, nakukuha pa niyang magtampo kapag siya ay nabigo sa kanyang hinihinging tulong.

Kaya maganda rin naman ang ibang bayan o siyudad na hindi napabayaan ng kanilang mga pamahalaan dahil kahit may pangangailangan ang mga tao, naghahanap sila ng maitutulong sa kanyang sarili maliban pa sa tulong ng gobyerno.

Pero marami ring bayan ang hindi malaman kung ano ang nangyari sa isip ng namumuno sa kanila dahil ang mga relief goods na ipinamimigay ay mga luma na. Ang mga bigas ay may amoy, insekto at dumi na hindi malaman kung saan nanggaling.

Ang moral lesson ay muli, kung may ipon ka, hindi ka maghihirap sa panahon ng kagipitan o pangangailangan.

Itutuloy

Personal kagustuhan, ‘di dapat maging basehan sa pagpili ng negosyo na papatok sa masa

ni Sr. Socrates Magnus II - @Karunungang Lihim| June 24, 2020

Bigyang-daan natin ang ilang bagay na puwedeng isabuhay ngayon at pagkatapos ng COVID-19 pandemic.

Hindi puwedeng hindi tayo kikilos para mabuhay. Takot man tayo o hindi sa anumang karamdaman, kailangan pa rin nating isipin kung paano tayo kakain araw-araw.

Kumbaga, dapat tayong lumaban sa hamon ng ating mga kapalaran. Laban lang dahil wala rin tayong magagawa kundi ang lumaban. Sa paglaban, hindi away ang ating hahanapin dahil ito ay nagsasabi na kumilos tayo para sa ating kinabukasan.

Tulad ng nasabi sa nakaraang isyu, ang online selling ay isang klase ng paglaban sa hamon ng kapalaran. Ito ay dahil hindi gaanong safe ang physical contact at kung hindi man ito maiiwasan, dapat ay limitado lang.

Sa online selling ay parang “online sari-sari store” kung saan ang mga paninda ay tulad sa sari-sari store o kung ano ang mga produktong palaging kailangan ng tao, ‘yun ang kanilang paninda.

Kaya simple lang ang paraan upang mapabilis ang pag-asesno sa online sari-sari store. Muli, ang itinda ay ang madaling maubos, ibig sabihin, ito ang mga panindang gustung-gusto ng mga tao kaya binibili nila agad.

Sa pasimula, 10 paninda lang muna, kaya ang mga produktong ito ang dapat na pinakamabili. Madali lang namang matukoy kung anu-ano ang mga ito.

Itanong mo sa palengke na suki mo kung ano ang pinakamabiling produkto sa kanila. Muli, sampung produkto lang ang iyong paunang paninda at dahil ito ang pinakamabili, tiyak mabibili agad ang paninda mo.

Sa ganitong paraan, maiiwasan mo ang numero-unong dahilan ng pagbagsak ng mga sari-sari store o grocery na ang paninda ay hindi naman kabilang sa mabibiling produkto na gustung-gusto ng mga tao.

Huwag kang magkamali. Muli, kung ano ang gusto ng mamimili, ‘yun ang iyong ititinda. Pero ano ba ‘yung pagkakamali na madalas maging sanhi ng pagkalugi o pagsasara ng mga tindahan?

Ito ay kung ano ang gusto ng may-ari, ‘yun ang kanyang itinitinda. Mali, ‘di ba? Dahil ang utos ay kung ano ang gusto ng mamimili, ‘yun ang ibebenta.

Kaya makikitang ang tanong ay hindi kung ano ang pinakamasustansiya, pinakamaganda at pinakamaganda ang kalidad. Ang mga ‘yan ay hindi puwedeng batayan upang mabilis na mabenta ang mga paninda. Muli, kung ano ang gusto ng mga tao, ‘yun ang iyong ititinda kahit pa ang gusto nilang ito ay hindi mo personal na gusto.

Itutuloy