Para walang gulo.. "WOW, It's More Fun! Love, The Philippines!" na lang — Sen. Lapid

ni Mylene Alfonso | July 7, 2023

Inirekomenda ni Senador Lito Lapid sa Department of Tourism na maaaring gamiting bagong tourism slogan ang “WOW, It’s more fun! Love, the Philippines!”.

Ito ang ibinigay na suhestiyon ni Lapid sa gitna ng kontrobersiya na nilikha ng bagong "Love the Philippines" campaign slogan ng DOT na sa kanyang palagay ay maaaring

magtuldok sa kontrobersiya.

Nabatid na ito ay ang pinagsama-samang dating slogan ng DOT ng bansa kung saan ang “Wow Philippines” na sumikat din noon ay kay dating Tourism Sec. Dick Gordon, ang “It’s more fun in the Philippines” kina dating Tourism Secs. Ramon Jimenez ar Bernadette Romulo-Puyat at ang bagong slogan na “Love the Philippines” kay Tourism Sec. Christina Frasco.

Naniniwala ang senador na kapag pinag-isa ang mga nabanggit na slogan ay mas lalakas pa ang turismo sa Pilipinas.

Kaugnay nito, idinepensa ni Lapid si Frasco sa mga batikos matapos lumabas ang kontrobersyal na promotional video na mga stock footages mula sa ibang bansa at hindi sa Pilipinas.

"Wala po akong nakitang malisya o layuning manloko ng mga tao lalo na kung titingnan natin ito na para lamang sa mga opisyal ng DOT at iba pang “internal stakeholder” at hindi pa pampubliko," wika ni Lapid.

"Hindi pa po nagagawa ang aktuwal na patalastas na gagamitin sa kampanya," dagdag pa ng senador.

Pramis ni P-BBM.. Pera ng bayan, maingat na ginagasta

ni Mylene Alfonso | July 6, 2023

Pinanatili ni Pangulong Ferdinand Marcos, Jr., ang pangako nito na maingat na pamamahala sa pananalapi.

Ito ay sa pamamagitan ng Medium-Term Fiscal Framework (MTFF), na nagsisilbing blueprint ng pamahalaan upang mapababa ang fiscal deficit nang hindi nagdaragdag ng inflationary pressures.

Sa unang limang buwan ng 2023, ang deficit ng National Government ay P326.3 bilyon kung saan bumaba ng 28.9% kumpara sa parehong panahon noong 2022.

Kaugnay nito, bumaba umano ang inflation rate sa ikalimang magkakasunod na buwan noong Hunyo 2023 sa 5.4%, mula sa 6.1% noong Mayo at sa pinakamababang antas nito mula noong 5.4% na naitala noong Mayo 2022 sa ilalim ng pamahalaan ni Marcos.

Nabatid na ang June inflation rate ay nasa loob ng 5.3 hanggang 6.1 percent forecast range ng Bangko Sentral ng Pilipinas (BSP) at napirmi sa ibaba ng median na pagtatantya na 5.5% ng mga pribadong analyst.

Ang patuloy na downtrend na ito ay pangunahin dahil sa mas mabagal na pagtaas ng pagkain at mga inuming hindi alkohol, transportasyon, at pabahay, tubig, kuryente, gas at iba pang mga panggatong.

Bumagal ang seasonally adjusted month-on-month (MoM) inflation sa 0.1 percent noong Hunyo 2023, mula sa 0.3 percent monthly rate noong nakaraang buwan.

"Maraming trabaho ang naghihintay upang epektibong ibalik ang inflation sa target at matiyak ang matatag na presyo. Ang pangkat ng ekonomiya ay handang harapin ang mga darating na hamon at ibaba ang halaga ng pamumuhay, habang pinapaunlad ang isang matatag na kapaligirang pang-ekonomiya na nakakatulong sa paglago at katatagan ng macroeconomic,” ani Finance Sec. Benjamin E. Diokno.

Patuloy na pinagsasama-sama umano ng gobyerno ang mga pagsisikap upang matiyak ang napapanahong pagsusuri ng demand at supply ng mga pangunahing bilihin sa pamamagitan ng Inter-agency Committee on Inflation and Market Outlook (IAC-IMO), na ginawang pormal at nilikha sa pamamagitan ng Executive Order No. 28, serye ng 2023.

Muli ring binuo ng Pangulo ang El Niño Task Force upang matugunan ang mga potensyal na epekto sa produksyon ng pagkain.

Singil sa CR ng mga mall, iimbestigahan

ni Mylene Alfonso | July 6, 2023

Ipinag-utos ni Manila Mayor Honey Lacuna ang imbestigasyon sa mga mall na labis kung maningil sa paggamit ng kanilang dapat sana ay public toilets.

Inatasan ni Lacuna si City Administrator Bernie Ang na sulatan ang mga mall owner sa Maynila upang tiyakin ang practice ng paniningil kapalit ng paggamit ng kanilang comfort rooms.

Hinikayat din ni Lacuna ang mga mall owner na ihinto na ang ganitong practice ng paniningil dahil ito ay anti-poor at lihis sa regulasyong itinakda ng local government sa pamamahala ng kanilang operasyon.

Inutos din ng alkalde ang imbestigasyon sa reklamo ng isang taga-media na siningil ng P20 sa paggamit ng comfort room sa isang mall sa Binondo. Sa resibong ibinigay sa kanya ay P10 lang ang nakalagay.

Ayon kay Ang, ang mga shopping malls ay binigyan ng permit ng city government na mag-operate sa kondisyong magpo-provide sila ng mga facility na kailangan ng kanilang customers at kabilang na rito ang public comfort rooms na magagamit nang libre.

Habang ang shopping malls ay private-owned establishments, sinabi ni Ang na ang city government ay maaaring i-regulate ang kanilang operations at magpatupad ng kautusan kung ang operasyon ng mall ay detrimental o taliwas na sa kapakanan at interes ng publiko.

Dahil sa reklamo, sinabi ni Ang na ang nasabing mall ay nakagawa ng pagkakamali nang mag-issue ito ng resibo na nakasulat ay P10 lamang, pero ang sinisingil ay P20.

Nagbabala ang city administrator sa paglabag ng kondisyon dahil ito ay grounds para sa penalties at maging pagkakasara ng mall.