OEC ng OFWs, gawing libre — P-BBM

ni Mylene Alfonso | July 10, 2023

Inatasan ni Pangulong Ferdinand Marcos, Jr. ang Department of Migrant Workers (DMW) at ang iba pang ahensya, na gawing libre ang aplikasyon para sa Overseas Employment Certifications (OEC) bilang pagpupugay sa serbisyo at sipag ng mga Pilipinong manggagawa.

Ayon sa Presidential Communications (PCO), inilabas ng Pangulo ang direktiba sa pakikipagpulong sa DMW, Bureau of Immigration (BI), at Department of Information and Communications Technology (DICT) sa Palasyo kung saan ipinakita ng migrant agency ang DMW Mobile App.

Ayon kay DMW Secretary Maria Susana ‘Toots’ Ople, hinihintay na lamang nila ang pag-apruba ng DICT para sa opisyal na paglulunsad ng “DMW Mobile App” upang matiyak ang cybersecurity features nito.

"Kaunting hintay na lang po. Kami po ay nakikinig sa inyo. Alam namin na napakalaking bagay ‘yung OEC. So, ginagawa po naming lahat para ma-address itong issue na ito with the use of technology. So, abangan n'yo na lang po. Kaunting pasensya pa po pero malapit na ang ating launch," dugtong ng kalihim.

Ayon sa PCO, naglalaman ang app ng OFW pass, isang digital at secure na bersyon ng OEC, o ang digital identity ng mga migrant workers.

Matapos ang dalawa hanggang tatlong buwan, papalitan ng OEC ang OFW pass sa pag-activate nito.

Nabatid na ang OFW Pass ay QR-code generated at maaari lamang makuha sa pamamagitan ng mobile application, habang ang OEC ay kailangang iproseso on-site na may P100 application fee.

Inaasahan din na isasama ng ahensya ang Mobile App nito sa eTravel at e-Gate system ng BI, at ili-link ito sa eGov PH Super App ng DICT.

Kapag naaprubahan, ang DMW Mobile App ay maa-access sa Google Play at Apple App Store.

Chief De Lemos, nagsori sa ‘NBI scandal’

ni Mylene Alfonso @News | July 8, 2023

Humingi ng paumanhin si National Bureau of Investigation (NBI) Director Medardo De Lemos kaugnay sa nag-viral na sexy dancing sa ginanap na command conference ng ahensya noong Hunyo 30.

"Una sa lahat humihingi kami ng paumanhin dahil hindi namin intensyon makasakit ng damdamin ng ating kababaihan. Kung naging offensive man ang pagsasayaw na ito noong June 30 after ng command conference sa sensibilities ng ating mga mamamayan lalo na ating kababaihan, humihingi po kami ng paumanhin," pahayag ni De Lemos.

Ipinaliwanag ni De Lemos na noong araw na 'yun ay tapos na umano ang command conference at mayroong fellowship para magkaroon ng bonding ang kanilang mga regional officers at mga national officers dito sa Manila.

Sinabi ni De Lemos na wala siya noong nangyari ‘yung sayawan at dumating siya alas-5:30 ng hapon noong magsisimula na ang fellowship at maaga umano siyang umalis.

Kaugnay nito, tiniyak ni De Lemos na pinaiimbestigahan na niya ang sexy dancing para malaman kung sino ang nag-imbita, nagdala ng dancer at kung sino ang nagpahintulot na mag-perform sila sa NBI socials.

Aalamin din niya kung sino ang dapat managot sa naturang pagkakamali.

"Nais namin i-emphasize, we would like to stress we will never tolerate indecency in the agency. Kung nandoon ako malamang napahinto natin ‘yung sumayaw na ito,” dagdag pa ng opisyal.

Alinsunod sa Civil Service rules at ng opisina papatawan umano ng parusa ang may pakana nito.

Tiniyak din ni De Lemos na hindi na ito mauulit kung saan nadamay ang buong ahensya sa pagkakamali.

Batas, aprub.. Utang ng mga magsasaka, burado na

ni Mylene Alfonso @News | July 8, 2023

Tinupad ni Pangulong Ferdinand Marcos, Jr., ang kanyang pangako sa mga magsasaka na palayain sila sa utang matapos ang paglagda kahapon sa New Agrarian Emancipation Act, na pakikinabangan ng mahigit 600,000 Pilipinong magsasaka sa buong bansa.

“Sa kauna-unahan ko na State of the Nation Address ay nasabi ko at ipinangako ko sa ating mga kababayan na itutuloy ang Agrarian Reform Program. I am here today to build on that promise because our beneficiaries deserve nothing less,” ani P-BBM sa kanyang talumpati matapos lagdaan ang batas sa Kalayaan Hall sa Malacañang.

Ang New Agrarian Emancipation Act, o Republic Act (RA) No.11593 ay pakikinabangan ng 610,054 magsasaka na nagbubungkal ng mahigit 1.7 milyong ektarya ng mga lupain ng agrarian reform lands upang makalaya na sa kanilang pagkakautang mula sa P57.56 bilyon na agrarian arrears.

Sa ilalim ng umiiral na agrarian laws, ang bawat agrarian reform beneficiary (ARB) ay kailangang magbayad ng halaga ng lupang ibinigay sa kanya sa loob ng 30 taon na may anim na porsyentong interes.

“Panahon na para makalaya sila sa pagkakautang na ito. This is why on 13 September 2022, I signed Executive Order No. 4, imposing a one-year moratorium on the payment of amortization on agrarian debt by our beneficiaries,” pahayag ni Marcos.

Pinasalamatan ng Pangulo ang sangay ng Lehislatura sa pagtugon sa panawagan ng mga magsasaka.

Ikinokonsidera ng batas ang lahat ng hindi nabayarang amortization, kabilang ang mga interes at surcharge, para sa mga iginawad na lupa sa ilalim ng RA No. 6657, o ang Comprehensive Agrarian Reform Law, at iba pang mga batas sa repormang agraryo.

Ang mga ito ay dapat pagbigyan, sa kondisyon na ang mga ARB na ito ay may pagkakautang sa gobyerno sa pagtatapos ng 2022.

Ang mga pangunahing pautang na nagkakahalaga ng P14.5 bilyon sa 263,622 ARBs, na ang mga pangalan at detalye ng pautang ay isinumite ng Landbank of the Philippines sa Kongreso, ay dapat tanggapin nang tahasan.

Ang condonation ng natitirang P43.06 bilyon na pautang ng 346,432 ARBs ay magkakabisa sa pagsusumite ng mga detalye ng pagkakautang ng ARBs ng LBP at ng Department of Agrarian Reform (DAR) sa Kongreso.

Aakuin din ng gobyerno ang obligasyon para sa pagbabayad ng makatarungang kompensasyon sa mga may-ari ng lupa sa ilalim ng Voluntary Land Transfer o Direct Payment schemes para sa benepisyo ng 10,201 ARB na may kabuuang mga dapat bayaran na P206.25 milyon.