Pangmatagalang solusyon sa krisis sa tubig

ni Mylene Alfonso @News | July 17, 2023

Iginiit ng isang mambabatas ang kahalagahan ng pagpapalakas ng water conservation efforts at pagpapatupad ng sustainable practices, kasunod ng napipintong kakulangan sa tubig dulot ng El Niño phenomenon.

“Kailangan din po natin sa mga ahensya ng gobyerno, sa mga LGUs, lalo na sa mga barangay level, mas paigtingin po natin ‘yung kampanya sa water conservation. Kung hindi naman po kailangan, ‘wag n’yong gamitin ‘yung tubig, i-check n’yo (kung may) mga leakage (para) walang masayang. Gamitin lang natin nang tama para hindi tayo magkaroon ng water shortage,” ayon kay Sen. Bong Go, sa isang panayam sa kanyang pagbisita sa Carcar City.

Tinukoy din ang obligasyon ng mga water service providers na makapaghatid ng tuluy-tuloy at walang patid na serbisyo sa publiko.

Una nang inihayag ni Department of Environment and Natural Resources (DENR) Undersecretary Carlos David na ang bansa ay mayroon pang sapat na suplay ng tubig, ngunit binigyang-diin ang kahalagahan ng tamang pangangasiwa.

Naglabas din ang Water Resources Management Office (WRMO) ng DENR ng Bulletin No. 1, na nagsasaad ng mga gabay para sa mga government building administrator kaugnay ng water management practices.

Iminungkahi rin ni Go ang isang intensified greening program bilang isang pangmatagalang solusyon.

“Kailangan na mas maraming punongkahoy na itatanim natin sa ating mga watershed. When I say greening program, hindi lang magtanim ng seedlings, tapos iwanan na. Kailangan po mayroong follow-up. Kaya po tayo mayroong DENR din po na puwedeng mamahala rito,” ani Go.

Modernisasyon vs. taas-singil sa kuryente at brownout

ni Mylene Alfonso @News | July 17, 2023

Patuloy ang joint investigation ng Senate Committee on Energy at Committee on Public Services kaugnay sa malaking problema sa brownout sa iba’t ibang bahagi ng bansa bunsod ng mababang uri ng pamamalakad ng electric cooperatives.

Kaugnay nito, ayon kay Senadora Grace Poe, chairman ng Senate Committee on Public Services, ang pagpasok ng mga private players tulad ng More Electric and Power Corporation (More Power), ang susi para mapabuti ang power service at maiwasan na ang paulit-ulit na brownout.

Ayon sa mambabatas, sa loob lamang ng tatlong taon mula nang mabigyan ng legislative franchise ay nagawang maresolba ng kumpanya ang malaking problema sa brownout at mataas na singil sa kuryente sa Iloilo City.

Ayon naman kay More Power President and Chief Executive Officer Roel Castro, mula nang i-takeover ng kumpanya ang power supply sa Iloilo City mula sa Panay Electric Company (PECO) ay nakapag-invest na ng P1.5 bilyong halaga ng investments na nakatuon para sa modernisasyon ng power distribution facilities.

Bunsod ng modernisasyon, nabawasan ng 90% ang power interruptions, naiwasan ang overloading at illegal connections na nagresulta sa pagbaba ng system loss na ipinapasa sa mga consumer, ang response time sa consumer complaints ay agad ding natutugunan sa loob lamang ng 10 hanggang 15 minuto at bumaba ang singil sa kuryente.

PAGCOR logo, P3M.. "Bagong Pilipinas", walang gastos

ni Mylene Alfonso @News | July 17, 2023

Nilinaw ng Presidential Communications Office (PCO) na walang anumang gastos ang pamahalaan kaugnay sa inilunsad na "Bagong Pilipinas" logo.

Ginawa ng PCO ang paliwanag sa gitna ng kontrobersya sa "Love the Philippines" campaign logo ng Department of Tourism (DOT) at bagong logo ng Philippine Amusement and Gaming Corporation (PAGCOR).

Ayon sa PCO, pinagtrabahuhan nila ang logo upang matiyak ang pagsunod sa heraldic code.

"The logo was produced internally by the Presidential Communications Office and underwent complete staff work to ensure adherence to the heraldic code," wika ng PCO.

"The Bagong Pilipinas logo embodies the Marcos Administration’s vision for the country, emphasizing unity, involvement, and the bayanihan culture as the main fibers and components for its full realization," nakasaad pa sa pahayag ng PCO.

Nabatid na ang "Bagong Pilipinas" logo ay isang visual representation ng Pilipinas tungo sa hinaharap.

Sumasagisag naman ang tatlong pulang stripes sa mga makabuluhang panahon ng pag-unlad sa kasaysayan kabilang ang post-war agricultural at rural development; post-colonial period; at ang kasalukuyang metropolitan development.

Ang dalawang asul na guhit naman ay kumakatawan sa mga layunin para sa hinaharap, isang progresibong Pilipinas na nakakasabay sa teknolohiya sa pagtataguyod ng sustainable industrial development.

Ang pagsikat ng araw sa logo ay nagpapahiwatig ng bukang-liwayway ng isang bagong Pilipinas na sumisimbolo sa pagnanais ng bansa na maging sentro ng global market at mga nasyon sa mundo.

Ang weave pattern naman ay naglalarawan ng pagkakaugnay at pagkakaisa ng sambayanang Pilipino dahil ang bisyon ng Bagong Pilipinas ay makakamit lamang sa pamamagitan ng sama-samang pagsisikap, pagtutulungan, at pagkakaisa sa pag-usad.

Una nang inilunsad ng Palasyo ang “Bagong Pilipinas” campaign bilang bago umanong “brand” ng governance at leadership sa ilalim ng administrasyon ni Pangulong Ferdinand R. Marcos, Jr., tungo sa full economic recovery.

Pirmado ni Executive Secretary Lucas Bersamin ang Memorandum Circular (MC) No. 24 noong Hulyo 3, 2023 at inilabas ng Malacañang nitong Linggo, Hulyo 16, kung saan magiging bahagi ang “Bagong Pilipinas” ng branding at communications strategy ng National Government.

Sa ilalim ng tatlong pahinang memorandum, inaatasan ang lahat ng national government agencies (NGAs), government-owned or -controlled corporations (GOCCs), state universities at colleges (SUCs), na i-adopt ang “Bagong Pilipinas” campaign sa kanilang mga programa, aktibidad, at proyekto.

Inatasan din ang naturang mga ahensya na gamitin ang logo ng “Bagong Pilipinas” sa letterheads, websites, official social media accounts, at iba pang dokumento na nakatuon sa flagship programs ng gobyerno.