Inireklamong nanlimas ng computer shop.. 5 Pulis-Maynila, lumantad

ni Mylene Alfonso @News | July 18, 2023

Itinanggi ng 5 pulis-Maynila ang alegasyon laban sa kanila na pagnanakaw, ng may-ari ng computer shop na si Hermiginildo Dela Cruz, 73, ng Maynila.

Nagbigay ng pahayag sina Staff Sgts. Ryann Tagle Paculan, Jan Erwin Santiago Isaac; Cpl. Jonmark Gonzales Dabucol; at Patrolmans Jeremiah Sesma Pascual, at John Lester Reyes Pagar, pawang mga miyembro ng MPD-DPIOU, kasama ang kanilang mga abogado sa tanggapan ng Manila Prosecutors Office matapos isampa ang kasong paglabag sa Article 295 (Robbery with Intimidation), ng revised penal code.

Iginiit ng mga pulis na wala silang kinuhang P40,000 at P3,500 na kita sa nasabing shop. Si Dela Cruz din umano mismo ang nag-alok ng P4,000 kada linggo pero ito ay hindi nila tinanggap.

Sinabi pa umano ni Dela Cruz na may kamag-anak siyang mataas na opisyal.

Anila, Hulyo 7, nang makatanggap sila ng impormasyon hinggil sa isang computer shop na nagsasagawa umano ng ilegal na online casino kaya pinuntahan ito.

Tumanggi umano si Dela Cruz na buksan ang computer sa shop dahil wala umamo silang search warrant.

Nanindigan naman ang mga pulis na mas gusto nilang lumabas ang CCTV footages sa shop dahil 'yun ang magpapatunay sa kanilang pahayag.

Pramis na P20 na bigas, wala pa.. Ginagawa namin ang lahat — Marcos

ni Mylene Alfonso @News | July 18, 2023

Iginiit ni Pangulong Ferdinand Marcos, Jr. na ginagawa na ng kanyang administrasyon ang lahat upang matupad ang kanyang pangako sa kampanya na ibaba ang presyo ng bigas sa P20 kada kilo.

"Iyong ating hangarin na 20 pesos na bigas [kada kilo] eh wala pa tayo roon, pero ginagawa natin ang lahat," wika ni Marcos sa kanyang talumpati sa nationwide launching kahapon ng Kadiwa ng Pangulo program sa San Fernando City, Pampanga.

"Ang programa ng Kadiwa ay napakasimple lamang... [Ang] ginagawa natin ay pinapalapit natin sa magsasaka ang palengke. Kaya iyang mga middleman at added cost ay binabawasan natin nang husto iyan," ayon pa sa Pangulo.

Nabatid din na layunin ng proyekto na mabigyan ng direktang mapagbebentahan ng kani-kanilang produkto ang mga magsasaka, mangingisda at maging ang mga micro, small, and medium enterprises (MSMEs).

‘Di lang sa OOTD.. P-BBM, problemado sa speech sa SONA

ni Mylene Alfonso @News | July 18, 2023

Halos isang linggo na lamang bago ang kanyang ikalawang State of the Nation Address (SONA), inamin ni Pangulong Ferdinand Marcos, Jr., na “nag-aalala” siya sa pagbuo ng kanyang talumpati sa darating na Lunes, Hulyo 24.

Kaugnay nito, nabanggit din ni Marcos na wala pa rin siyang naiisip kung ano ang kanyang susuotin sa ikalawang SONA na gaganapin sa House of Representatives.

“SONA preparations, hindi ko pa naisip kung ano ang susuotin ko. We’ve been worried about writing the speech,” ani Marcos sa ambush interview sa San Fernando City, Pampanga nang tanungin kung ano na ang kanyang preparasyon sa nalalapit na SONA.

Gayunman, sinabi ng Pangulo na inaasahang ihahayag niya ang mga nagawa ng kanyang administrasyon sa loob ng isang taon.

“It’s really very simple. It’s just a performance report for Filipinos to see sa dami ng mga pronouncements, sa dami ng mga salita, kung ito ba ay talagang may kabuluhan, salita lamang,” ayon pa sa Pangulo.

“We’ll see. That’s what I want to explain to people, that we have made significant progress. We can see the difference now, not only in terms of how the systems work, how the government works, it is also how we are seen or judged in the international community. That’s equally important,” pagtatapos ng Punong Ehekutibo.