Vigor Mendoza, bagong LTO Chief

ni Mylene Alfonso @News | July 17, 2023

Itinalaga si Vigor Mendoza II, bilang bagong pinuno ng Land Transportation Office (LTO).

Ito ang inanunsyo kahapon ng Presidential Communications Office (PCO).

Pinalitan ni Mendoza si dating LTO chief Jay Art Tugade, na nagbitiw noong Mayo dahil sa “differing methods” sa Department of Transportation.

Si Mendoza ay dating kinatawan ng 1-United Transport Alliance Koalisyon (1-UTAK) Partylist.

Nabatid na nagtapos sa Ateneo de Manila University, si Mendoza at naging board member ng Land Transportation Franchising and Regulatory Board (LTFRB).

Cash ayuda sa mahihirap.. 4Ps, sana matapos na — Marcos

ni Mylene Alfonso @News | July 19, 2023

Umaasa si Pangulong Ferdinand Marcos, Jr., na balang araw posibleng itigil na ang Pantawid Pamilyang Pilipino Program (4Ps), ang conditional cash transfer program ng bansa.

Ito ay makaraang pangunahan ang Walang Gutom 2027: Food Stamp Program Kick-off Activity sa Tondo, Maynila kasama sina Bise Presidente Sara Duterte-Carpio, DSWD Secretary Rex Gatchalian at Mayor Honey Lacuna-Pangan.

"Sana, ibig sabihin kasi kapag kaya nating itigil 'yan... ibig sabihin wala nang nangangailangan. Eh, maganda talaga kung maabot natin 'yun," reaksyon ni Marcos sa isang panayam kung tatanggalin na ang 4Ps ngayong may food stamp program na.

Ayon sa Pangulo, magpapatuloy pa rin sa pagbibigay ng tulong sa mga Pilipino lalo na sa mga apektado ng kalamidad ngunit ang 4Ps ay maaaring makatulong lamang na maitawid sila sa kahirapan.

Nabatid na ang mga target na benepisyaryo sa food stamp program ay makakatanggap ng food credits na nagkakahalaga ng P3,000 na magagamit sa pagbili ng pagkain mula sa DSWD-accredited local retailers.

Ang programa ay sa pakikipagtulungan ng Asian Development Bank (ADB) na nagbigay ng 3 milyong dolyar para sa anim na buwang pilot run ng food program.

Nag-meeting sa China.. Pinag-usapan nina ex-P-Du30 at Pres. Xi Jinping, 'di ko alam — P-BBM

ni Mylene Alfonso @News | July 19, 2023

Batid ni Pangulong Ferdinand Marcos, Jr. ang pagtungo ni ex-President Rodrigo Duterte sa China. Ito ay kasunod na rin ng pahayag ng Department of Foreign Affairs na walang "official information" ang Beijing trip ni Duterte.

Ayon kay Marcos, welcome sa kanya ang anumang bagong linya ng komunikasyon sa gitna ng isyu sa South China Sea.

Tiniyak ng Pangulo na sasabihin din ni Duterte sa pamahalaan ng Pilipinas ang detalye ng kanilang naging pag-uusap ni Chinese President Xi Jinping at kung paano ito makakaapekto sa bansa.

"No. Nagpermiso? Hindi naman kasi... alam ko naman na pupunta siya. At magkaibigan sila, magkakilala sila," tugon ni Marcos nang tanungin kung binigyan niya ng basbas si Duterte nang magpunta sa China sa isang panayam.

"So, I hope that napag-usapan nila 'yung mga isyu na ngayon na mga nakikita natin, 'yung mga shadowing, 'yung mga kung anu-ano," pahayag ni Marcos.

"All of these things that we are seeing now I hope napag-usapan nila para naman magkaroon tayo ng progress, kasi 'yun naman talaga ang habol natin eh, patuloy ang pag-uusap," ayon pa sa Pangulo.

"If that is President PRRD then good. Hindi importante sa akin kung sino, kung ano, basta't may makausap sila baka makatulong eh. I am sure that he will have ah, hindi naman report, I am sure he will be able to tell us what happened during their conversation and see how that affects us," banggit pa ni Marcos.