Bagyo at tigil-pasada, sabay pa — P-BBM.. NCR, walang pasok sa SONA

ni Mylene Alfonso @News | July 23, 2023

Aprubado ni Pangulong Ferdinand Marcos, Jr., ang suspensyon ng klase at trabaho sa Metro Manila.

Ito ay upang matiyak ang kaligtasan ng publiko sa pananalasa ng Bagyong Egay at maibsan ang epekto ng tigil-pasada kasabay ng ikalawang State of the Nation Address (SONA) ng Pangulo, bukas Hulyo 24.

Ginawa ng Palasyo ang anunsyo matapos na lagdaan ni Executive Secretary Lucas Bersamin ang Memorandum Circular No. 25 noong Hulyo 21, at inilabas kahapon.

“In view of the forecasted inclement weather brought about by Typhoon ‘Egay’ and the scheduled seventy-two (72)-hour transport strike in Metro Manila, work in government offices and classes in public schools at all levels in the National Capital Region are hereby suspended on 24 July 2023,” nakasaad sa memorandum circular.

Gayunman, nilinaw ni Bersamin na ang mga ahensya ng gobyerno na naghahatid ng mga pangunahin at serbisyong pangkalusugan, kahandaan/tugon sa mga sakuna at kalamidad, at/o ang pagganap ng iba pang mahahalagang serbisyo ay dapat magpatuloy sa kanilang operasyon.

Nilinaw din ng Executive Secretary na nasa pagpapasya ng kani-kanilang mga head ang pagsususpinde ng trabaho para sa mga pribadong kumpanya at klase sa mga pribadong paaralan.

COVID public health emergency sa 'Pinas, inalis na ni P-BBM

ni Mylene Alfonso @News | July 23, 2023

Pormal nang inalis ni Pangulong Ferdinand Marcos, Jr., ang State of Public Health Emergency sa buong Pilipinas na dulot ng COVID-19.

“All prior orders, memoranda, and issuances that are effective only during the State of Public Health Emergency shall be deemed withdrawn, revoked or canceled and shall no longer be in effect,” ayon sa Proclamation No. 297 na inilabas ng Presidential Communications Office (PCO).

Inihayag ni Marcos na ipinatupad ang muling pagbubukas ng international borders at pagluwag ng health at safety protocol requirements dahil sa patuloy na pagbabakuna at pagbaba ng bilang ng mga kaso ng COVID sa bansa.

Gayunman, mananatili pa rin aniya ang bisa ng lahat ng emergency use authorization (EUA) para sa COVID-19 vaccines na inisyu ng Food and Drug Administration (FDA) sa loob ng isang taon.

Kaugnay nito, umapela si Senador Christopher 'Bong' Go kay Pangulong Marcos na tiyaking maibibigay pa rin ang COVID allowances ng mga healthcare workers at death benefits ng mga nagbuwis ng buhay.

Ito ay sa kabila na nirerespeto ni Sen. Go, chairman ng Senate Committee on Health ang naging desisyon ni P-BBM na alisin na ang public health emergency sa bansa.

Nanawagan din ang senador sa publiko na patuloy pa ring mag-ingat at unahin ang kalusugan sa gitna na rin ng mga natutunan noong panahon ng pandemya.

Samantala, inihayag ni Sen. Jinggoy Ejercito Estrada na hindi ito dapat maging dahilan para manumbalik sa nakagawian at sa halip, dapat aniyang isaisip ng bawat isa ang

"new normal", na panatilihin ang pagiging maingat at responsable sa araw-araw na gawain.

100 trak, bumalagbag sa Maynila vs. taas-toll fee ng NLEX

ni Mylene Alfonso @News | July 22, 2023

Nagkakaroon ng mahigpit na daloy ng trapiko matapos na magsagawa ng "caravan protest" ang grupo ng truckers sa Bonigavio Drive kahapon ng umaga sa Port Area, Maynila.

Nagsimula ang protesta, alas-7 ng umaga sa Anda Circle kung saan tinututulan ng mga truck company ang ipinatutupad na toll hike increase sa North Luzon Expressway.

Umabot sa 100 trak o dalawang kilometro ang haba ng isinagawang protesta malapit sa Manila North Harbour hanggang sa Anda Circle.

Balak din ng grupo na ibalagbag ang kanilang mga truck sa bukana ng NLEX upang ipakita ang kanilang pagtutol.

Nabatid sa Central Luzon Alliance of Concerned Truck Owners Organization (ACTOO) na naging epektibo ang toll hike noong Hunyo 15.

Umaabot umano sa P19 hanggang P100 ang ipinatutupad na taas- singil sa toll fee.