'Bagong Pilipinas', dumating na — P-BBM.. Presyo ng bilihin, bumaba na

ni Mylene Alfonso @News | July 25, 2023

Kumpiyansa si Pangulong Ferdinand Marcos, Jr. na maayos at bumubuti ang estado ng bansa at dumating na ang bagong Pilipinas.

Sa kanyang ikalawang State of the Nation Address (SONA), sinabi ng Pangulo na ang kanyang kumpiyansa ay lalo pang pinalakas ng pagpapakita ng world-class Filipino workforce ng pagmamahal sa kanilang sariling bayan.

“Ang bawat Pilipino ay nagkakaisa sa pagbangon sa hamon na ginawa natin sa kanila na maging bahagi ng kinabukasan ng bansa. Handa silang maghandog ng tulong, dahil mahal nila ang kanilang kapwa-Pilipino, at mahal nila ang Pilipinas,” pahayag ni Marcos.

“Galing ito sa aking puso, alam ko na ang estado ng bansa ay maayos, at bumubuti. Dumating na po ang Bagong Pilipinas.”

Ang ikalawang SONA ng Pangulo ay nagsaliksik umano sa mga nagawa ng administrasyon sa iba't ibang larangan tulad ng ekonomiya, pagpapaunlad ng imprastraktura, agrikultura, kapayapaan at kaayusan, turismo, enerhiya, pagsisikap sa kapayapaan ng Mindanao at marami pang iba.

Sinabi rin ng Pangulo na nakatulong ang programa ng Department of Agriculture para mapababa ang presyo ng agricultural products at mga pangunahing bilihin.

“Sa mga nakalipas na buwan, nakita natin ang pagbaba ng presyo ng bilihin sa iba’t ibang sektor. Napatunayan nating kayang ibaba ang presyo ng mga bigas, karne, isda, gulay, at asukal. Malaking tulong ang Kadiwa store na ating muling binuhay at inilunsad,” ayon sa Pangulo.

Binanggit din ng Punong Ehekutibo ang mga planong gustong isagawa ng kanyang pamahalaan sa hinaharap upang mapanatili ang pag-unlad ng bansa.

Tulong medikal sa media, oks na

ni Mylene Alfonso @News | July 24, 2023

Makaaasa ng tulong ang mga miyembro ng media at kanilang kaanak kay ACT-CIS Partylist Rep. Erwin Tulfo, kapag sila'y nagkasakit.

Sinabi ni Tulfo sa ginanap na forum ng Manila City Hall Reporters' Association, na nararamdaman niya ang kalagayan ng media.

"Kahit papaano meron naman kaming pondo para du'n, kaya nakahanda kaming tumulong," ayon pa kay Tulfo.

Maaari umanong magsadya sa kanilang tanggapan lalo na 'yung mga may problema sa ospital at gamot.

GCTA sa mga nahatulan sa heinous crime, alisin na

ni Mylene Alfonso @News | July 24, 2023

Planong ipatunaw ni ACT-CIS Partylist Rep. Erwin Tulfo sa Kongreso ang good conduct time allowance (GCTA) para sa mga nahatulan dahil sa heinous crime at dapat na nasa loob na sila ng kabaong kapag lumaya.

Sinabi ni Tulfo na nababalewala ang life sentence dahil sa umiiral na GCTA na ginagamit ng Department of Justice (DOJ) sa pagpapalaya ng mga bilanggo na matagal nang nakakulong.

Ayon kay Tulfo sa ginanap na Balitaan ng The Manila City Hall Reporters' Association, ang mga kriminal na nahatulan ng life sentence dahil sa heinous crime ang nagtatamasa ng kalayaan dahil nakakalaya na sila pagkatapos ng ilang dekada.

Inatasan na ni Tulfo ang kanyang legal team na rebisahin ang batas kaugnay a life sentence na ang katumbas na hatol ay 40 taon.

"Sa U.S., 'pag sinabing life sentence, lalabas ka sa kulungan nasa ataul ka na. Dapat i-adopt na 'pag heinous crimes gaya ng massacre, isulong na lang natin na life sentence talaga," ani Tulfo.

Banggit pa ni Tulfo na dahil sa GCTA, nababawasan ang sentensiya ng 20 taon kaya kung ang nahatulan ay 20-anyos lalaya na siya sa edad 50-60.

"After 20 years tatawanan ka pa, neknek mo, nakalabas na 'ko. Paano ka ngayon patay na mister mo, anak mo? Sabi rehab daw. Paano mo ire-rehab 'yung mga buwang, mga drug lord na nakatikim na ng marangyang buhay, nang-rape ng anak niya tapos pinatay pa niya buong pamilya tapos makakalaya after 20 years," ayon kay Tulfo.

"'Pag heinous crime like Maguindanao massacre, 'yung 40 years, sa 50 pinatay mo concurrent ang pag-serve ng 40 years. It's useless. Mabuti kung 10 pinatay mo bawat isa life sentence bale 400 years. Paano naman ang buhay nu'ng mga pinatay? Dapat lalabas ka bilangguan nasa ataul na para naman 'yung mga nabiktima, maramdaman ang hustisya," dagdag pa ni Tulfo.

Ipinaliwanag din niya na tutol siya sa firing squad at mas pabor siya sa lethal injection.