Nakukulangan ako sa SONA — P-BBM

ni Mylene Alfonso @News | July 26, 2023

Aminado si Pangulong Ferdinand Marcos, Jr. na nakukulangan siya sa kanyang State of the Nation Address (SONA) nitong Lunes.

“Kulang pa. There was so much to go through,” ang maiksing pahayag ng Pangulo nang tanungin matapos ang kanyang SONA.

Ayon kay Marcos, sa kabila na naiulat niya sa taumbayan ang buong isang taong nagawa niya sa kanyang panunungkulan ay marami pa sana siyang gustong sabihin.

Binanggit din ng Pangulo na hahayaan na niya ang mga miyembro ng kanyang Gabinete na magpaliwanag sa mga detalye ng kanyang SONA.

Bagama't binanggit din niya ang mga makabuluhang tagumpay sa ekonomiya, sistemang pangkalusugan, edukasyon at imprastraktura ng bansa, inihayag ni Marcos na inaabangan niya ang pagpasa ng mga prayoridad na batas upang maiangat ang buhay ng mga mamamayang Pilipino.

Tiniyak din ng Punong Ehekutibo na ipagpapatuloy ang kampanya laban sa ilegal na droga, ngunit may bagong pamamaraan dahil tututok ito sa community-based na paggamot, rehabilitasyon, edukasyon at reintegrasyon upang masugpo ang drug dependent sa mga apektadong mamamayan.

Ex-P-Duterte, no show sa SONA ni P-BBM

ni Mylene Alfonso @News | July 25, 2023

Hindi nakadalo si dating Pangulong Rodrigo Duterte sa ikalawang SONA ni Pangulong Marcos.

"'Di yata. Galing po siya sa China, medyo pagod. Nasa Davao po siya. Kakarating lang niya nu'ng Sabado," wika ni Sen. Bong Go sa ambush interview bago ang opening ng 2nd regular session ng 19th Congress sa Senado.

Sa kabila nito, tiniyak ni Go na manonood pa rin si Duterte ng SONA ni Pangulong Marcos.

P-BBM sa mga smuggler at hoarder: Bilang na ang mga araw n'yo!

ni Mylene Alfonso @News | July 25, 2023

Binalaan ni Pangulong Ferdinand 'Bongbong' Marcos, Jr. ang mga smuggler at hoarder ng mga produktong pang-agrikultura na bilang na ang araw ng mga ito.

Sa kanyang ikalawang State of the Nation Address, sinabi ni Marcos na ang mga smuggler at hoarder ang dahilan ng pagtaas ng presyo ng mga agricultural products kabilang ang mga pataba na ginagamit ng mga magsasaka.

"Isa sa mga dahilan ng pagtaas ng presyo ay ang mga smuggler, mga hoarder, at mga nagmamanipula ng produktong pang-agrikultura. Ihahabol at ihahabla natin sila," wika ni Marcos.

"Sadyang hindi tama ang kanilang gawain at hindi rin ito tugma sa ating magandang layunin, pandaraya ang kanilang ginagawa. Napapahamak hindi lamang mga magsasaka, kundi tayo ring mamimili kaya't hindi natin papayagan ang ganitong kalakaran. Bilang na ang araw ng mga smugglers at hoarders na 'yan," diin pa ng Pangulo.