Mga iskul, aalamin kung ready na sa pasukan

ni Mylene Alfonso @News | July 30, 2023

Sa gitna ng pagtatapos ng public health emergency dahil sa COVID-19 at sa mga pinangangambahang sama ng panahon, naghain si Senador Win Gatchalian ng resolusyon upang suriin ang kahandaan ng mga paaralan para sa School Year 2023-2024.

Maliban sa pagwawakas ng public health emergency na dulot ng COVID-19 at ang banta ng El Niño, binigyang diin ni Gatchalian na nagdulot ng mas maikling school break ang pagbabago sa school calendar.

Para sa taong ito, nakatakda ang school break mula Hulyo 8, 2023 hanggang Agosto 27, 2023, katumbas ng 51 araw.

Sa gitna ng break na ito, magsasagawa ng mga remedial classes sa mga pampublikong paaralan mula Hulyo 17 hanggang Agosto 26, 2023.

Layunin ng inihaing Senate Resolution No. 689 ang agarang pagsusuri sa mga hamon at sa magiging epektibo ng parehong face-to-face classes at alternative delivery modes.

Bibigyan din ng konsiderasyon ang mga panawagang ibalik ang summer break mula Abril hanggang Mayo.

Sa ilalim ng Department Order (DO) No. 034 s. 2022, nakatakdang magsimula ang school year (SY) 2023-2024 sa Agosto 28, 2023 at magtatapos sa Hunyo 28, 2024.

“Sa gitna na patuloy na pagbangon mula sa pandemya at pagbabalik sa normal ng sektor ng edukasyon, napapanahong suriin natin ang kahandaan ng ating mga paaralan para sa patuloy na paghahatid ng edukasyon. Dahil nagpapatuloy pa rin ang mga hamon at pinsalang dulot ng pandemya, mahalagang matukoy natin kung paano natin tutugunan ang mga ito,” ani Gatchalian, chairperson ng Senate Committee on Basic Education.

27 patay; kapitan umamin — PCG.. Bangka overloaded, mga pasahero ‘di pinag-life jacket

ni Mylene Alfonso, Mai Ancheta, Benjamin Chavez @News | July 29, 2023

Sinabi ni Philippine Coast Guard (PCG) Spokesman Armand Balilo na umamin umano ang kapitan ng lumubog na bangka sa Binangonan, Rizal na nag-overload ito ng pasahero at hindi pinagsuot ng life jacket ang mga sakay.

“May pag-amin na ginawa ang kapitan na talagang in-overload niya ang boat at hindi pinagsuot ng life jacket,” ani Balilo.

Sinasabing 42 lamang ang kapasidad ng motorbanca pero sa naganap na trahedya, 43 ang nailigtas ng mga awtoridad at 27 ang namatay dahil sa pagkalunod.

Lumabas pa sa inisyal na imbestigasyon na bago bumiyahe ang pampasaherong bangka na Princess Aya ay 22 lamang ang pasaherong nasa manipesto na ipinakita umano ng kapitan ng bangka sa Coast Guard personnel.

Dahil wala namang indikasyon ng masamang panahon, pinayagan umano ang paglalayag ng pampasaherong bangka.

Kaugnay nito, sinibak sa puwesto ang dalawang personnel ng PCG na nakadestino sa Binangonan, Rizal matapos ang insidente.

Ayon kay PCG Commandant Artemio Abu, ang dalawang sinibak na personnel ay nakatoka sa pag-monitor sa biyahe ng mga pampasaherong bangka sa lugar.

Malalaman aniya sa gagawing imbestigasyon kung nagkaroon ng kapabayaan ang dalawang PCG personnel sa pagganap sa kanilang tungkulin.

Hindi pinangalanan ni Abu ang dalawang sinibak na tauhan.

Ang pagsibak aniya sa dalawang tauhan ay upang hindi maimpluwensyahan ang gagawing imbestigasyon sa insidente.

Sinuspinde na ng Maritime Industry Authority (MARINA) ang safety certificate ng MB Aya Express dahil sa kuwestiyon ng integridad nito

DTI 6-point agenda, oks sa shipping, logistic groups

ni Mylene Alfonso @News | July 29, 2023

Suportado ng Alliance of International Shipping Lines (AISL) at Alliance of Container Yard Operators of the Philippines (ACYOP), ang 6-point agenda ng Department of Trade and Industry (DTI) para makamit ang food security ng bansa.

Sa post-SONA briefing sa food security, sinabi ni Trade Undersecretary Ruth Castelo na para mabawasan ang transport at logistic cost, dapat magkaroon ng moratorium sa pagpataw ng dagdag ng port fees at iba pang charges, zero tolerance sa gray cost at batas para ma-regulate ang international shipping charges.

"We fully support and we extend our gratitude to the Department of Trade and Industry for its invaluable recommendations. It is imperative that we put an end to the burden of unnecessary port fees, which only exacerbate inflation and adversely impact the prices of essential commodities," sabi ni Patrick Ronas, President bg AISL.

Binigyang diin naman ni Roger Lalu, chairman ng ACYOP, ang mahalagang papel ng logistics sa paggalaw ng mga produkto at kinatigan ang pagsuporta ng AISL sa agenda gn DTI.

Ayon pa sa dalawang grupo, mahalagang mapakinggan ng DTI ang panawagan na tanggalin ang Philippine Port Authority controversial container registry, monitoring, and storage system o mas kilala sa tawag na Trusted Operator Program-Container Registry and Monitoring System (TOP-CRMS).