Presyo ng bigas, tataas — P-BBM

ni Mylene Alfonso @News | July 30, 2023

Nangangamba si Pangulong Ferdinand Marcos, Jr., na posibleng tumaas pa rin ang presyo ng bigas kahit mag-angkat ang bansa.

“Everybody is preparing for El Niño, lahat ng Southeast Asia. Sabay-sabay nagbibilihan. Kaya ninenerbyos ako dahil tataas na naman ang presyo kahit nag-i-import tayo. That’s the problem that I see in the world. Pwede tayo magbigay ng binhi sa palay, mais and high value crops,” pahayag ni Marcos. Ito ay kasunod ng pagpupulong ni Marcos sa mga lokal na opisyal ng Tuguegarao bunsod ng pananalasa ng Super Typhoon Egay sa Cagayan at sa iba pang bahagi ng bansa.

Sinabi ni Cagayan Gov. Manuel Mamba na nitong Hulyo 28, nakapagtala na ang lalawigan ng 20 nasugatan mula sa bagyo habang wala namang naitalang namatay sa ngayon.

Nawasak ng bagyo ang hindi bababa sa 83 mga bahay at nasira ang higit sa 1,500 mga bahay sa lalawigan.

Nabatid na umabot na sa mahigit P539 milyon ang pinsalang pang-agrikultura sa lalawigan. Umabot din sa mahigit P1 milyon ang pinsala sa mga hayop noong Hulyo 28.

Samantala, umabot sa mahigit P862 milyon ang pinsala sa imprastraktura sa buong lalawigan.

Ayon kay Marcos, ang kuryente at agrikultura ang pangunahing tinamaan sa mga lugar na sinalanta ng bagyo.

“It looks like the main issue here is agri. Number one 'yung agri… Ang kuryente as you all know, pinapatay talaga 'yan at hindi binabalik hanggang mainspeksyon ang mga linya. Kasi 'pag hindi nila nainspeksyon at nagkamali sila, pag-on nila n'yan at may short, sira ang buong sistema,” ani Marcos. “'Yung high-value crops, mas madaling maka-recover dahil ang cycle is 45 days. We will also provide for high value crops,” aniya pa.

Bunsod nito, inatasan niya ang mga lokal na pamahalaan na magpadala ng mga ulat tungkol sa pinsala sa agrikultura.

“Ang hirap nito, because 'yung palay, iniisip ko na ang supply natin 'pag nag-El Niño talaga. I’m thinking about the national supply for rice because ini-import lahat ng Indonesia, nagsara ang Vietnam, India nagsara. We have to start importing already,” dagdag pa ng Pangulo.

August 8-14, "Philippine Space Week" — Marcos

ni Mylene Alfonso @News | July 30, 2023

Idineklara ni Pangulong Ferdinand Marcos, Jr., ang Agosto 8 hanggang 14 bilang Philippine Space Week upang isulong ang kamalayan sa outer space ng mga Pilipino.

Batay sa Proclamation No. 302 na nilagdaan ni Executive Secretary Lucas Bersamin, idineklara ang “Philippine Space Week” kasabay ng pagsasabatas ng Philippine Space Act noong Agosto 8, 2019.

Ang desisyon ng Pangulo ay tugon na rin sa rekomendasyon ng Philippine Space Council.

"The proclamation also underscored the importance of the declaration to highlight the substantial influence of space science and technology applications on the socio-economic development of the country," nakasaad sa proklamasyon.

"There is a need to promote space awareness, celebrate the significant contributions of Filipinos worldwide in the field of space science, and espouse the value, benefits and impacts of space science and technology applications on the lives of Filipinos," nakasaad pa sa proklamasyon.

Nabatid na inaatasan ni Pangulong Marcos ang Philippine Space Agency (PhilSA) na itaguyod ang “Philippine Space Week” at maglaan ng mga programa, proyekto at aktibidad para rito.

Inaatasan din ng Punong Ehekutibo ang lahat ng tanggapan ng gobyerno pati na ang government-owned or -controlled corporations, state universities and colleges, local government units (LGUs), non-government organizations at pribadong sektor na aktibong makiisa sa "Philippine Space Week".

Hamon ni Sen. Koko kay P-BBM.. Kaibigan, kakilala na smuggler, sampolan

ni Mylene Alfonso @News | July 30, 2023

Hinamon ni Senate Minority Leader Aquilino 'Koko' Pimentel III si Pangulong Ferdinand Marcos, Jr., na magpakita ng kaseryosohan sa idineklarang paglaban sa mga agricultural smugglers.

Ginawa ni Pimentel ang pahayag makaraang ideklara ng Pangulo sa kanyang ikalawang State of the Nation Address (SONA) na bilang na ang mga araw ng mga agricultural smugglers sa bansa.

Ito ay kasabay din ng deklarasyon aniya ng Pangulo na hahabulin ng kanyang administrasyon ang mga smuggler.

Ngunit para kay Pimentel, ang pinakamahusay na paraan upang patunayan ang kaseryosohan ng Pangulo sa pagsugpo sa agricultural smuggling ay sa pamamagitan ng pagbibigay ng mga halimbawa.

“Should there be friends and acquaintances involved in smuggling of any kind then the President can also start with them as his best example of the seriousness of his crackdown,” sabi ni Pimentel sa isang panayam.

Maipapakita rin aniya ito kung ang Pangulo ay magsisimula sa kanyang sariling pinamamahalaang ahensya, ang Department of Agriculture, at ang Bureau of Customs na patuloy na binabatikos ng mga alegasyon ng lahat ng uri ng iregularidad.

"Actions speak louder than words. Consistency of action proves sincerity. If the President is serious in his fight against agricultural smuggling, then the best place to start would be the Dept. of Agri, from those who release the permits and other documents, and the Bureau of Customs, from those who clear the release of unlawful or questionable imports," paliwanag ng senador.

"Bilang na daw ang mga araw ng smugglers. Ang importante na lang malaman ay kailan tayo mag-uumpisa magbilang," dagdag pa ni Pimentel.