Problema sa baha, lalala.. Reclamation projects sa Manila Bay, stop, pwera sa isa — P-BBM

ni Mylene Alfonso @News | August 10, 2023

Sinuspinde ni Pangulong Ferdinand Marcos, Jr., ang lahat ng Manila Bay reclamation projects maliban sa isang hindi pinangalanang proyekto habang ang iba ay nirerebyu pa ng Department of Environment and Natural Resources (DENR).

"Nakasuspinde lahat... under review ang lahat ng reclamation. 'Yung isa lang ang natuloy dahil na-review na. Maraming problema, marami kaming nakitang hindi masyadong maganda ang patakbo," pahayag ni Marcos sa situation briefing sa Bulacan noong Lunes.

"But anyway, isa pang malaking problema na kailangan ayusin 'yan. Kasi kung matuloy lahat 'yan, maraming ilog mababara," wika pa ng Pangulo.

Hindi tinukoy ni Marcos kung aling mga proyekto ang sinuspinde, ngunit ikinalungkot nito na maaaring mawala ang dagat sa kahabaan ng Roxas Boulevard dahil sa mga reclamation projects.

Nabatid na sinasabing nakasunod na sa requirements ng Philippine Reclamation Authority (PRA) at DENR ang Manila Waterfront Reclamation Project.

Ayon sa PRA, aabot sa 22 reclamation project ang nakalinya sa Manila Bay kung saan tatabunan nito ang 6,700 ektarya ng dagat.

Kaugnay nito, ikinatuwa naman ni Senador Cynthia Villlar ang pagsuspinde ng Pangulo sa Manila Bay reclamation na posibleng nakapagdulot umano ng matinding pagbaha sa kanyang siyudad sa Las Piñas.

"I am happy that Pres. Marcos is suspending the reclamation in Manila Bay. This is good news to us who are afraid of ill effects of reclamation which will cause massive flooding in our cities," wika ni Villar.

Mga preso sa Bilibid, nakakagamit ng e-wallet

ni Mylene Alfonso @News | August 9, 2023

Posibleng umabot sa P300,000 kada araw ang halaga ng kabuuang money remittance transactions sa New Bilibid Prison.

Ito ang inihayag ng isang Molly Avejar, negosyante na humahawak ng mga transaksyon sa e-wallet.

Sa isinagawang pagdinig kahapon ng Senate Committee on Justice and Human Rights sa Bilibid, sinabi ni Avejar na iba-iba ang halaga ng remittances kada araw at kadalasang mababa kapag weekend.

“Wala pong definite, your honor. Meron pong umaabot po ng P300,000 sa isang araw po. Minsan po P50,000 to P70,000,” tugon ng babaeng negosyante kay Senador Francis Tolentino, chairman ng komite.

Sinabi rin ni Avejar na naniningil siya ng tatlong porsyento mula sa kabuuang remittance at kumikita siya ng hanggang P9,000 sa isang araw.

“Hindi po ako nagbabawas sa P500 and below, hindi po ako nagbabawas. Minsan may nagpapadala P100, P200, dinadagdagan ko na lang po kasi ano pong mabibili nila sa P100, P200, your honor?” aniya pa.

Ang pera aniya ay nanggagaling mismo sa mga pamilya ng persons deprived of liberty (PDLs) o bilanggo, na tatawagan siya sa alinmang limang mobile number niya.

Matapos nito ay ibibigay niya ang mga pera sa isang pinagkakatiwalaang bilanggo, na siyang bahala sa pamamahagi nito sa mga PDL.

Dagdag pa ni Avejar, isang dating PDL sa Correctional Institution for Women (CIW), na naisip niya ang negosyo dahil sa kanyang karanasan sa CIW na isang pasilidad ng Bureau of Corrections sa Mandaluyong.

Ibinulgar ng kapitan ng lumubog na bangka, 27 namatay.. PCG, sinuhulan ng saging at P50

ni Mylene Alfonso @News | August 9, 2023

Ibinuking ng kapitan ng M/B Aya Express na nagbigay lang siya ng mga saging na halagang P100 at perang P50 na pangmeryenda bilang "pampangiti" sa tauhan ng Philippine Coast Guard (PCG) na nagbabantay sa pantalan.

Una nang tumaob ang M/B Aya Express sa Binangonan, Rizal na ikinamatay ng 27 sakay noong Hulyo 27.

Sa pagdinig ng Committees of Public Services at National Defense and Security, tinanong ni Sen. Raffy Tulfo si Donald Añain kung magkano ang ibinigay niya sa Coast Guard na "pampadulas" para pinirmahan" nang nakapikit" ang papel niya para makapaglayag noong araw na mangyari ang trahedya sa Laguna de bay.

“'Yun ano lang, 'pampangiti'... Kailangan po magdadala ka po ng kahit alin po… Bumili lang po ako ng P100 na saging… Tsaka 'yung P50 na money, meryenda,” tugon ni Añain.

Sinabi pa ni Añain na karaniwan na umano ang pagbibigay ng mga bagay sa mga tauhan ng PCG sa isla gaya ng tinapay, alak, sigarilyo.

Nasa 27 sakay ng bangka ang namatay at 40 ang nailigtas nang tumagilid hanggang sa tuluyang tumaob ang bangka na sinasabing sobra ang sakay na pasahero.

Samantala, napag-alaman din na walang valid license si Añain mula sa Maritime Industry Authority (MARINA).