Aprub kay P-BBM.. Taas-sahod sa gobyerno

ni Mylene Alfonso @News | August 15, 2023

Pinag-aaralan na umano ng pamahalaan ang muling pagtataas ng suweldo ng mga kawani ng gobyerno.

Ayon kay Budget Secretary Amenah Pangandaman, naglaan na sila ng P48 milyong budget ng governance commission for GOCCs.

Layunin umano nito na kumuha ng serbisyo ng mga eksperto o espesyalista na magsasagawa ng komprehensibong pag-aaral sa compensation at position classification system para sa sektor ng gobyerno.

Paliwanag pa ng kalihim, binigyan sila ng go signal ni Pangulong Bongbong Marcos para pag-aralan na ang lahat ng kompensasyon sa mga sibilyan na empleyado ng gobyerno na mas higit pa kumpara sa nagtatrabaho sa pribadong sektor.

Ito ay para mahikayat ang publiko na pumasok sa gobyerno at inaasahan na magsisilbi rin itong motivation sa mga kasalukuyang kawani ng pamahalaan na manatili sa bansa at maging masipag at maayos sa kanilang trabaho.

Mayroon din umanong katulad na pag-aaral silang isinagawa sa iba't ibang ranggo ng civil service servants para malaman kung kailangan na mai-adjust ang kanilang suweldo.

Malaki umano ang maitutulong ng anumang pagtaas sa suweldo ng mga kawani ng gobyerno para makatulong sa pang araw araw nilang pamumuhay.

Naunang naipatupad nitong Enero ang huling yugto ng umento sa suweldo ng mga kawani ng gobyerno sa ilalim ng salary standardization law of 2019.

Palit sa Agham at BIR Roads.. Senator Miriam P. Defensor-Santiago Avenue, lusot na

ni Mylene Alfonso @News | August 15, 2023

Sa nagkakaisang boto ng mga senador na dumalo sa plenary hearing lumusot sa ikatlo at huling pagbasa ang House Bill No. 7413 o ang panukalang Senator Miriam P. Defensor Santiago Avenue kung saan kaakibat nito ang Senate Bill Nos. 1888, 2069, 2163 at 2183.

Ipapangalan sa dating Senadora ang Agham Road at BIR Road sa Quezon City.

Una na itong isinulong sa House of Representatives nina Isabela 1st District Rep. Tonypet Albano, Quezon City 1st District Rep. Arjo Atayde, Quezon City 4th District Rep. Marvin Rillo at Surigao del Sur 1st District Rep. Romeo Momo, Sr.

Dalawampu't dalawang senador ang bumoto pabor sa naturang panukala at walang kumontra at wala ring abstention.

Sa manipestasyon sinabi ni Senador Ramon 'Bong' Revilla na patunay ito ng pagkakaisa ng mga mambabatas sa paghanga kay Santiago.

“Malinaw na sumasalamin ito sa ating nagkakaisang pagtingala at paghanga hindi lamang sa mga nakamit kundi sa mga makabuluhang kontribusyon ni Sen. Miriam sa ngalan ng lipunan noong siya ay nabubuhay pa,” sabi ni Revilla.

Mga iskul sa Makati na sakop na ng Taguig, bantay-sarado

ni Mylene Alfonso @News | August 14, 2023

Kasinungalingan umano ang pahayag ni Makati City Administrator Claro F. Certeza hinggil sa umano'y pagtatangka ng Lungsod ng Taguig na puwersahang kunin ang ilang pampublikong gusali sa mga barangay na idineklara na ng Supreme Court bilang nasa ilalim ng hurisdiksyon ng Taguig.

Kasunod ng desisyon ng SC sa paglipat ng hurisdiksyon ng ilang barangay mula Makati patungong Taguig, ang Kagawaran ng Edukasyon ay naglabas ng Memorandum Order 2023-735 na naglilipat ng pamamahala at pangangasiwa sa mga apektadong paaralan sa loob ng mga barangay na ito mula sa DepEd Division ng Makati patungo sa Dibisyon ng Taguig at Pateros.

Batay sa DepEd Order, nagsasagawa ng mga pagpupulong ang mga opisyal ng pampublikong paaralan, guro, magulang, pinuno ng komunidad, at Lungsod ng Taguig bilang paghahanda sa Brigada Eskwela at pagbubukas ng school year.

Kaugnay nito, humiling ng tulong ang DepEd superintendent ng Taguig at Pateros sa Lungsod ng Taguig, kabilang ang paglalagay ng mga security personnel upang matiyak ang kapakanan ng mga estudyante, guro, at kawani, at ang maayos na pagsasagawa ng ang mga nabanggit na aktibidad.

Inatasan ng Taguig ang tagapagkaloob ng seguridad nito na makipag-ugnayan sa superintendent ng paaralan, sa Lungsod ng Makati, sa dating tagapagbigay ng seguridad, Philippine National Police, at lahat ng kaugnay na ahensya.

Gayunman, hinarangan umano ng Lungsod ng Makati at sinasabing pribadong security firm at ilang kaalyadong opisyal ng barangay ang mga pampublikong paaralan at mga lansangan.

Dahil dito, kinukuha ng Taguig ang eksepsiyon sa mga maling pahayag na ginawa umano ng City Administrator ng Makati, kabilang ang mga banta ng mga kasong kriminal at administratibong isasampa.